Malaki 3:1-18
3 “Hi nga wonani! Ndza rumela a cirun’wa ca mina, ci ta basisa* ndlela mahlweni ka mina.+ Niku hi citshuketi, a Hosi ya lisine, leyi n’wina mu yi hlotako, yi tata tempeleni ya yona;+ ni cirun’wa ca civhumelwano, leci mu ci tsakelako, ci tata. Kunene ci tata”, ku wula Jehovha wa mabutho.
2 “Kanilezvi himani a to gi timisela a siku ga kuta kakwe, kona himani a to zvi kota ku yima loku yena a woneka? Hakuva i ta fana ni ndzilo wa munyekisi a tlhela a fana ni sabawu+ ya vahlazvi.
3 I ta tshama kota munyekisi ni mubasisi wa prata,+ niku i ta basisa vana va Levhi; i ta va hluta* a ku khwatsi i ouro ni prata. Hakunene va tava vanhu ka Jehovha lava va nyikelako a munyikelo hi kululama.
4 A munyikelo wa Judha ni wa Jerusalema hakunene wu ta tsakisa* Jehovha, a ku fana ni masikwini ma hundzileko ni malembeni ya kaleloko.+
5 “Ndzi ta tshinela ka n’wina kasi ndzi mu lamula. Ndzi ta hatlisa ndzi nyika wukustumunyu ga ku vhukela valoyi,+ ni zvibhayi, ni lava va hlambanyako mawunwa,+ ni lava va kalavelako mutiri a tholilweko,+ ni noni,* ni n’wanana a nga hava papayi,*+ ni lava va alako ku vhuna a muluveli.*+ Lava a va ndzi chavangi”, ku wula Jehovha wa mabutho.
6 “Hakuva hi mina Jehovha; a ndzi cici.*+ N’wina mu vana va Jakobe; a mu se lova.
7 Kusukela masikwini ya vakokwani va n’wina mu hambukile ka milayo ya mina, niku a mu yi hlayisangi.+ Wuyani ka mina, minawu ndzi ta wuya ka n’wina”,+ ku wula Jehovha wa mabutho.
Kanilezvi mu ngalo: “Hi ta wuyisa kuyini?”
8 “A munhu a nga yivela Nungungulu ke? Kanilezvi n’wina ma ndzi yivela.”
N’wina mu ngalo: “Hi ku yivelisa kuyini ke?”
“Ka zvawukhume ni ka minyikelo.
9 Hakunene mu rukatelwe hakuva ma ndzi yivela — ina, a tiko gontlhe gi maha lezvo.
10 Nehani zvontlhe zvawukhume lomu tshaleni,+ kasi kuva ni zvakuga lomu ndlwini ya mina;+ ndzi ringeni ka mhaka leyi”, ku wula Jehovha wa mabutho, “kasi mu wona ku ndzi nga ta mu vhululela a tinyangwa ta matilo+ ndzi mu chululela makatekwa kala mu nga ha vhumali nchumu ke.”+
11 “Ndzi ta kawuka loyi a mu khadamulako,* a nga ta wonha mihandzu ya tiko ga n’wina, ne hambu a zvivhina* zva n’wina zvi nga ta tsika ku pswala mihandzu”,+ ku wula Jehovha wa mabutho.
12 “A matiko wontlhe ma ta wula ku mu tsakile,+ hakuva mu tava tiko ga litsako”, ku wula Jehovha wa mabutho.
13 “A magezu ya n’wina ya ku ndzi vhukela mave ya ntamu”, ku wula Jehovha.
N’wina mu ngalo: “Zvini hi nga wula zva ku ku vhukela?”+
14 “Mu ngalo: ‘A zvi vhuni nchumu a ku tirela Nungungulu.+ Zvi hi vhuna yini a ku hlayisa zvileletelo zvakwe ni ku famba na hi tsuvile mahlweni ka Jehovha wa mabutho ke?
15 Zvezvi hi ngalo a vamatshandza va tsaka. Ni lava va mahako zvakubiha va humelela.+ Va xinyata va ringa Nungungulu va tlhela va pona.’”
16 Makunu lava va nga chava Jehovha va wa wulawula mun’we ka mun’wani, loyi ni loyi ni muakelani wakwe, niku Jehovha i wa demba ndleve a ingisela. Ku no tsaliwa bhuku ga cialakanyiso mahlweni kakwe+ ga lava va chavako Jehovha ni lava va ehleketako hi* vito gakwe.+
17 “Va tava vanhu va mina”,+ ku wula Jehovha wa mabutho, “ka siku legi ndzi to maha a tshomba ya lisima.+ Ndzi ta va zwela wusiwana a ku fana ni munhu a zwelako wusiwana a n’wana wakwe loyi a mu tirelako.+
18 Mu ta tlhela mu wona kuhambana cikari ka munhu wa kululama ni munhu wa kubiha,+ ni cikari ka loyi a tirelako Nungungulu ni loyi a nga mu tireliko.”
Mitlhamuselo ya lahasi
^ Kutani: “longisela”.
^ Kutani: “basisa”.
^ Kutani: “xalalisa”.
^ Kutani: “va alelako a muluveli a tifanelo takwe”.
^ Kutani: “a felweko hi vapswali”.
^ Kutani: “wasati wo felwa hi nuna”.
^ Kutani: “a ndzi cicangi”.
^ Zvi nga maha na ku wuliwa a mitungu ya zvidodwani.
^ A zvivhina masimu ya tisinya leti ti pswalako mauvha.
^ Kutani: “pimisako”. Zvi nga maha na zvi wula ku: “gi nyikako lisima a”.
