Hi kutsala ka Luka 7:1-50
7 Laha a nga mbhetile lezvi a nga lava ku byela vanhu, i no nghena Kapernawume.
2 A hosana yo kari ya masochwa yi wa hi ni nandza yi nga gi randza, kanilezvi gi wa babya nguvhu niku gi wa hi kusuhani ni kufa.+
3 A cikhati leci a hosana leyo yi ngazwa ha Jesu, yi no ruma madhota yo kari ya vaJudha maya kakwe ma ya mu kombela lezvaku a ta gi hanyisa.
4 Ma noya ka Jesu ma ya mu khongotela nguvhu, maku: “Zva ringana ku u mu mahela lezvo,
5 hakuva wa gi randza a tiko ga hina niku hi yena a nga hi akela sinagoga.”
6 Hikwalaho, Jesu i no famba navo. Kanilezvi na a hi kusuhani ni ku chikela mutini, a hosana ya masochwa yi no rumela vanghana va yona, va yaku kakwe: “Hosi, u nga ti karati, hakuva a ndzi munhu wo kala ndzi ku amukela ndlwini ya mina.+
7 Hi zvalezvi zvi ndzi mahileko ndzi ti wona na ndzi nga ringanelwi hi kuta ka wena. Kanilezvi, wula gezu, a nandza ga mina gi ta hanya.
8 Hakuva minawu ndzi munhu a fumiwako, na ndzi hi ni masochwa ndzi ma rangelako; ndza wula ka gin’we, ndziku: ‘Famba!’, gi famba; ndziku ka gin’wani: ‘Tana!’, gita; ni ka citiri ca mina, ndziku: ‘Maha lezvi!’, ci maha.”
9 Laha Jesu a ngazwa lezvo, i no hlamala hi yena, a hundzuluka a cuwuka citshungu leci ci nga kari ci mu landzela, aku: “Ndza mu byela ndziku, hambu lomu Izrayeli a ndzi se kuma munhu a nga ni kukholwa ka hombe ko kota loku.”+
10 A cikhati leci lava va nga rumilwe va nga tlhela mutini, va no ya kuma nandza na gi hanyile.+
11 Cikhatanyana ndzhako ka lezvo, Jesu i no suka aya dhoropeni gi vitaniwako ku i Nayine. A vapizani vakwe zvin’we ni citshungu ca hombe va no famba naye.
12 Laha a nga chikela kusuhani ni nyangwa ya dhoropa, i no kumana ni vanhu va nga rwele mufi, a nga hi yena n’wana wa mun’we ka mamani wakwe.+ A ku tsika lezvo, a mamani loyi i wa hi noni,* ni citshungu ca hombe ca lomu dhoropeni ci wa hi zvin’we naye.
13 A cikhati leci a Hosi yi nga mu wona, yi no mu zwela wusiwana,+ yiku kakwe: “Miyela ku rila.”+
14 Andzhako ka lezvo, i no tshinela a henya lihlaka,* lava va nga rwele lihlaka va nyima. Aku ngalo: “Jaha, ndziku ka wena: Vhuka!”+
15 Loyi a nga file i no vhuka a tshama a sangula ku wulawula, Jesu a mu nyikela ka mamani wakwe.+
16 Vontlhe va no chava nguvhu, va sangula ku dhumisa Nungungulu, vaku: “Ku humelele a muphrofeti wa hombe cikari ka hina”+ niku “Nungungulu i alakanyile vanhu vakwe.”+
17 A mahungu lawa xungetano hi yena ma no hangalaka tikweni gontlhe ga Judhiya ni ka matshamu wontlhe ya lomu kusuhani.
18 Makunu a vapizani va Johani va noya va ya mu hlawutela a zvilo lezvi zvontlhe.+
19 Hikwalaho, Johani i no vitanisa vambiri cikari ka vapizani vakwe, a va rumela ka Hosi kasi va ya yi wutisa, vaku: “Hi wena Loyi a Tako+ kutani hi fanele ku rindzela mun’wani ke?”
20 Laha va nga chikela kakwe, va te: “Johani Mubhabhatisi i hi rumele ka wena kasi ku ta ku wutisa ku: ‘Hi wena Loyi a Tako kutani hi fanele ku rindzela mun’wani ke?’”
21 Ka cikhati leco, i no hanyisa vanhu vo tala ka mababyi yabye+ ni tinghumbe, ni ka mimoya ya kubiha, a tlhela a zvi tlhelisela kuwona a zvikhumu zvo tala.
22 I no va hlamula, aku: “Fambani mu ya byela Johani lezvi mu zvi wonileko ni ku zvizwa, muku: A zvikhumu makunu zva wona+ ni zvilima zva famba, a vahlokonho va basiswa ni zviwiri zvazwa,+ a vafileko va vhuxiwa ni zvisiwana zva byeliwa a mahungu ya manene.+
23 Wa tsaka loyi a nga khunguvanyekiko hi kota ya mina.”+
24 A cikhati leci a zvirun’wa zva Johani zvi nga famba, Jesu i no sangula ku wulawula ni zvitshungu hi Johani, aku: “Mu waya mu ya wona yini le ciwuleni? Mu wa yela ku ya wona a lihlanga li ninginisiwako hi moya ke?+
25 Makunu mu waya mu ya wona yini? A wanuna a bohileko tinguwo to saseka?*+ Phela lava va bohako tinguwo to saseka ni ku hanya mafureni va lomu tindlwini ta tihosi.
26 Khwatsi-khwatsi mu waya mu ya wona yini? A muphrofeti ke? Ina, niku ndza mu byela ndziku: I hundza nguvhu a muphrofeti.+
27 Loyi hi yena ku tsalilweko ha yena ku: ‘Ndza rumela a cirun’wa ca mina mahlweni ka wena,* ci to ranga mahlweni ka wena ci ku longisela ndlela.’+
28 Ndza mu byela, ndziku: Cikari ka lava va pswalilweko hi vavasati a ku na wahombe ku hundza Johani, kanilezvi loyi a nga mutsongwani Mufun’weni wa Nungungulu wa hombe ku hundza yena.”+
29 (A cikhati leci a vanhu vontlhe ni vakhupisi va ngazwa lezvo, va no vhumela lezvaku Nungungulu i lulamile, hakuva va wa bhabhatisilwe hi kubhabhatisa ka Johani.+
30 Kanilezvi a vaFarisi ni titlhari ta Nayo a va chelangi kota hi kungo* ga Nungungulu kabye,+ hakuva va wa nga bhabhatiswangi hi yena.)
31 “Hikwalaho, ndzi ta va fananisa na mani a vanhu va cizukulwana leci? Va fana na mani ke?+
32 Va fana ni vanana va tshamileko merkadho lava va vitananako, vaku: ‘Hi mu bele citoliya kanilezvi a mu kinangi; hi bile huwa kanilezvi a mu rilangi.’
33 Hizvalezvo, Johani Mubhabhatisi i tile a ta tshama a ngagi pawa ne kunwa vhinyo,+ kanilezvi n’wina mu ngalo: ‘I na ni dhimoni.’
34 A N’wana wa munhu i tile a taga ni kunwa kanilezvi n’wina mu ngalo: ‘I khobomu* niku cidhakwa; munghana wa vakhupisi ni vawonhi!’+
35 Hambulezvo, a wutlhari gi kombisa kululama* hi vana* va gona vontlhe.”+
36 A mun’we wa vaFarisi i no mu kombela lezvaku a yaga naye. Hikwalaho, i no nghena ndlwini ya muFarisi a tshama mezeni.
37 Laha a wasati wo kari a nga tiveka lomu dhoropeni lezvaku muwonhi a nga tiva lezvaku i wa hi kugeni* ndlwini ya muFarisi loye, i nota ni botori ga alabhasteri ga mafura yo nuhela.+
38 I noya le ndzhako mikondzweni yakwe a ya rila a mu tsakamisa mikondzo hi mihloti a gumesa a yi sula hi misisi yakwe. Ahandle ka lezvo, i no pswopswa mikondzo yakwe a chulula mafura yo nuhela hehla ka yona.
39 A cikhati leci a muFarisi loyi a nga mu rambile a nga wona lezvo, i no wulawula mbilwini yakwe, aku: “Loku hakunene a wanuna loyi i wa hi muphrofeti, na a zvi tivile lezvaku himani a mu henyako niku wasati wa tshamela muni, hakuva muwonhi.”+
40 Kanilezvi Jesu i no mu hlamula, aku: “Simoni, ku na ni zvokari ndzi lavako ku ku byela.” Simoni aku: “Wula, Mugondzisi!”
41 “Ku wa hi ni vavanuna vambiri va nga dhevha mupembisi wo kari; a mun’we i wa dhevha a 500 wa tidhenario,* loyi mun’wani i wa dhevha a 50.
42 Laha va nga vhumala a zva ku mu hakhela hi zvona, i no va tsetselela hi mbilu yontlhe hi wumbiri gabye. Makunu himani cikari kabye a to mu randza nguvhu a mupembisi?”
43 Simoni i no hlamula aku: “Ndzi alakanya ku hi loyi a nga tsetselelwa nguvhu.” Aku kakwe: “U lamulile khwatsi.”
44 Andzhako ka lezvo, i no hundzuluka a cuwuka wasati, aku ka Simoni: “Wa mu wona a wasati loyi? Ndzi nghenile ndlwini ya wena; a wu ndzi nyikangi mati ya ku hlamba mikondzo. Kanilezvi a wasati loyi i tsakamisile mikondzo ya mina hi mihloti yakwe a tlhela a yi sula hi misisi yakwe.
45 Wena a wu ndzi pswopswangi, kanilezvi a wasati loyi, kusukela ka cikhati leci ndzi nga nghena, a nga tsikangi ku pswopswa mikondzo ya mina.
46 Wena a wu ndzi chelangi mafura hlokweni ya mina, kanilezvi a wasati loyi i chululile mafura yo nuhela mikondzweni ya mina.
47 Hi kota ya lezvo, ndza ku byela, ndziku: A zviwonho zvakwe, hambu lezvi zvi teleko,* zvi tsetselelwe,+ hakuva i randzile nguvhu. Kanilezvi loyi a tsetselelwako zvi tsongwani i randza kutsongwani.”
48 I no gumesa aku ka wasati: “A zviwonho zva wena zvi tsetselelwe.”+
49 Lava va nga tshamile naye laha mezeni va no sangula ku byelana, vaku: “Himani a wanuna loyi wa ku hambu a zviwonho wa tsetselela?”+
50 Kanilezvi i no byela a wasati loye, aku: “A kukholwa ka wena ku ku ponisile,+ famba hi kurula.”
Mitlhamuselo ya lahasi
^ Kutani: “wasati wo felwa hi nuna”.
^ Kutani: “maka; citatara”.
^ Kutani: “tinguwo ta tinene?”
^ Hi kukongoma: “ka nghohe ya wena”.
^ Kutani: “kurandza”.
^ Kutani: “Munhu wa makolo”.
^ Kutani: “mihandzu”.
^ Kutani: “gi lweliwa”.
^ Kutani: “tshamile mezeni”.
^ Kutani: “nga zva hombe”.
