Hi kutsala ka Marku 2:1-28
2 Kanilezvi andzhako ka masiku yo kari i no nghena kambe Kapernawume, niku a mahungu ya lezvaku i kona laha kaya ma no hangalaka.+
2 Hikwalaho, ku no hlengeletana vanhu vo tala nguvhu laha ka kuza ku nga ha sali wutshamu hambu ni laha nyangweni. I no sangula ku kanela kabye.+
3 Va no mu tela ni munhu wa ku woma zviro na a rwalilwe hi mune wa vavanuna.+
4 Kanilezvi a va zvi kotangi ku nghena naye kala laha Jesu a nga hi kona hi kota ya citshungu. Hikwalaho, va no gwawula le hehla ka yindlu, hi laha Jesu a nga hi kona; laha va nga gwawulile, va no releta a lihlaka* leli loyi wa ku woma zviro a nga latilwe ka lona.
5 A cikhati leci Jesu a nga wona kukholwa kabye,+ i no byela loyi wa ku woma zviro, aku: “N’wananga, a zviwonho zva wena zvi tsetselelwe.”+
6 Makunu a vatsali vo kari va nga tshamile laho va no alakanyela timbilwini tabye,+ vaku:
7 “Hikuyini a wanuna loyi a wulawulisako lezvi? Wa rukatela. Himani a nga ni ntamu wa ku tsetselela zviwonho ahandle ka mun’we, a nga Nungungulu?”+
8 Kanilezvi Jesu i no tekela ku zvi tiva lezvaku va wa hi ni maalakanyo lawo, aku kabye: “Hikuyini mu alakanyelako zvilo lezvo timbilwini ta n’wina?+
9 Hi cihi ci olovako ku byela loyi wa ku woma zviro, ku wula ku: ‘A zviwonho zva wena zvi tsetselelwe’, kutani ku: ‘Suka u yima, u teka lihlaka* la wena u famba’?
10 Kanilezvi kasi mu zvi tiva lezvaku a N’wana wa munhu+ i na ni ntamu wa ku tsetselela zviwonho laha misaveni . . .”,+ i no byela loyi wa ku woma zviro, aku:
11 “Ndza ku byela, ndziku: Suka u yima, u teka lihlaka* la wena uya kaya.”
12 Zvalezvo i no suka a yima a teka lihlaka* lakwe a famba na a woniwa hi vontlhe. Hikwalaho, vontlhe va no hlamala nguvhu va dhumisa Nungungulu, vaku: “A hi se tshuka hi wona zvilo zvo khwatsi hi lezvi.”+
13 I no huma a famba kambe hi mbhiri ya bimbi, ni citshungu contlhe ci waya kakwe niku i no sangula ku ci gondzisa.
14 Laha a nga kari a hundza, i no wona Levhi,* a n’wana wa Alfewu, na a tshamile laha ku hakhelwako mikhupo, aku kakwe: “Maha mulandzeli wa mina.” Zvalezvo i no suka a mu landzela.+
15 Hi ndzhako ka cikhati, na a kari aga* mutini wa Levhi, ku wa hi ni vakhupisi vo tala ni vawonhi va nga kari vaga* zvin’we na Jesu ni vapizani vakwe, hakuva ku wa hi ni vakhupisi ni vawonhi vo tala va nga mu landzela.+
16 Kanilezvi laha a vatsali va vaFarisi va nga wona lezvaku iga ni vawonhi ni vakhupisi, va no wutisa vapizani vakwe, vaku: “Kasi waga ni vakhupisi ni vawonhi ke?”
17 Loku Jesu a zwile lezvo, i te ngalo kabye: “Lava va kalako va nga babyi a va lavi dhokodhela, kanilezvi lava va babyako va mu lava. A ndzi telangi ku ta vitana valulamileko, kanilezvi ndzi tele vawonhi.”+
18 A vapizani va Johani ni vaFarisi va wa pfhunga.* Hikwalaho, va nota kakwe va taku: “Hikuyini a vapizani va Johani ni vapizani va vaFarisi va pfhungako, kanilezvi a vapizani va wena va nga pfhungi?”+
19 Hikwalaho, Jesu i te ngalo kabye: “A vanghana va noivho a va na cigelo ca ku pfhunga* loku a noivho+ ya ha hi zvin’we navo, a hi zvona ke? Loku va ha hi ni noivho a va pfhungi.
20 Kanilezvi mata masiku lawa va to tekelwa a noivho;+ ka siku lego hi kona va to pfhunga*.
21 A nga kona a tsemako nguwo ya yiswa a yi rungela kota ciziva ka nguwo ya kale. Loku a maha lezvo, a ciziva leco ci ta dungurula a nguwo leyo ci engetela ku handzula.+
22 A nga kona kambe a chelako vhinyo ya yiswa ka tinghotso ta kale. Loku a maha lezvo, a vhinyo yi ta phuxuta tinghotso, a vhinyo yi luza ni tinghotso ta kona. Kanilezvi a vhinyo ya yiswa yi cheliwa ka tinghotso ta tiswa.”
23 Makunu laha a nga kari a hundza hi lomu masin’wini ya trigo hi sabhadho, a vapizani vakwe va no sangula ku hulula trigo na va kari va famba.+
24 Hikwalaho, a vaFarisi va te ngalo kakwe: “Hi nga wona! Hikuyini va mahako zvilo zvo kala zvi nga vhumelelwi ku mahiwa hi sabhadho?”
25 Kanilezvi yena aku kabye: “A mu se gondza lezvi Dhavhidha a nga maha a cikhati leci a nga lava zvakuga, laha yena ni vavanuna vakwe va ngazwa ndlala ke?+
26 Kasi a mu gondzangi ka matimu ya Abhiyatari,+ a hosana ya vapristi, lezvaku Dhavhidha i nghenile ndlwini ya Nungungulu aga tipawa ta munyikelo, a gumesa a teka to kari a nyika vavanuna lava a nga hi navo, kuveni ne mun’we wabye i wa nga vhumelelwi kuga, ntsena vapristi ke?”+
27 I no engeta aku: “A sabhadho give kona hi kota ya munhu,+ a hi munhu a nga vangelwa sabhadho.
28 Hikwalaho, a N’wana wa munhu i Hosi ya sabhadho kambe.”+
Mitlhamuselo ya lahasi
^ Kutani: “maka; citatara”.
^ Kutani: “maka; citatara”.
^ Kutani: “maka; citatara”.
^ Kutani: “maka; citatara”.
^ Legi i vito gin’wani ga Matewu.
^ Kutani: “na a tshamile mezeni”.
^ Kutani: “va nga tshamile mezeni”.
^ Kutani: “jejuwara”.
^ Kutani: “jejuwara”.
^ Kutani: “jejuwara”.
