Hi kutsala ka Marku 12:1-44
12 Makunu i no sangula ku wulawula navo hi mifananiso, aku: “A wanuna wo kari i no byala civhina,*+ a ci bhiyela, a kehla cigowolo co kamela vhinyo a tlhela a aka likhokhola;*+ andzhako ka lezvo, i no ci nyikela ka varimi, yena a endza aya tikweni gin’wani.+
2 Hi nguva ya mihandzu, i no ruma a citiri ciya ka varimi lezvaku ci ya teka mihandzu yo kari ya civhina.
3 Kanilezvi a varimi va no ci khoma vaba, va ci tlhelisa na ci nga hi na nchumu.
4 I no va rumelela cin’wani citiri; leci conawu va no ciba laha ka hloko va ci wisa tingana.+
5 I no rumela cin’wani citiri, va khoma va daya, ni zvin’wani zvo tala, lezvi a zvokari va ngaba, a zvin’wani va daya.
6 I wa ha hi ni cin’wani, ku nga n’wana a randzekako.+ Hi kugumesa, i no va rumelela yena, na aku: ‘Va ta chava n’wana wa mina.’
7 Kanilezvi a varimi lavo va no byelana, vaku: ‘Loyi hi yena mugi wa tshomba.+ A hi mu dayeni hi fela ku sala ni tshomba.’
8 Hikwalaho, va no mu khoma va daya, va mu hoxa lahandle ka civhina.+
9 A n’winyi wa civhina i ta kuyini ke? I tata a ta daya varimi lavo a gumesa a nyikela civhina ka van’wani varimi.+
10 A mu se tshuka mu gondza a mutsalo lowu wu nge: ‘A ribye legi gi nga aliwa hi vaaki give gona ribye ga laha khoneni ga lisima ka wontlhe.*+
11 Lezvi zvita hi ka Jehovha,* niku zvi sasekile nguvhu matihlweni ya hina’?”+
12 Hi kota ya lezvo, va no lava ku mu khoma, hakuva va no zvi pola lezvaku i hlawutele a mufananiso lowo na a wula vona, kanilezvi va wa chava citshungu. Hikwalaho, va no mu tsika va famba.+
13 Andzhako ka lezvo, va no rumela kakwe a vaFarisi vo kari ni valandzeli va Herodhi kasi va ya mu phasa kuwulawuleni kakwe.+
14 Loku va chikele, va te ngalo kakwe: “Mugondzisi, ha zvi tiva lezvaku u wulawula lisine, niku a wu lavi ku dzundziwa hi munhu hakuva a wuyi hi nghohe ya munhu, kanilezvi u gondzisa a ndlela ya Nungungulu hi lisine. Zva vhumelelwa hi nayo* a ku humesa khupo ka Khezari kutani a zvi vhumelelwi?
15 Hi humesa kutani hi nga humesi?” Na a tiva wukanganyisi gabye, i te ngalo kabye: “Mu ndzi ringela yini? Ndzi teleni ni dhenario* ndzi ta yi wona.”
16 Va no mu tela ni yin’we, a va wutisa ku: “A mufananiso lowu ni mutsalo wa kona zva mani?” Vaku: “Zva Khezari.”
17 Jesu aku: “Tlhelisani ka Khezari lezvi zvi nga zva Khezari,+ kanilezvi ka Nungungulu lezvi zvi nga zva Nungungulu.”+ Va no hlamala nguvhu.
18 Makunu a vaSadhusi, lava va nge a ku na kuvhuka ka vafileko,+ va nota va ta mu wutisa,+ vaku:
19 “Mugondzisi, Mosi i hi tsalele lezvaku loku a makabye wa wokari afa a siya sati kanilezvi a nga siyi n’wana, a makabye wakwe i wa hlambele* sati wa matsuva kasi a mu pswalela vana a makabye wakwe.+
20 Ku wa hi ni 7 wa vavanuna va ka makabye. Loyi wa nhondzo i no teka sati, kanilezvi i nofa na a nga siyangi n’wana.
21 Loyi wa wumbiri i no chadha ni wasati loye, kanilezvi yenawu i nofa na a nga siyangi n’wana, zvi mahisa lezvo ni ka wa wunharu.
22 Vontlhe va 7 va nofa na va nga siyangi vana. Hi magumo a wasati yenawu i nofa.
23 Kuvhukeni ka vafileko, i tava sati wa mani? Hakuva ive sati wa vontlhe va 7.”
24 Jesu aku kabye: “A mu no lahleka hi lezvi mu nga yi tiviko Mitsalo ne ntamu wa Nungungulu ke?+
25 Hakuva a cikhati leci va to vhuka hi ka vafileko, ne vavanuna, ne vavasati a va chadhi, kanilezvi va fana ni tingilozi le matilweni.+
26 Kanilezvi hi kuwulawula hi kuvhuka ka vafileko, a mu gondzangi bhukwini ga Mosi, ka matimu ma wulawulako hi khuhu ga mimizwa, a ku Nungungulu i te ngalo kakwe: ‘Ndzi Nungungulu wa Abrahama, ni Nungungulu wa Isaka, ni Nungungulu wa Jakobe’?+
27 Yena a hi Nungungulu wa vafileko, kanilezvi wa vahanyako. Mu lahlekile nguvhu.”+
28 A mun’we wa vatsali, a nga tshinele kusuhani a vazwa na va wutisana, laha a nga wona lezvaku i va hlamulile khwatsi, i no mu wutisa, aku: “Hi wihi a nayo wo ranga* ka yontlhe?”+
29 Jesu i no hlamula, aku: “A wo ranga hi lowu wu nge: ‘Ingisa, wena Izrayeli: Jehovha,* a Nungungulu wa hina, i Jehovha* mun’we.
30 Randza Jehovha,* a Nungungulu wa wena, hi mbilu ya wena yontlhe, ni muhefemulo* wa wena wontlhe, ni kupima ka wena kontlhe, ni ntamu wa wena wontlhe.’+
31 A wa wumbiri hi lowu: ‘Randza muakelani wa wena a ku fana ni lezvi u ti randzisako zvona.’+ A ku na wun’wani nayo wa hombe ku hundza leyi.”
32 A mutsali aku kakwe: “Mugondzisi, u wulile lisine. ‘Nungungulu Mun’we, a ku na mun’wani ahandle ka yena’.+
33 A ku mu randza hi mbilu yontlhe ni kupima kontlhe ni ntamu wontlhe ni ku randza muakelani a ku fana ni lezvi u ti randzisako zvona, zva hundza nguvhu a minyikelo yontlhe ya kuhiswa ya murumba ni miphahlo.”+
34 Laha Jesu a nga wona lezvaku i hlamulile khwatsi, i te ngalo kakwe: “A wu kule ni Mufumo wa Nungungulu.” Kanilezvi a ka ha vangi ni munhu a nga tiya ku mu wutisa nchumu.+
35 Hambulezvo, na a ha simama ku gondzisa lomu tempeleni, Jesu i te: “Hikuyini a vatsali va nge Kristu i n’wana wa Dhavhidha?+
36 Na a pimiselwa hi moya wo basa,+ Dhavhidha i wulile ha yece, aku: ‘Jehovha* i te ngalo ka Hosi ya mina: “Tshama reveni ga mina ga cinene kala ndzi veka valala va wena lahasi ka mikondzo ya wena.”’+
37 Dhavhidha i mu vitana ku i Hosi, makunu zvi mahisa kuyini ku tlhela ava n’wana wakwe ke?”+
A citshungu ca hombe ci wa kari ci mu ingisela na ci tsakile.
38 I no simama ku va gondzisa, aku: “Ti woneleni ka vatsali, lava va randzako ku fambafamba na va bohile tinguwo to leha ni ku losiwa lomu ko tala vanhu*+
39 ni zvitulo zva le phambeni* lomu masinagogeni ni matshamu yo hlawuleka lomu mibuzweni.+
40 Va phanga tiyindlu* ta tinoni* ni ku maha mikhongelo yo leha kasi ku woniwa* hi vanhu. A vanhu lava va ta lamuliwa hi ndlela yo bayisa nguvhu.”*
41 I no tshama hi laha zvi nga koteka ku a wona makaxa ya minyikelo,*+ a sangula ku wona lezvi a citshungu ci nga chelisa zvona mali makaxeni ya minyikelo. A vanhu vo tala vo ganya va wa chela zvingerengere zvo tala.+
42 Makunu ku nota a noni* ya cisiwana yi ta chela zvingerengere zvimbiri zva ntsengo wa wutsongwani nguvhu.*+
43 Hikwalaho, i no vitana vapizani vakwe, aku kabye: “Ndza tiyisa ka n’wina, ndziku: A noni leyi ya cisiwana yi chelile zvotala a ku hundza vontlhe lava van’wani va chelako mali makaxeni ya minyikelo.+
44 Hakuva vontlhe va no chela lezvi zvi nga va salela, kanilezvi a noni leyi, ka wusiwana ga yona, yi chelile zvontlhe yi nga hi nazvo, zvontlhe lezvi yi nga wa ta hanya hi zvona.”+
Mitlhamuselo ya lahasi
^ Kutani: “torre”.
^ A civhina i simu ga tisinya leti ti pswalako mauvha.
^ Hi kukongoma: “hloko ya magumo”. A ribye legi gi wa vekiwa laha khoneni ku tlhanganako makhurisi mambiri kasi ku ma tiyisa.
^ Kutani: “Zvi lulamile”.
^ Kutani: “teke”.
^ Kutani: “wa lisima nguvhu”.
^ Kutani: “lomu mamerkadho”.
^ Kutani: “zva zvinene nguvhu”.
^ Kutani: “zvilo zva”.
^ Kutani: “vavasati vo felwa hi vanuna”.
^ Kutani: “hlamaliwa”.
^ Kutani: “hi ndlela ya xapi”.
^ A makaxa lawo ya minyikelo ma wa hi ya matshamela yo hambanahambana. A yokari ma wa fana ni mimpundzu.
^ Kutani: “wasati wo felwa hi nuna”.
