Hi kutsala ka Marku 14:1-72
-
A vapristi va luka mano ya ku daya Jesu (1, 2)
-
Ku chululiwa a mafura yo nuhela ka Jesu (3-9)
-
Judhasi a tokometa Jesu (10, 11)
-
A Phasika go gumesa (12-21)
-
Kuyimiswa ka Cilalelo ca Hosi (22-26)
-
A phrofeta ku Pedro i ta kaneta lezvaku wa mu tiva (27-31)
-
Jesu a khongela le Getsemane (32-42)
-
Jesu a khon’wa (43-52)
-
A xuxisiwa mahlweni ka Tribhunali ya Hombe (53-65)
-
Pedro a kaneta lezvaku wa mu tiva Jesu (66-72)
14 Makunu ku wa kiyela masiku mambiri+ kasi ku mahiwa a Phasika+ ni Mubuzo wa Tipawa to kala Comelo.+ A vapristi lava va tihosana ni vatsali va wa lavetela ndlela ya ku mu khoma hi mano kasi va mu daya;+
2 hakuva va waku: “Hi nga mu khomeni laha mubuzweni, ku nga tshuka ku vhuka vhilinganya cikari ka vanhu.”
3 Na a hi kugeni* le Bhetaniya mutini wa Simoni loyi wa hlokonho, ku nota wasati ni botori ga alabhasteri gi nga hi ni mafura ya nardho* yo nuhela, ma nga patsiwangiko ni nchumu, yo dhura nguvhu. I no bandza botori lego ga alabhasteri a chulula mafura hlokweni yakwe.+
4 Laha a vokari va nga wona lezvo, va no swireka, va wutisana, vaku: “Ma xakelelwa yini a mafura lawa yo nuhela?
5 Phela a mafura lawa yo nuhela na ma xavisilwe hi 300 wa tidhenario* ni ku hundza, a mali ya kona yi nyikiwa zvisiwana!” Va no mu zangarela* nguvhu a wasati loye.
6 Kanilezvi Jesu i te: “Mu tsikeni. Mu mu karatela yini? I ndzi mahele zvilo zva zvinene.+
7 Hakuva a zvisiwana zvi na n’wina contlhe cikhati;+ mu nga zvi mahela zvazvinene ni ka cihi cikhati mu zvi lavako, kanilezvi a hi contlhe cikhati mu tova na mina.+
8 I mahile lezvi a nga zvi kota; i rangile a chela a mafura yo nuhela mirini wa mina kasi ku longisela kulahliwa ka mina.+
9 Ndza tiyisa ka n’wina, ndziku: Ni kwihi laha ku to chumayelwa a mahungu ya manene tikweni gontlhe,+ lezvi zvi mahilweko hi wasati loyi zvonawu zvi ta hlawutelwa kasi ku mu alakanya hi zvona.”+
10 Makunu Judhasi Iskariyoti, a mun’we wa lava va 12, i noya ka vapristi lava va tihosana a ya bhula navo hi lezvi a nga wa ta mu nyikelisa* zvona kabye.+
11 Laha va ngazwa lezvo, va no tsaka nguvhu va mu tsumbisa ku mu nyika mali ya prata.+ Hikwalaho, i no sangula ku lavetela cikhati ca cinene ca ku mu tokometa hi cona.
12 Makunu, ka siku go sangula ga Tipawa to kala Comelo,+ hi siku legi va nga tolovela ku nyikela hi gona a muphahlo wa Phasika,+ a vapizani vakwe va te ngalo kakwe: “U lava ku hi ya ku longiselela kwihi, u fela ku gela kona a Phasika?”+
13 I no ruma vapizani vakwe va vambiri, aku kabye: “Fambani dhoropeni, mu ta tlhangana ni wanuna a rweleko cifukwana ca mati. Mu landzeleni;+
14 ka muti lowu a to nghena, byelani n’winyi wa muti, muku: ‘Mugondzisi i ngalo: “Yi kwihi a yindlu ya vapfhumba lomu ndzi to gela kona Phasika ni vapizani va mina?”’
15 I ta mu komba sala ya hombe ya le hehla yi longileko ku tirisiwa. Hi longiseleleni kwalomo.”
16 Hikwalaho, a vapizani va no suka va famba vaya dhoropeni. Va noya va ya zvi kumisa zvalezvi a nga va byelisile zvona, va longisela Phasika.
17 Laha gi nga wa phumile, i nota ni lava va 12.+
18 Na va tshamile mezeni vaga, Jesu i te ngalo kabye: “Ndza tiyisa ka n’wina, ndziku: A mun’we wa n’wina, loyi a gako na mina, i ta ndzi tokometa.”+
19 Va no sangula ku bayiseka, a mun’we ni mun’wani wabye a mu wutisa, aku: “Hi mina ke?”
20 Aku kabye: “Mun’we wa lava va 12, loyi a nghenisako canja na mina lomu ngelweni.+
21 Hakuva a N’wana wa munhu wa famba, kota lezvi zvi tsalilweko xungetano hi yena, kanilezvi khombo ka loyi a to tokometa a N’wana wa munhu!+ Na zvi vile chukwana ka yena loku i wa nga pswaliwangi.”+
22 Na va haga, i no teka pawa, a yi katekisa, a khema a va nyika, aku: “Tekani muga. A pawa leyi yi yimela a miri wa mina.”+
23 I no teka kopo ya vhinyo, a bonga a va nyika, vanwa vontlhe hi yona.+
24 Aku kabye: “A vhinyo leyi yi yimela a ‘nkhata wa mina+ wa civhumelwano’,+ lowu wu to halatiwa hi kota ya votala.+
25 Ndza tiyisa ka n’wina, ndziku: Ndzi nga ta hanwa kambe a mihandzu ya vhina* kala ka siku legi ndzi tonwa leyi ya yiswa Mufun’weni wa Nungungulu.”
26 Hi kugumesa, andzhako ka loku va yimbelele a tisimu ta kudhumisa, va noya Citsungeni ca maOlivha.+
27 Jesu i te ngalo kabye: “N’wina n’wentlhe mu ta khunguvanyeka, hakuva ku tsalilwe ku: ‘Ndzi taba murisi,+ niku a tiyivhu ti ta hangalaka.’+
28 Hambulezvo, loku ndzi vhuxilwe, ndzi ta ranga mahlweni ka n’wina ndziya Galileya.”+
29 Kanilezvi Pedro i te ngalo kakwe: “Hambu loku vontlhe lava van’wani vo khunguvanyeka, mina ndzi nga ta khunguvanyeka.”+
30 Jesu aku kakwe: “Ndza tiyisa ka wena, ndziku: Nyamutlha, ka wusiku galegi, a nkuku na wu nga seba kumbiri, u ta ndzi kaneta kunharu.”+
31 Kanilezvi i no phikiza, aku: “Hambu loku zvi lava ku ndzifa na wena, ndzi nga ta tshuka ndzi ku kaneta.” Vontlhe lava van’wani va no sangula ku wulawu zvalezvo.+
32 Makunu va no chikela ka wutshamu gi vitaniwako ku Getsemane, aku ka vapizani vakwe: “Tshamani laha, mina na ndzi khongela.”+
33 I no teka Pedro, na Jakobe, na Johani a famba navo,+ a sangula ku tsan’wa a karateka nguvhu.
34 Aku kabye: “Ndzafa hi kukarateka.*+ Salani laha mu rindzela.”+
35 I no suka laho a fambanyana phambeni a yawa a kombela lezvaku loku zvi koteka, a hora leyo yi hundza kakwe.
36 Aku: “Abha,* Papayi,+ ka wena zvontlhe zva koteka; susa a kopo leyi ka mina. Hambulezvo, ku nga maheki lezvi ndzi zvi lavako, kanilezvi a ku maheke lezvi u zvi lavako.”+
37 I no wuya a ta va kuma na va etlele, aku ka Pedro: “Simoni, wo etlela? A wu zvi kotangi ku rindzela hora yin’we?+
38 Tshamani na mu rindzele, mu simama ku khongela kasi mu nga weli kuringweni.+ Kunene, a moya wa zvi lava, kanilezvi a nyama yi na ni gome.”+
39 I no tlhela kambe a ya khongela a wula zvalezvi zva zvin’we.+
40 I no wuya kambe a ta va kuma na va etlele, hakuva a matihlo yabye ma wa bindza hi wurongo, hikwalaho a va ci kumangi ni co mu hlamula.
41 Hi khati ga wunharu i no wuya a taku kabye: “Ka cikhati co kota leci, n’wina mo etlela, mu humula! Zvi ringene! Phela a cikhati ci chikele!+ A N’wana wa munhu wa nyikelwa mandleni ya vawonhi.
42 Sukani hi famba. Loyi a ndzi tokometako i laha kusuhani.”+
43 Zvalezvo, na a ha wulawula, Judhasi, a mun’we wa lava va 12, i no chikela ni citshungu ci nga hi ni zvipadha ni migomba, ci nga rumilwe hi vapristi lava va tihosana ni vatsali ni madhota.+
44 A mutokometi wakwe i wa va nyikile cikombiso, aku: “Loyi ndzi to mu pswopswa hi yaloye, mu khomeni mu famba naye na mu mu gadha.”
45 I no mu kongoma, a tshinela kakwe, aku: “Rabi!” a mu pswopswa.
46 Va no mu khoma va famba naye.
47 Kanilezvi, a mun’we wa lava va nga hi laho i no hlomula cipadha cakwe aba nandza ga mupristi wa hombe, a gi tsema ndleve.+
48 Kanilezvi Jesu aku kabye: “Mu ndzi tela ni zvipadha ni migomba kasi ku ta ndzi khoma, ndzova khamba ke?+
49 Siku ni siku ndzi wa hi na n’wina tempeleni ndzi gondzisa,+ kanilezvi a mu ndzi khomangi. Hambulezvo, lezvi zvi maheka kasi ku tatiseka a Mitsalo.”+
50 Vontlhe va no mu tsika va tsutsuma.+
51 Kanilezvi a jaha go kari gi nga bohile ntsena a nguwo ya yinene ya wukene,* gi no mu landzela hi laha kusuhani. Va no zama ku gi khoma,
52 kanilezvi gi no siya nguwo ya gona ya wukene* gi tsutsuma na gi hi cimbyiri.*
53 Va no teka Jesu va famba naye ka mupristi wa hombe;+ makunu vontlhe a vapristi lava va tihosana ni madhota ni vatsali va no hlengeletana.+
54 Kanilezvi Pedro i no mu landzela hi le kule kala tsendzeleni* wa mupristi wa hombe. I no ya tshama ni zvitiri a wora ndzilo.+
55 A vapristi lava va tihosana ni yontlhe Tribhunali ya Hombe va no lavetela wukustumunyu ga ku kona Jesu kasi va mu daya kanilezvi a va gi kumangi.+
56 Kunene, a votala va no nyika wukustumunyu ga mawunwa hi yena,+ kanilezvi gi wa nga zwanani.
57 Ku nota van’wani kambe va ta nyika wukustumunyu ga mawunwa hi yena, vaku:
58 “Hi mu zwile na aku: ‘Ndzi ta hahlula a tempeli leyi yi akilweko hi mandla, ndzi aka yin’wani hi masiku manharu yo kala yi nga akiwi hi mandla.’”+
59 Kanilezvi hambu ka mhaka leyi, a wukustumunyu gabye gi wa nga zwanani.
60 Makunu a mupristi wa hombe i no suka a yima cikari kabye a wutisa Jesu, aku: “A wu hlamuli nchumu? A wu zvizwi lezvi a vavanuna lava va ku kecarako hi zvona ke?”+
61 Kanilezvi i no simama ku miyela a nga hlamuli nchumu.+ A mupristi wa hombe i no tlhela a mu wutisa, aku: “Hi wena Kristu, a N’wana wa Nungungulu Loyi a Dzundziwako ke?”
62 Jesu aku kakwe: “Hi mina; niku mu ta wona a N’wana wa munhu+ na a tshamile reveni ga cinene+ ga ntamu na ata hi marefu ya tilo.”+
63 Zvalezvo, a mupristi wa hombe i no handzula tinguwo takwe, aku: “Ha ha va lavela yini a vakustumunyu?+
64 Mu mu zwile na a rukatela. Mu li yini?” Vontlhe va no mu kona vaku i fanele ku dawa.+
65 A vokari va no sangula ku mu phelela,+ va mu fenengeta nghohe va muba zvibhakela, vaku: “Phrofeta!” Andzhako ka loku va mu bile tipama, a vagadhi va no mu teka.+
66 A cikhati leci Pedro a nga hi lahasi laha tsendzeleni, ku nota citiri ca mupristi wa hombe ca nhanyana.+
67 Laha ci nga wona Pedro na a wora ndzilo, ci no mu cuwuka, ciku: “Wenawu u wa hi na Jesu wa le Nazareta.”
68 Kanilezvi i no kaneta, aku: “A ndzi mu tivi ne a ndzi zvi zwisisi lezvi u wulawulako hi zvona”. I no suka aya nyangweni.
69 Na a hi kwalaho, a citiri leco ca nhanyana ci no mu wona ci se byela lava va nga yimile laho, ciku: “Loyi mun’we wabye.”
70 Pedro i no kaneta kambe. Andzhako ka cikhatana, lava va nga yimile laho va no tlhela va byela Pedro, vaku: “Hakunene wenawu u mun’we wabye, hakuva u wa le Galileya.”
71 Kanilezvi i no sangula ku rukatela a tlhela a hlambanya, aku: “A ndzi mu tivi wanuna loyi mu mu wulako!”
72 Zvalezvo a nkuku wu noba hi khati ga wumbiri.+ Pedro i no alakanya lezvi Jesu a nga wulile, zvaku: “A nkuku na wu nga seba kumbiri, u ta ndzi kaneta kunharu.”+ I no bayiseka nguvhu a sangula ku rila.
Mitlhamuselo ya lahasi
^ Kutani: “Na a tshamile mezeni”.
^ A nardho i sinya yo nuhela.
^ Kutani: “bhongela”.
^ Kutani: “tokometisa”.
^ A vhina i sinya leyi yi pswalako mauvha.
^ Kutani: “A muhefemulo wa mina wa karateka”.
^ I gezu ga ciHebheru kutani ga ciAramaiko gi wulako ku: “O, Papayi!”
^ Kutani: “linho”.
^ Kutani: “linho”.
^ Kutani: “na gi nga bohangi tinguwo to enela; ni cirangiso basi”.
^ Kutani: “pátio”.
