Hi kutsala ka Marku 11:1-33
11 Makunu a cikhati leci va nga tshinela Jerusalema, na va hi kusuhani ni Bhetfaje ni Bhetaniya,+ Citsungeni ca maOlivha, i no ruma vapizani vambiri,+
2 aku kabye: “Fambani cidhoropaneni leci ci nga mahlweni ka n’wina; zvalezvi mu to nghena, mu ta ya kuma a cimbongolana na ci bohilwe ca ku a ci se khilelwa hi munhu. Ci tlhatlheni muta naco.
3 Loku a wokari aku: ‘Zvini mu mahako?’ Muku: ‘A Hosi ya ci lava, yi ta ci tlhelisa zvalezvi.’”
4 Hikwalaho, va no famba, va ya kuma cimbongolana na ci bohilwe laha livatini hi le handle, mbhirini ya ruwa, va ci tlhatlha.+
5 Kanilezvi a vokari va nga yimile laho va te ngalo kabye: “Mu ci tlhatlhela yini a cimbongolana?”
6 Va no va byela zvalezvi Jesu a nga va byelile; va se va tsika va famba.
7 Va no wuya ni cimbongolana+ ka Jesu, va ta tlhateka tinguwo tabye hehla ka cona, a khilela.+
8 A vanhu vo tala va no andlalela tinguwo tabye laha ruweni, ni van’wani kambe va no nghena lomu mafusini va tshova mahlavhu.+
9 Lava va nga rangile ni lava va ngata hi le ndzhako va wa huwelela, vaku: “Nungungulu, ha ku kombela, mu hlayise!+ I katekile loyi a tako vitweni ga Jehovha!*+
10 Wu katekile a Mufumo lowu wu tako wa papayi wa hina Dhavhidha!+ Nungungulu, ha ku kombela, mu hlayise, wena Loyi u nga le hehla matilweni!”
11 I no nghena Jerusalema, aya tempeleni niku i no cuwuka zvontlhe matlhelweni, kanilezvi kota lezvi a gambo gi nga jikile, i no huma aya Bhetaniya zvin’we ni lava va 12.+
12 Hi mandziko wa kona, na va suka hi Bhetaniya, i nozwa ndlala.+
13 Na a hi kulenyana i no wona nkuwu wu nga hi ni matluka a wu yela kasi ku ya wona ku a nga kuma nchumu ka wona ke. Kanilezvi loku a chikele, a nga kumangi nchumu saseka matluka basi, hakuva ku wa nga hi nguva ya makuwu.
14 Hikwalaho, i te ngalo ka wona: “Ku nga havi ni munhu a toga mihandzu ya wena kambe.”+ A vapizani vakwe va wa zvizwa.
15 Makunu va no chikela Jerusalema. Kwaseyo, i no nghena tempeleni a hlongola lava va nga kari va xavisa ni ku xava lomu tempeleni, a khubhunyeta timeza ta vacicisi va mali ni zvitulo zva vaxavisi va zvipomba;+
16 i wa nga tsiki munhu a tsemakanya ni zvibya hi lomu tempeleni.
17 I wa va gondzisa ni ku va byela, aku: “A mu zvi tivi lezvaku ku tsalilwe ku: ‘A yindlu ya mina yi ta vitaniwa ku i yindlu ya mukhongelo ya matiko wontlhe ke’?+ Kanilezvi n’wina mu yi maha mhako ya vaphangi.”+
18 A vapristi lava va tihosana ni vatsali va no zvizwa; hikwalaho va no sangula ku hlota ndlela ya ku mu daya;+ hakuva va wa mu chava hi lezvi a citshungu contlhe ci nga hlamaliswa hi magondzisela yakwe.+
19 Loku gi pelile, va no huma lomu dhoropeni.
20 Kanilezvi laha va nga kari va hundza ni mixo nguvhu, va no wona lezvaku a nkuwu wu womile kusukela timitswini.+
21 Pedro i no zvi alakanya, aku kakwe: “Rabi, hi nga wona! A nkuwu lowu u nga wu ruka wu womile.”+
22 Jesu i no hlamula, aku kabye: “Kholwani ka Nungungulu.
23 Ndza tiyisa ka n’wina, ndziku: Ni wihi a to byela citsunga leci, aku: ‘Kunuka u ya ti hoxa bimbini’, na a nga kanakani mbilwini yakwe kanilezvi a kholwa lezvaku lezvi a zvi wulileko zvi ta maheka, zvi ta maheka.+
24 Hikwalaho, ndza mu byela, ndziku: Zvontlhe lezvi mu zvi kombelako hi mukhongelo, kholwani lezvaku mu zvi amukele, mu tava nazvo.+
25 Ni loku mu yima mu khongela, tsetselelani ni cihi cisolo mu nga naco ni munhu kasi a Papayi wa n’wina loyi a nga matilweni a fela ku mu tsetselelawu a zvihambunyeto zva n’wina.”+
26 *——
27 Va noya kambe Jerusalema. Laha a nga kari a fambafamba lomu tempeleni, a vapristi lava va tihosana ni vatsali ni madhota va nota kakwe
28 va taku: “I ntamu muni u mahako hi wona zvilo lezvi? Kona himani a nga ku nyika a ntamu wa ku maha zvilo lezvi?”+
29 Jesu aku kabye: “Minawu ndzi ta mu wutisa ciwutiso cin’we. Loku mu ndzi hlamula, minawu ndzi ta mu byela a ku i ntamu muni ndzi mahako hi wona a zvilo lezvi.
30 A kubhabhatisa ka Johani+ ku wata hi le tilweni kutani hi ka vanhu? Ndzi hlamuleni.”+
31 Va no sangula ku wulawulisana cikari kabye, vaku: “Loku hiku: ‘Ku wata hi le tilweni’, i taku: ‘Hikuyini mu nga kala ku kholwa kakwe ke?’
32 Kanilezvi, hi xinyata hiku: ‘Ku wata hi ka vanhu’?” Va wa chava citshungu, hakuva vontlhe va wa kholwa lezvaku Johani muphrofeti.+
33 Hikwalaho, va no hlamula Jesu, vaku: “A hi zvi tivi.” Jesu aku kabye: “Minawu ndzi nga ta mu byela a ku i ntamu muni ndzi mahako hi wona a zvilo lezvi.”