Hi kutsala ka Marku 13:1-37
13 Laha a nga kari a huma hi lomu tempeleni, a mun’we wa vapizani vakwe i te ngalo kakwe: “Mugondzisi, hi nga wona a kusaseka ka maribye lawa ni tiyindlu ta kona!”+
2 Kanilezvi Jesu i te ngalo kakwe: “Wa ti wona a tiyindlu leti ta hombe ke? Laha ku nga ta siyiwa a ribye gin’we hehla ka gin’wani, legi gi to kala gi nga khungumulwi.”+
3 Na a tshamile Citsungeni ca maOlivha a cuwukana ni tempeli, Pedro, na Jakobe, na Johani, na Andrewu, va no mu wutisa na va hi voce, vaku:
4 “Hi nga hi byela: Kasi a zvilo lezvi zvi ta maheka rini? Kona ci tava cihi a cikombiso ca lezvaku ci chikele cikhati ca kutatiseka ka zvontlhe lezvi?”+
5 Jesu i no sangula ku va byela, aku: “Ti woneleni kasi mu nga hambukisiwi hi munhu.+
6 A votala va tata hi vito ga mina, va taku: ‘Hi mina yena’, va hambukisa votala.
7 Ahandle ka lezvo, laha mu to vazwa na va wulawula hi tiyimpi ni mahungu ya tiyimpi, mu nga dzuki; a zvilo lezvi zvi fanele ku maheka, kanilezvi a hi kona kugumesa.+
8 “Hakuva a tiko gi ta vhukela tiko, ni mufumo wu vhukela mufumo;+ ku tava ni kutsekatseka ka misava ka matshamu yo hambanahambana, ni tindlala kambe.+ A zvilo lezvi masangulo ntsena ya kuxaniseka.+
9 “Kanilezvi n’wina ti woneleni. A vanhu va ta mu nyikela madhoteni,+ mu biwa masinagogeni,+ va mu yisa ka vagovhernadhori ni ka tihosi hi kota ya mina kasi mu kustumunya ka vona.+
10 Ahandle ka lezvo, a mahungu ya manene ma fanele ku ranga ma chumayelwa ka matiko wontlhe.+
11 A cikhati leci va to mu khoma kasi ku mu nyikela, mu nga rangi mu karateka muku hi ta wula yini; kanilezvi ni cihi mu to nyikwa ku wula ka cikhati caleco ci wuleni, hakuva a hi n’wina mu wulawulako kanilezvi i moya wo basa.+
12 A ku tsika lezvo, a makabye i ta nyikela a makabye wakwe kasi a dawa, a papayi a nyikela n’wana, ni vana va vhukela vapswali vabye va va dayisa.+
13 Mu ta vengiwa hi vanhu vontlhe hi kota ya vito ga mina.+ Kanilezvi loyi a timiselako kala magumo+ hi yena a to ponisiwa.+
14 “Kanilezvi, loku mu wona a cilo co nyenyeza ci hahlulako+ na ci yimile laha ci nga faneliko (a muleri i wa tirise kupimisisa), makunu lava va nga Judhiya a va tsutsumele zvitsungeni.+
15 Loyi a nga hehla ka yindlu a nga chiki ne a nga ngheni kasi ku teka nchumu lomu ndlwini yakwe;
16 ni loyi a nga masin’wini a nga tlheleli zvilo lezvi a zvi siyileko, a ya teka bhaji gakwe.
17 Khombo ka vavasati lava va to ngha va hi ni tinyimba ni lava va to ngha va an’wisa ka masiku lawo!+
18 Simamani ku khongelela lezvaku a zvilo lezvo zvi nga maheki hi nguva ya cirami;
19 hakuva a masiku lawo ma tava masiku ya kuxaniseka+ ka ku a ku se tshuka ku humelela, kusukela kusanguleni ka kuvangiwa ka zvilo lezvi Nungungulu a nga zvi vanga kala ka cikhati leco, niku ku nga ta ha humelela kambe.+
20 Kunene, loku Jehovha* i wa nga komisangi a masiku lawo, i hava a nga wa ta pona. Kanilezvi hi kota ya vahlawulilweko lava a va hlawulileko, i komisile masiku lawo.+
21 “Makunu loku a wokari aku ka n’wina: ‘Hi loyi Kristu!’, kutani ku: ‘Hi gaya!’, mu nga kholwi.+
22 Hakuva ku ta humelela vaKristu va mawunwa ni vaphrofeti va mawunwa+ va maha zviwoniso ni zvihlamaliso kasi va hambukisa a vahlawulilweko, loku zvi koteka.
23 Makunu n’wina, rindzelani.+ Ndzi mu byelile a zvilo lezvi zvontlhe na zvi nga se maheka.
24 “Kanilezvi masikwini lawo, andzhako ka kuxaniseka loko, a gambo gi ta pfhupeliswa, ni hweti yi nga ta woninga;+
25 a tinyeleti ti tawa hi le tilweni, ni mintamu yi nga le tilweni yi ta tsekatsekiswa.
26 Makunu va ta wona a N’wana wa munhu+ na ata hi marefu na a hi ni ntamu wa hombe ni kungangamela.+
27 Hi kulandzela, i ta ruma tingilozi takwe lezvaku ti ya hlengeleta a vahlawulilweko vakwe ka mune wa matlhelo ya misava,* kusukela magemeta-musi ya misava kala magemeta-musi ya tilo.+
28 “Gondzani ka mufananiso lowu wa nkuwu: Neti a zvidhavana zva wona zvi nyuka zvi hluka matluka, ma zvi tiva lezvaku a cimumu ci laha kusuhani.+
29 Na n’winawu, loku mu wona a zvilo lezvi na zvi maheka, zvi tiveni lezvaku a N’wana wa munhu i laha kusuhani, kwalaha tinyangweni.+
30 Ndza tiyisa ka n’wina, ndziku: A cizukulwana leci ci nga ta hundza na zvi nga se maheka zvontlhe a zvilo lezvi.+
31 A tilo ni misava zvi ta hundza,+ kanilezvi a timhaka ta mina ti nga ta hundza.+
32 “Xungetano hi siku lego kutani cikhati ca kona i hava a zvi tivako, ne tingilozi le tilweni ne hambu N’wana, zvo tiviwa hi Papayi.+
33 Tshamani mu tlharihile,+ mu tshama na mu khindlimukile, hakuva a mu zvi tivi ku a cikhati ci yimisilweko ci tava rini.+
34 Zvi fana ni munhu a endzako aya tikweni gin’wani, loyi a nga siya muti wakwe ni zvitiri lezvaku zvi sala zvi maha mitiro ya laha kaya,+ a cin’we ni cin’we ni ntiro wa cona, a laya a murindzeli wa nyangwa lezvaku a rindzela.+
35 Hikwalaho, tshamani na mu rindzele hakuva a mu ci tivi a cikhati leci a n’winyi wa muti a to wuya hi cona,+ kani i ta wuya ni gambo, kutani cikari ka wusiku, kutani na gi nga seca,* kutani ni mixo,+
36 kasi loku a chikela hi citshuketi a nga mu kumi na mu etlele.+
37 Lezvi ndzi wulako ka n’wina, ndzi wula ka vontlhe, ndziku: Tshamani na mu rindzele!”+
