Hi kutsala ka Marku 10:1-52
-
A kuchadha ni kutlhatlha wukati (1-12)
-
Jesu a katekisa vanana (13-16)
-
Ciwutiso ca wanuna wo ganya (17-25)
-
A kutikarata hi kota ya Mufumo (26-31)
-
Jesu a phrofeta kambe hi kufa kakwe (32-34)
-
Cikombelo ca Jakobe na Johani (35-45)
-
Jesu i hakhelo ya ku tlhatlhisa votala (45)
-
-
Bhartimewusi loyi wa cikhumu a hanyiswa (46-52)
10 I no suka hi laho a tlhatuka Jordhani aya mimbhinganweni ya Judhiya. A zvitshungu zvi no hlengeletana kakwe kambe. I no sangula ku va gondzisa kambe kota lezvi a nga tolovela ku maha.+
2 A vaFarisi va no tshinela kakwe na va lava ku mu ringa, va mu wutisa ku zva vhumelelwa hi nayo ku a wanuna a tlhatlha wukati* ni sati+ wakwe ke.
3 I no va hlamula, aku: “Zvini lezvi Mosi a nga mu laya?”
4 Vaku: “Mosi i vhumelele ku a wanuna a mu tsalela papilo ga ku tlhatlha wukati* a tlhela a mu hlongola.”+
5 Kanilezvi Jesu aku kabye: “I mu tsalele a cileletelo leci+ hi kota ya kunonoha ka timbilu ta n’wina.+
6 Kanilezvi kusanguleni ka kuvanga, ‘I no maha wanuna ni wasati.+
7 Hi cigelo leco, a wanuna i ta siya papayi wakwe ni mamani wakwe,+
8 lava vambiri va tava nyama yin’we’;+ makunu a va ha hi vambiri, kanilezvi i nyama yin’we.
9 Hikwalaho, lezvi Nungungulu a zvi tlhanganisileko, zvi nga hambanisiwi hi munhu.”+
10 A cikhati leci va nga nghena kambe lomu ndlwini, a vapizani va no mu wutisa hi mhaka leyi.
11 Aku kabye: “Ni wihi loyi a tlhatlhako wukati* ni sati wakwe a chadha ni mun’wani wa maha wubhayi+ niku i wonhela sati wakwe,
12 ni loku a wasati loyi a tlhatlhileko wukati* ni nuna wakwe a tshuka a chadha ni mun’wani, wa maha wubhayi.”+
13 A vanhu va no mu tela ni vanana kasi a ta va henya, kanilezvi a vapizani va no va bhongela.+
14 Loku Jesu a wonile lezvo i no swireka, aku kabye: “Tsikani vanana vata ka mina, mu nga va beteli, hakuva a Mufumo wa Nungungulu wu lumba vanhu vo kota vona.+
15 Ndza tiyisa ka n’wina, ndziku: Ni wihi loyi a nga amukeliko a Mufumo wa Nungungulu a ku khwatsi i n’wanana, a nga ta tshuka a nghena ka wona.”+
16 I no teka vanana a va angarela ni ku va katekisa, a va tlhateka mandla.+
17 Laha a nga huma a goxometa ndlela, a wanuna wo kari i no tsutsuma ata kakwe a ta mu khizamela, a mu wutisa, aku: “Mugondzisi wa Munene, zvini ndzi faneleko ku maha kasi ndziga tshomba ya wutomi ga pindzukelwa?”+
18 Jesu aku kakwe: “Hikuyini u ndzi vitanako wa munene? A ku na munhu wa munene saseka mun’we basi, ku nga Nungungulu.+
19 Wa yi tiva a milayo leyi yaku: ‘U nga dayi,+ u nga mahi wubhayi,+ u nga yivi,+ u nga nyiki wukustumunyu ga mawunwa,+ u nga kalaveli,+ kombisa cichavo ka papayi wa wena ni ka mamani wa wena.’”+
20 I no mu hlamula, aku: “Mugondzisi, ndza maha zvontlhe lezvo kusukela wun’wananeni ga mina.”
21 Jesu i no mu cuwuka a mu randza, aku kakwe: “Wa ha kiyelelwa hi nchumu wun’we: Famba u ya xavisa lezvi u nga nazvo u teka mali ya kona u nyika zvisiwana, u tava ni tshomba tilweni. Andzhako ka lezvo, tana u ta maha mulandzeli wa mina.”+
22 Kanilezvi i no swireka hi hlamulo lowo, a suka a famba na a bayisekile, hakuva i wa ganyile nguvhu.+
23 Loku Jesu a cuwukile matlhelweni, i te ngalo ka vapizani vakwe: “Zvi ta karata nguvhu ka lava va nga ni mali a ku nghena Mufun’weni wa Nungungulu!”+
24 Kanilezvi a vapizani va no hlamaliswa hi magezu yakwe. Makunu Jesu i no hlamula, aku: “Vana vanga, a zvo ku karata ku nghena Mufun’weni wa Nungungulu!
25 Zva olova ku a kameli gi hundza hi laha non’wini wa chingani a ku hundza ku a munhu wo ganya a nghena Mufun’weni wa Nungungulu.”+
26 Va no engetela ku hlamala, vaku kakwe:* “Himani wa ku a nga ponisiwa?”+
27 Jesu i no va cuwuka tinghoheni tabye, aku: “Ka vanhu a zvi koteki, kanilezvi a zvi tsandzi ka Nungungulu, hakuva ka Nungungulu a zvilo zvontlhe zva koteka.”+
28 Pedro aku kakwe: “Hi siyile zvilo zvontlhe hi ku landzela.”+
29 Jesu aku: “Ndza tiyisa ka n’wina, ndziku: A ku na munhu a siyileko yindlu, kutani vamakabye, kutani mamani, kutani papayi, kutani vana, kutani mipetso hi kota ya mina ni mahungu ya manene+
30 a to kala ku amukela zvilo lezvo hi ka 100 ni ku hundza ka cikhati leci — a tiyindlu, ni vamakabye, ni vamamani, ni vana, ni mipetso, na a kumana ni tixanisa+ — ni wutomi ga pindzukelwa cikhatini ci tako.*
31 Kanilezvi a kutala ka lava va nga vo sangula va ta maha vo gumesa, niku lava vo gumesa va ta maha vo sangula.”+
32 Va wa kari va famba hi ruwa, na va kandziha vaya Jerusalema, Jesu na a rangile phambeni kabye, niku a vapizani va wa hlamala nguvhu; kanilezvi lava va nga va landzela va no sangula ku chava. Ka khati legi kambe, i no koka lava va 12 hi tlhelo a sangula ku va byela zvilo lezvi zvi nga lava ku mu humelela,+ aku:
33 “Ma zvi wona! Hiya Jerusalema. A N’wana wa munhu i ta nyikelwa mandleni ya vapristi lava va tihosana ni vatsali. Va ta mu konela ku dawa, va mu nyikela ka vamatiko,
34 va ta mu poyila, va mu phelela ni ku muba va gumesa va mu daya. Kanilezvi andzhako ka masiku manharu i ta vhuka.”+
35 Jakobe na Johani, a vana va Zebhedhi,+ va no tshinela kakwe, vaku: “Mugondzisi, hi lava ku u hi mahela ni cihi hi to ku kombela.”+
36 Aku kabye: “Mu lava ku ndzi mu mahela yini?”
37 Vaku: “Hi vhumelele ku tshama kungangameleni ka wena, a mun’we reveni ga wena ga cinene ni mun’wani reveni ga wena ga cibhabha.”+
38 Kanilezvi Jesu i te ngalo kabye: “A mu ci tivi leci mu ci kombelako. Mu nganwa a kopo leyi ndzi nwako kutani ku bhabhatiswa hi kubhabhatiswa loku ndzi bhabhatiswako hi kona ke?”+
39 Vaku kakwe: “Ina.” Jesu aku kabye: “A kopo leyi ndzi nwako n’winawu mu tanwa, ni kubhabhatiswa loku ndzi bhabhatiswako hi kona n’winawu mu ta bhabhatiswa hi kona.+
40 Hambulezvo, a zvi lumbi mina a ku mu vhumelela lezvaku mu tshama reveni ga mina ga cinene kutani ga cibhabha. A matshamu lawo ma lumba lava va longiselelweko wona.”
41 A cikhati leci lava van’wani va 10 va nga zvizwa, va no zangarela Jakobe na Johani.+
42 Kanilezvi Jesu i no va vitana vata kakwe, aku kabye: “Ma zvi tiva lezvaku lava va nge khwatsi* tihosi ta matiko va bindzisela lava va va fumelako, niku a vahombe vabye a va va nyenyeleti.+
43 N’wina mu nga mahisi lezvo; kanilezvi ni wihi loyi a lavako kuva wahombe cikari ka n’wina i fanele kuva citiri ca n’wina,*+
44 ni loyi a lavako kuva wo sangula cikari ka n’wina i fanele kuva khumbi ya vontlhe.
45 Hakuva hambu a N’wana wa munhu a nga telangi ku ta tirelwa, kanilezvi a ku ta tirela+ ni ku nyikela wutomi* gakwe kota hakhelo ya ku tlhatlhisa votala.”+
46 Makunu va no chikela Jeriko. Kanilezvi a cikhati leci Jesu ni vapizani vakwe ni citshungu ca hombe va nga kari va huma lomu Jeriko, Bhartimewusi, (a n’wana wa Timewusi) a nga hi mukombeli wa zomola wa cikhumu, i wa tshamile mbhirini ya ruwa.+
47 Laha a ngazwa lezvaku hi Jesu wa le Nazareta, i no sangula ku banguleka, aku: “Jesu, N’wana wa Dhavhidha,+ ndzi mahele wuxinji!”+
48 Hikwalaho, a votala va no mu kawuka vaku i wa miyele, kanilezvi yena i no engeta a vitana hi gezu ga hombe nguvhu, aku: “N’wana wa Dhavhidha, ndzi mahele wuxinji!”
49 Hikwalaho, Jesu i no nyima, aku: “Mu vitaneni ata ka mina.” Va no vitana wanuna loyi wa cikhumu, vaku kakwe: “Tiya hlanha! Suka u yima, wa ku vitana.”
50 I no hoxa bhaji gakwe, a ku kakatsuko aya ka Jesu.
51 Jesu aku kakwe: “U lava ku ndzi ku mahela yini?” A wanuna loyi wa cikhumu, aku kakwe: “Raboni,* ndzi tlhelisele a kuwona ka mina.”
52 Jesu aku kakwe: “Famba. A kukholwa ka wena ku ku hanyisile.”+ Zvalezvo i no tlhela a wona,+ a sangula ku mu landzela ruweni.
Mitlhamuselo ya lahasi
^ Kutani: “a maha divórcio”.
^ Kutani: “divórcio”.
^ Kutani: “a mahako divórcio”.
^ Kutani: “a mahileko divórcio”.
^ Zvi nga maha na zvi wula ku: “vaku ka mun’we ni mun’wani”.
^ Kutani: “ka nguva yi tako.” Wona Tlhamuselo wa magezu ya Bhibhiliya.
^ Kutani: “lava va tiviwako ku”.
^ Kutani: “nandza ga n’wina”.
^ Kutani: “muhefemulo”.
^ Zvi wulako ku: “Mugondzisi”.
