Hi kutsala ka Marku 15:1-47
15 Zvalezvi gi ngaca, a vapristi lava va tihosana, ni madhota, ni vatsali — yontlhe a Tribhunali ya Hombe — va no tlhangana va xuxa cikungo. Va no boha Jesu va famba naye va ya mu nyikela ka Pilatu.+
2 Pilatu i no mu wutisa, aku: “Hi wena Hosi ya vaJudha ke?”+ I no hlamula, aku: “U wula zvona.”+
3 Kanilezvi a vapristi lava va tihosana va wa mu lumbeta zvilo zvo tala.
4 Makunu Pilatu i no mu wutisa kambe, aku: “A wu hlamuli nchumu?+ Hi ngazwa zvontlhe lezvi va ku kecarako hi zvona!”+
5 Kanilezvi Jesu a nga ha mu hlamulangi nchumu, hikwalaho Pilatu i no hlamala.+
6 Ka mubuzo ni mubuzo, Pilatu i wa tala ku va tlhatlhela cibochwa cin’we leci va nga ci kombela.+
7 Ka cikhati caleco, ku wa hi ni wanuna a vitaniwako ku hi Bharabhasi a nga vhalelwe ni lava va nga vhukela mufumo, lava va nga dele vanhu a cikhati leci va nga vhukela mufumo.
8 Hikwalaho, a citshungu ci nota ci ta kombela Pilatu lezvaku a maha lezvi a nga tala ku ci mahela.
9 I no va wutisa, aku: “Mu lava ku ndzi mu tlhatlhela a Hosi ya vaJudha?”+
10 Hakuva Pilatu i wa zvi wonile lezvaku a vapristi lava va tihosana va mu nyikele hi kota ya matshoho.+
11 Kanilezvi a vapristi lava va tihosana va no kucetela citshungu lezvaku ci kombela ku a ci tlhatlhela Bharabhasi.+
12 Pilatu i no va wutisa kambe, aku: “Makunu ndzi kuyini hi loyi mu nge i Hosi ya vaJudha?”+
13 Va no banguleka kambe, vaku: “I waye mhandzeni!”*+
14 Kanilezvi Pilatu i no va wutisa, aku: “Hikuyini? Cini a nga goha?” Hambulezvo, va no engetela ku banguleka, vaku: “I waye mhandzeni!”*+
15 Hikwalaho, na a lava ku tsakisa citshungu, i no va tlhatlhela Bharabhasi. Andzhako ka ku laya lezvaku Jesu a kwapiwa,+ i no mu nyikela kasi a dawa mhandzeni.+
16 A masochwa ma no famba naye tsendzeleni* wa laha mutini wa govhernadhori ma ya tlhanganisa a ntlawa wontlhe wa masochwa.+
17 Va no mu bohisa nguwo yo pswhuka va tlhela va luka cidlodlo* ca mimizwa va mu tlhateka;
18 va no sangula ku mu byela ku: “Xewe, wena Hosi ya vaJudha!”+
19 Va no muba kambe laha hlokweni hi lihlanga, va mu phelela, va tlhela va mu khizamela.
20 Hi kugumesa, na va karele hi ku mu poyila, va no mu tlhatlha nguwo leyo yo pswhuka va mu bohisa tinguwo takwe va famba naye kasi a ya belelwa mhandzeni.+
21 A wanuna wo kari wa le Kirene a nga hundza hi laho na a wuya hi masin’wini, a vitaniwako ku hi Simoni, a papayi wa Alexandro na Rufusi, va no mu kurumeta ku rwala mhandze yakwe ya hlomulo.*+
22 Va no famba naye ka wutshamu gi vitaniwako ku Golgota, lezvi loku zvi hundzuluselwa zvi wulako ku: “Wutshamu ga Cirwarwa.”*+
23 Va no mu nyika vhinyo yi nga jutilwe ni mira,+ kanilezvi i no ala kunwa.
24 Va no mu belela laha mhandzeni va gumesa va avelana a tinguwo takwe hi kuba tihlolo kasi ku tiva lezvaku hi mani a to teka yini.+
25 Ku wa hi hora ya wunharu* a cikhati leci va nga mu belela laha mhandzeni.
26 A mutsalo wa nandzu lowu va nga mu lumbeta, wu waku: “Hosi ya vaJudha.”+
27 Ahandle ka lezvo, va no belela a vaphangi vambiri timhandzeni zvin’we naye, a mun’we reveni gakwe ga cinene ni mun’wani reveni gakwe ga cibhabha.+
28 *——
29 Lava va nga kari va hundza va wa wulawula kubiha ka yena na va ninginisa tihloko,+ vaku: “Ha! Wena u ngaku u ta hahlula tempeli u tlhela u yi aka hi masiku manharu,+
30 ti ponise ka, u chika laha mhandzeni ya hlomulo.”*
31 A vapristi lava va tihosana vonawu zvin’we ni vatsali va wa mu poyila, vaku: “I hanyisile van’wani, kanilezvi a nga zvi koti ku ti hanyisa!+
32 Kristu, a Hosi ya Izrayeli, i wa chike laha mhandzeni ya hlomulo* kasi hi zvi wona hi kholwa kakwe.”+ Hambu lava va nga belelwe zvin’we naye timhandzeni va no mu rukatela.+
33 Laha yi ngaba hora ya wu 6,* ku nova ni munyama misaveni yontlhe kala ka hora ya wu 9.*+
34 Hi hora ya wu 9, Jesu i no vitana hi gezu ga hombe, aku: “Eli, Eli, lama sabhaktani?”, lezvi loku zvi hundzuluselwa zvi wulako ku: “Nungungulu wa mina, Nungungulu wa mina, u ndzi tsikele yini?”+
35 A cikhati leci a vokari va nga yimile laho va nga zvizwa, va te: “Ma zvizwa! I vitana Elija.”
36 Makunu, a mun’we wabye i no tsutsuma a ya peta ciponja lomu ka vhinyo yo dzunga a ci tlhomeka laha ka lihlanga a mu nyika kasi anwa,+ aku: “Mu tsikeni! Hi lava ku wona ku Elija i tata a ta mu chisa ke.”
37 Kanilezvi Jesu i no keta hi gezu ga hombe, afa.*+
38 A kortina ga wutshamu go basa+ gi no handzuka hi laha cikari, kusukela hehla kala hasi.+
39 Makunu laha a hosana ya masochwa leyi yi nga yimile laho mahlweni kakwe yi nga wona lezvi zvi nga maheka a cikhati leci a ngafa, yi te: “Hakunene a wanuna loyi i wa hi N’wana wa Nungungulu.”+
40 Ku wa hi ni vavasati kambe va nga zvi cuwukela hi le kule. Ka vavasati lavo, ku wa hi na Mariya Magdhala,* na Mariya, a mamani wa Jakobe loyi wa Mutsongwani na Jose, na Salome,+
41 lava va nga fambafamba naye va mu tirela+ a cikhati leci a nga hi Galileya, ni van’wani vavasati vo tala va nga tile naye Jerusalema.
42 Lezvi makunu gi ngaya kupeleni, na gi hi siku ga Kulongisela, ku nga siku legi gi gamelwako hi sabhadho,
43 ku nota Josefa wa le Arimateya, a nga hi ciro ci dhumileko ca Tribhunali ya Hombe ya vaJudha, loyi yenawu a nga rindzela a Mufumo wa Nungungulu. I no tiya hlanha aya ka Pilatu a ya kombela cirumbi ca Jesu.+
44 Kanilezvi Pilatu i wa lava ku tiva ku i file kutani wa ha hanya, hikwalaho i no vitana hosana ya masochwa a ta yi wutisa ku Jesu i file ke.
45 Andzhako ka ku tiyisekisiwa hi hosana ya masochwa, i no nyikela a cirumbi ka Josefa.
46 Andzhako ka loku Josefa a xavile nguwo ya yinene ya wukene,* i noya a ya mu chisa a mu phutsela ka yona a gumesa a mu lata ka cilahla+ ci nga kehlilwe laha ribyeni. Andzhako ka lezvo, i no wumbuluta ribye a vhala nomu wa cilahla.+
47 Kanilezvi Mariya Magdhala* na Mariya a mamani wa Jose va no simama ku cuwukela laha a nga latilwe kona.+
Mitlhamuselo ya lahasi
^ Kutani: “Mu daye mhandzeni!”
^ Kutani: “Mu daye mhandzeni!”
^ Kutani: “pátio”.
^ Kutani: “korowa”.
^ Kutani: “Cikodo; Cikuwa”.
^ Ku nga kwalomu ka ma 9 hora.
^ Ku nga kwalomu ka dhina.
^ Ku nga kwalomu ka ma 15 hora.
^ Kutani: “a hefemula khati go gumesa”.
^ Kutani: “Mariya wa le Magdhala”.
^ Kutani: “linho”.
^ Kutani: “Mariya wa le Magdhala”.
