Hi kutsala ka Luka 8:1-56
-
A vavasati lava va nga kari va landzela Jesu (1-3)
-
Mufananiso wa mubyali (4-8)
-
Lezvi zvi nga maha Jesu a tirisa mifananiso (9, 10)
-
A tlhamusela a mufananiso wa mubyali (11-15)
-
A va lumeki kandiya va yi khubhunyeta (16-18)
-
A mamani wa Jesu ni vamakabye vakwe (19-21)
-
Jesu a miyeta a bhubhutsa (22-25)
-
Jesu a rumela madhimoni ka makhumba (26-39)
-
Nhanyana wa Jairo; a wasati a henya tinguwo ta Jesu (40-56)
8 Cikhatanyana ndzhako ka lezvo, i no fambafamba madhoropeni ni zvidhoropaneni a chumayela ni ku kanela mahungu ya manene ya Mufumo wa Nungungulu.+ Ni lava va 12 va wa hi zvin’we naye,
2 a ku patsa ni vavasati vo kari va nga hanyisilwe ka mimoya ya kubiha ni ka mababyi yabye, va nga lava: Mariya Magdhala,* loyi a nga humesiwa a 7 wa madhimoni;
3 na Johana+ a sati wa Kuza, a muwoneleli wa zva muti wa Herodhi; na Suzana; ni van’wani vavasati vo tala va nga va tirela hi zvilo zvabye.+
4 Laha a citshungu ca hombe ci nga tlhangene ni lava va nga tile kakwe hi ka man’wani madhoropa, i no wulawula hi mufananiso, aku:+
5 “A mubyali i no huma a ya byala timbewu takwe. A cikhati leci a nga kari a byala, a to kari ti no wela laha ndleleni ti kandzihetelwa, ti gumesa ti giwa hi zvinyanyani zva tilo.+
6 A tin’wani ti no wela maribyeni, kanilezvi loku ti milile ti no woma hakuva ku wa nga hi na ndzhongo.+
7 A tin’wani ti no wela cikari ka mimizwa, ni mimizwa yi no kula zvin’we nato yi ti tlimba.+
8 Kanilezvi a tin’wani ti no wela ka misava yo nona, niku loku ti milile ti no pswala mihandzu hi ka 100, a ku hundza lezvi zvi nga byalilwe.”+ Loku a wulile zvilo lezvi, i no tlakusa gezu, aku: “Loyi a nga ni tindleve ta kuzwa, i wazwe.”+
9 Kanilezvi a vapizani vakwe va no mu wutisa ku wu wula yini a mufananiso lowu.+
10 Yena aku: “N’wina mu nyikilwe ku zwisisa a zvihundla zvo basa zva Mufumo wa Nungungulu, kanilezvi a van’wani a zvilo zvontlhe ndzi va gondzisa hi mifananiso,+ kasi hambu loku va cuwuka, va cuwuka mahala, ni loku vazwa, va nga zvi zwisisi.+
11 A mufananiso lowu wu wula lezvi: A mbewu i mhaka ya Nungungulu.+
12 Leti ti nga laha ndleleni hi lava va zwileko mhaka, kanilezvi Dhiyabho ita a ta susa a mhaka timbilwini tabye kasi va nga kholwi va ponisiwa.+
13 Leti ti nga maribyeni, hi lava va ku loku vazwa mhaka va yi amukela hi kutsaka, kanilezvi a va na timitsu. Va kholwa zva cikhatana, kanilezvi loku ku chikela nguva ya zviringo vowa.+
14 Kasi leti ti nga wela cikari ka mimizwa, hi lava va zwako mhaka, kanilezvi a zvikarato zva loku kuhanya, ni ku kokiwa hi titshomba+ ni kutitsakisa ka loku kuhanya+ zvi va tlimba hi kumbhelela va nga pswali mihandzu yi kala yi buvha.+
15 Makunu leti ti nga ka misava yo nona hi lava va ku loku va zwile mhaka hi mbilu yi nene+ ni yi longileko vo yi hlayisa va pswala mihandzu hi kutimisela.+
16 “A ku na munhu a lumekako kandiya a yi khubhunyeta hi cindzala* kutani ku yi veka lahasi ka mubhedhi, kanilezvi i yi hayeka le hehla kasi lava va nghenako va wona kuwonekela.+
17 Hakuva a ku na nchumu wu fihlilweko wu to kala ku wonekeliswa, ne hambu cilo ci tumbetilweko ci to kala ku tiviwa hambu ku huma kubaseni.+
18 Hikwalaho, chelani kota ka lezvi mu ingiselisako zvona, hakuva ni wihi loyi a nga nazvo i ta nyikiwa zvin’wani,+ kanilezvi loyi a nga hava nchumu, hambu lezvi a alakanyako ku i nazvo i ta tekelwa.”+
19 A mamani wakwe ni vamakabye vakwe+ va nota kakwe, kanilezvi a va zvi kotangi ku chikela laha a nga hi kona hi kota ya citshungu.+
20 Hikwalaho, i no byeliwa ku: “A mamani wa wena ni vamakabye va wena va yimile le handle, va lava ku ku wona.”
21 I no va hlamula, aku: “A mamani wa mina ni vamakabye va mina hi lava va zwako a mhaka ya Nungungulu va yi maha.”+
22 Ka siku go kari, i no nghena ngalaveni ni vapizani vakwe, aku kabye: “A hi tlhatukeni hiya ka mbhiri leyi yin’wani ya tiva.” Hikwalaho, va no famba.+
23 Kanilezvi, laha va nga kari va famba, i no etlela. Ku no sangula kuba bhubhutsa ga hombe lomu tiveni a ngalava yabye yi sangula ku tala hi mati, vava mhangweni.+
24 Hikwalaho, va no mu vhuxa, vaku: “Mugondzisi, Mugondzisi, hafa!” Laha a ngazwa lezvo, i no vhuka a kawuka a moya ni mavingo,* a moya wu nyima, kuva ni kurula.+
25 Hi kulandzela i te ngalo kabye: “Ku kwihi a kukholwa ka n’wina?” Kanilezvi va no tala hi kuchava, va hlamala, vaku ka mun’we ni mun’wani: “Kasi himani yaloyi, wa ku laya moya ni mati zvi mu ingisa?”+
26 Va no chikela mbhirini leyi yin’wani tikweni ga vaGerasa+ legi gi cuwukeneko ni Galileya.
27 Zvalezvi Jesu a nga huma ngalaveni, i no telwa hi wanuna wo kari wa dhoropa lego a nga hi ni madhimoni. I wa hi ni cikhati co leha na a nga bohi tinguwo, niku i wa nga tshami laha kaya, kanilezvi i wa tshama lomu zvilahleni.+
28 Laha a nga wona Jesu, i noba huwa, awa mahlweni kakwe a banguleka, aku: “Cini ndzi nga ku gohela wena Jesu, N’wana wa Nungungulu a Tlakukileko ku Hundza Vontlhe? Ndza ku khongotela lezvaku u nga ndzi xanisi.”+
29 (Hakuva Jesu i wa layile a moya lowo wa kubiha lezvaku wu huma kakwe. Wu wa mu xanisa makhati yo tala,*+ niku i wa tshamela ku bohiwa hi machini ni ku fasiwa hi tinghomondo* a tlhela a gadhiwa, kanilezvi i wo phewula, a yisiwa hi dhimoni ka matshamu yo kala vanhu.)
30 Jesu i no mu wutisa, aku: “Hi wena mani?” Aku: “Hi mina Cikwata”, hakuva i wa nghenilwe hi madhimoni yo tala.
31 Ma no mu khongotela nguvhu lezvaku a nga ma hoxi nkeleni wo eta wo kala magumo.+
32 Ku wa hi ni ntlhambi wa hombe wa makhumba+ ma nga kari maga laha citsungeni, hikwalaho ma no mu khongotela lezvaku a ma tsika ma nghena ka makhumba. I no ma vhumelela.+
33 Hikwalaho, a madhimoni ma no huma ka wanuna loye ma ya nghena ka makhumba. Makunu a ntlhambi wu no tsutsuma wu ya wela tiveni wu mbemba.
34 Kanilezvi laha a varisi va makhumba va nga wona lezvi zvi nga maheka, va no tsutsuma va ya hlawutela mahungu lawo dhoropeni ni ka matshamu ya lomu kusuhani.
35 Hikwalaho, a vanhu va nota va ta wona lezvi zvi nga mahekile. Va nota ka Jesu va ta kuma wanuna loyi a nga humesilwe madhimoni na a bohile tinguwo, lezvo na a tiva. I wa tshamile mikondzweni ya Jesu, hikwalaho va no chava.
36 Lava va nga zvi wona, va no va hlawutela lezvi a wanuna loyi a nga hi ni madhimoni a nga hanyisiswa zvona.
37 A vanhu vo tala va lomu kusuhani ni Gerasa va no kombela Jesu lezvaku a suka tikweni gabye, hakuva va wa khomilwe hi kuchava ka hombe. Makunu i no nghena ngalaveni kasi a famba.
38 Kanilezvi, a wanuna loyi a nga humesilwe madhimoni i no mu khongotela, a mu kombela lezvaku va nga hambani, kanilezvi Jesu i no mu tlhelisa, aku:+
39 “Tlhela kaya u ya hlawutela lezvi Nungungulu a nga ku mahela.” Hikwalaho, i no tlhela na a huwelela dhoropeni gontlhe lezvi Jesu a nga mu mahele.
40 A cikhati leci Jesu a nga wuya, a citshungu ci no mu amukela hi kutsaka hakuva vontlhe va wa mu rindzele.+
41 Ku nota wanuna a vitaniwako ku hi Jairo. A wanuna loye i wa hi murangeli wa sinagoga. I nota a tawa mikondzweni ya Jesu a sangula ku mu khongotela lezvaku aya mutini wakwe,+
42 hakuva a nhanyana wakwe wa mun’we, wa kwalomu ka 12 wa malembe, i wofa.
Laha Jesu a nga kari a famba, a zvitshungu zvi wo manyana laha kakwe.
43 Makunu ku wa hi ni wasati a nga hi ni mababyi yo huma nkhata+ hi 12 wa malembe, niku i hava a nga zvi kotile ku mu hanyisa.+
44 I no tshinela hi lendzhako a henya machakafula ya nguwo yakwe.+ Zvalezvo a nkhata wakwe wu no nyima ku huma.
45 Hikwalaho, Jesu i te: “Himani a nga ndzi henya?” Laha vontlhe va nga kaneta, Pedro i te: “Mugondzisi, a wu zvi woni zvitshungu lezvi zvi gunyanako laha ka wena ni ku ku manya?”+
46 Kanilezvi Jesu i te: “I kona a nga ndzi henya, hakuva ndza zvi tiva lezvaku ku humele ntamu ka mina.”+
47 Laha a wasati loye a nga wona lezvaku i polekile, i nota na a rurumela a tawa mahlweni kakwe, a wula mahlweni ka vanhu vontlhe leci ci nga mu maha a mu henya ni lezvi a nga hanyisiswa zvona ka cikhati caleco.
48 Kanilezvi i te ngalo kakwe: “N’wananga, a kukholwa ka wena ku ku hanyisile, famba hi kurula.”+
49 Na a ha wulawula, ku no chikela a muyimeli wa murangeli wa sinagoga, a taku: “A nhanyana wa wena i file; u nga ha mu karati Mugondzisi.”+
50 Laha Jesu a ngazwa lezvo, i no mu hlamula, aku: “U nga chavi, wena kholwa basi, a nhanyana wa wena i ta hanya.”+
51 A cikhati leci a nga chikela mutini, a nga tsikangi munhu a nghena naye lomu ndlwini. I no nghena na Pedro, na Johani, na Jakobe, ni papayi ni mamani wa nhanyana basi.
52 A vanhu vontlhe va wa kari va rila ni ku tiba zvifuva hi kota ya ku felwa. Hikwalaho, i te: “Miyelani ku rila,+ hakuva a nhanyana loyi a nga fangi, i no etlela.”+
53 Laha va ngazwa lezvo, va no mu hleka hakuva va wa zvi tiva lezvaku i file.
54 Kanilezvi i no khoma woko ga nhanyana, aku kakwe: “Nhanyana, vhuka!”+
55 A moya* wakwe+ wu no wuya a tekela ku vhuka.+ I no va laya lezvaku va mu nyika zvakuga.
56 A vapswali vakwe a va ti kotangi hi kutsaka, kanilezvi i no va laya lezvaku va nga byeli munhu lezvi zvi nga mahekile.+
Mitlhamuselo ya lahasi
^ Kutani: “Mariya wa le Magdhala”.
^ Kutani: “cirundzu”.
^ Kutani: “mabyandlati; mavimbi”.
^ Zvi nga maha na zvi wula ku: “Wu wa mu xanisile hi cikhati co leha”.
^ Kutani: “tinjema”.
^ Kutani: “ntamu wa wutomi”. Wona Tlhamuselo wa magezu ya Bhibhiliya.
