Malaki 2:1-17
2 “Makunu n’wina vapristi, a cileletelo leci cita ka n’wina.+
2 Loku mu nga ci ingisi, ni loku mu nga ci veki timbilwini ta n’wina lezvaku mu dhumisa a vito ga mina”, ku wula Jehovha wa mabutho, “ndzi ta mu rumelela a ciruko,+ ndzi cica a zvikatekiso zva n’wina zviva zviruko.+ Kunene, ndzi cicile zvikatekiso zva n’wina zviva zviruko hakuva a mu cheli kota hi cileletelo leci”.
3 “Hi kota ya n’wina, ndzi ta wonha* timbewu ta n’wina+ leti mu byalileko, ndzi tlhela ndzi mu phatsekela swanyi lomu tinghoheni ta n’wina, a swanyi wa mibuzo ya n’wina; mu ta tekiwa muya kona.*
4 Makunu mu ta zvi tiva lezvaku ndzi mu nyikile a cileletelo leci, kasi a civhumelwano ca mina na Levhi ci simama”,+ ku wula Jehovha wa mabutho.
5 A civhumelwano ca mina naye civhumelwano ca wutomi ni kurula, leci ndzi mu nyikileko kasi a chava.* I ndzi chavile, a rurumela hi vito ga mina.
6 A nayo* wa lisine wu wa hi non’wini wakwe,+ ni kungalulami a ku kumiwangi non’wini wakwe. I fambile na mina hi kurula ni kululama,+ a hundzulusa votala kugoheni.
7 Hakuva a nomu wa mupristi wu fanele ku hlayisa wutivi, niku a vanhu va fanele ku hlota nayo* non’wini wakwe,+ hakuva yena cirun’wa ca Jehovha wa mabutho.
8 “Kanilezvi n’wina mu hambukile ndleleni. Mu khunguvanyisile votala mhakeni ya nayo.*+ Mu wonhile a civhumelwano ca Levhi”,+ ku wula Jehovha wa mabutho.
9 “Hikwalaho, ndzi ta mu maha mu nyenyiwa ni ku chepetiwa mahlweni ka vanhu vontlhe, hakuva a mu ingisangi tindlela ta mina, kanilezvi mu kombisile cihlawulela kutiriseni ka nayo.”+
10 “Kasi hontlheni a hi na papayi mun’we ke?+ A hi Nungungulu mun’we a nga hi vanga ke? Makunu hikuyini hi kanganyisanako,+ hi nyenyezisa a civhumelwano ca vakokwani va hina?
11 Judha i mahile wukanganyisi niku ku mahilwe cilo co nyenyeza lomu Izrayeli ni lomu Jerusalema; hakuva Judha i nyenyezisile a kubasa* ka Jehovha,+ loku Yena a ku randzako, a chadha ni nhanyana wa nungungulu wa matiko.+
12 Jehovha i ta tsema ni wihi a mahako lezvo matendeni ya Jakobe — hambu kova mani* — hambu loku a maha munyikelo ka Jehovha wa mabutho.”+
13 “Ku na ni cin’wani* mu mahako, ci mahako lezvaku a alati ga Jehovha gi tala hi mihloti, ni kurila, ni kutsikwila, laha ka kuza a nga ha cheli kota hi minyikelo ya n’wina kutani ku amukela hi litsako lezvi zvi tako hi canjeni ga n’wina.+
14 N’wina mu ngalo: ‘Hikuyini?’ Hi ku Jehovha i kustumunyu cikari ka wena ni sati wa wujaha ga wena, loyi u mu kanganyisileko, hambu lezvi a nga munghana wa wena ni sati wa wena hi civhumelwano.*+
15 Kanilezvi ku na ni mun’we a nga kala ku maha lezvo, hakuva i wa ha hi ni lezvi zvi seleko zva moya. Kona yaloyi wa mun’we i wa lava yini? A pswalo* wa Nungungulu. Hikwalaho, ti woneleni moyeni wa n’wina, mu nga kanganyisi a sati wa wujaha ga n’wina.
16 Hakuva ndza* venga a ku tlhatlha wukati”,*+ ku wula Jehovha, a Nungungulu wa Izrayeli, “ni loyi a fenengetako nguwo yakwe hi tihanyi”,* ku wula Jehovha wa mabutho. “Ti woneleni moyeni wa n’wina, mu nga kanganyisi.+
17 “Ma rera Jehovha hi magezu ya n’wina.+ Kanilezvi mu ngalo: ‘Hi mu rerisa kuyini?’ Hi ku wula ku: ‘Vontlhe lava va mahako zvakubiha va nene mahlweni ka Jehovha niku wa xalala hi vona’,+ kutani hi ku wula ku: ‘I kwihi a Nungungulu wa kululama?’”
Mitlhamuselo ya lahasi
^ Hi kukongoma: “kawuka”.
^ Ku nga wutshamu legi ku nga halatiwa a swanyi wa miphahlo.
^ Kutani: “ava ni cichavo”.
^ Kutani: “gondziselelo”.
^ Kutani: “gondziselelo”.
^ Zvi nga maha na zvi wula ku: “hi gondziselelo ya n’wina”.
^ Zvi nga maha na zvi wula ku: “wutshamu go basa”.
^ Hi kukongoma: “loyi a khindlimukileko ni loyi a hlamulako”.
^ Hi kukongoma: “ca wumbiri”.
^ Kutani: “hi nayo”.
^ Hi kukongoma: “mbewu”.
^ Hi kukongoma: “wa”.
^ Kutani: “divórcio”.
^ Kutani: “loyi a mahako tihanyi”.