Malaki 1:1-14
1 Ciphrofeto:
Leyi i mhaka ya Jehovha ka Izrayeli, hi nomu wa Malaki:*
2 “Ndzi mu randzile”,+ ku wula Jehovha.
Kanilezvi n’wina mu ngalo: “U hi randzisile kuyini?”
“Kasi Esawu i wa nga hi makabye wa Jakobe ke?”,+ ku wula Jehovha. “Kanilezvi ndzi randzile Jakobe,
3 ndzi venga Esawu;+ a zvitsunga zvakwe ndzi zvi mahile ciwula,+ ni tshomba yakwe ndzi yi nyikele ka makhanga ya lomu ciwuleni.”+
4 “Hambu lezvi Edhomi, a nge: ‘Hi hahlulilwe, kanilezvi hi ta wuya hi ta aketa a marumbi’, Jehovha wa mabutho i ngalo: ‘Va ta aka, kanilezvi mina ndzi ta hahlula, va ta vitaniwa lezvaku “i tiko ga zvakubiha” ni “vanhu lava Jehovha a va konileko kala kupindzuka.”+
5 Mu ta zvi wona hi matihlo ya n’wina, mu tlhela muku: “I wa dhumisiwe Jehovha tikweni ga Izrayeli.”’”
6 “‘A n’wana i kombisa cichavo ka papayi wakwe,+ ni citiri ka n’winyi wa cona. Makunu loku mina ndzi hi papayi,+ ci kwihi a cichavo leci ci ndzi fanelako ke?+ Ni loku mina ndzi hi n’winyi,* ci kwihi cichavo leci ci ndzi fanelako ke?’, ku wula Jehovha wa mabutho ka n’wina vapristi, mu chepetako a vito ga mina.+
“‘Kanilezvi mu ngalo: “Hi gi chepetisile kuyini a vito ga wena?”’
7 “‘Hi ku nyikela zvakuga* zvi nyenyezisilweko laha alatini ga mina.’
“‘Mu ngalo: “Hi ku nyenyezisisile kuyini?”’
“‘Hi lezvi mu nge: “A meza ya Jehovha+ i nchumu wu faneleko ku chepetiwa.”
8 Loku mu maha muphahlo hi cihari cofa matihlo, mu ngalo: “A zvi bihangi.” Ni loku mu nyikela a cihari co limala ni leci ci babyako, mu ngalo: “A zvi bihangi.”’”+
“Hi nga ringisa ku zvi nyikela ka govhernadhori wa wena. I ta ku tsakela kutani ku ku amukela ke?”, ku wula Jehovha wa mabutho.
9 “Makunu, khongotelani Nungungulu kasi a hi mahela wuxinji. Na mu maha minyikelo yo kota leyo, i kona cikari ka n’wina a to mu amukela ke?”, ku wula Jehovha wa mabutho.
10 “Himani cikari ka n’wina a vhumelako ku vhala tivati?*+ Hakuva a mu lumeki ndzilo laha alatini ga mina loku mu nga hakheliwi.+ A ndzi xalali hi n’wina”, ku wula Jehovha wa mabutho, “ne a ndzi tsaki hi minyikelo ya mandla ya n’wina”.+
11 “Hakuva a vito ga mina gi tava ga hombe cikari ka matiko kusukela mutsuwuka-gambo kala mupela-gambo.*+ Ka matshamu wontlhe ku ta mahiwa miphahlo ni minyikelo vitweni ga mina, zviva munyikelo wu basileko; hakuva a vito ga mina gi tava ga hombe cikari ka matiko”,+ ku wula Jehovha wa mabutho.
12 “Kanilezvi n’wina ma gi nyenyezisa*+ hi ku wula lezvi: ‘A meza ya Jehovha yi nyenyezisilwe, niku a mihandzu ya kona, ni zvakuga zva kona, zvi fanele ku chepetiwa.’+
13 Mu tlhela muku: ‘A zvo ku karalisa!’ Mu tlhela mu chepeta”, ku wula Jehovha wa mabutho. “Mu neha zvihari zvo yiviwa, ni zvo limala, ni lezvi zvi babyako, ina, mu neha a zvilo lezvo kota cinyikiwo! Xana ndzi fanele ku zvi amukela canjeni ga n’wina ke?”,+ ku wula Jehovha.
14 “I rukatelwe a munhu wa mano, loyi a nga ni cihari ca cinene ca matsune lomu ntlhambini wakwe, kanilezvi a mahako cifungo a gumesa a maha muphahlo ka Jehovha hi cihari co soleka. Hakuva ndzi Hosi ya hombe”,+ ku wula Jehovha wa mabutho, “ni vito ga mina gi ta chaviwa cikari ka matiko”.+
Mitlhamuselo ya lahasi
^ Zvi wulako ku: “Cirun’wa ca mina”.
^ Kutani: “n’winyi wa hombe”.
^ Hi kukongoma: “pawa”.
^ Zvi wonekisa ku khwatsi ku wuliwa a ntiro wa ku vhala a tivati ta tempeli.
^ Kutani: “kusukela kutsuwukeni ka gambo kala kupeleni ka gona”.
^ Zvi nga maha na zvi wula ku: “ma ndzi nyenyezisa”.