Hi kutsala ka Marku 4:1-41
4 I no sangula ku gondzisa kambe mbhirini ya bimbi, niku a citshungu ca hombe ci no hlengeletana kakwe. Hikwalaho, i no nghena ngalaveni a tshama kulenyana ni mbhiri ya bimbi, kanilezvi a citshungu contlhe ci wa hi mbhirini ya bimbi.+
2 I no sangula ku va gondzisa a zvilo zvo tala hi mifananiso.+ Na a kari a va gondzisa, i te ngalo kabye:+
3 “Ingiselani. A mubyali i no huma a ya byala timbewu.+
4 A cikhati leci a nga kari a byala, a timbewu to kari ti no wela laha ndleleni ti se giwa hi zvinyanyani.
5 A tin’wani ti no wela maribyeni laha ku nga hi hava misava yo enela, ti tekela ku mila hakuva a misava yi wa nga etangi.+
6 Kanilezvi laha a gambo gi nga tsuwuka, ti no tlahuliwa ti wuna hakuva ti wa nga hi na timitsu.
7 A tin’wani ti no wela cikari ka mimizwa, ni mimizwa yi no kula yi ti tlimba ti nga pswali mihandzu.+
8 Kanilezvi a tin’wani ti no wela ka misava yo nona, ti mila ti kula, ti sangula ku pswala mihandzu: ti pswala hi ka 30, 60, ni ka 100, a ku hundza lezvi zvi nga byalilwe.”+
9 A gumesa aku: “Loyi a nga ni tindleve ta kuzwa, i wazwe.”+
10 Makunu a cikhati leci a nga hi yece, lava va nga hi matlhelweni yakwe zvin’we ni lava va 12 va no sangula ku mu wutisa zviwutiso xungetano hi mifananiso leyo.+
11 Aku kabye: “N’wina mu nyikilwe ku zwisisa a cihundla co basa+ ca Mufumo wa Nungungulu, kanilezvi ka van’wani a zvilo zvontlhe ndzi va gondzisa hi mifananiso,+
12 kasi hambu loku va cuwuka, va cuwuka kanilezvi va nga woni nchumu, hambu loku va demba tindleve, va demba kanilezvi va ngazwi nchumu, ne ku zvi zwisisa; ne hambu ku hundzuluka kasi va tsetselelwa.”+
13 I no va byela kambe, aku: “Loku mu nga wu zwisisi a mufananiso lowu, mu ta zvi kotisa kuyini ku zwisisa a mifananiso yontlhe leyi yin’wani ke?
14 “A mubyali i byala mhaka.+
15 Leti ti nga ndleleni, laha a mhaka yi nga byaliwa kona, hi lava va zwileko a mhaka, kanilezvi zvalezvi va yi zwako, Sathani ita+ a ta susa a mhaka yi byalilweko lomu timbilwini tabye.+
16 Leti ti nga wela maribyeni, hi lava va ku zvalezvi va zwako mhaka, va yi vhumela hi kutsaka.+
17 Kanilezvi kota lezvi a mbewu yi nga kala ku zima timitsu timbilwini tabye, yo hanya zva cikhatana. Loku va xanisiwa ni ku vhukelwa hi kota ya mhaka va tekela ku khunguvanyeka.
18 Ku na ni tin’wani kambe ti nga wela cikari ka mimizwa. Leti hi lava va zwako mhaka,+
19 kanilezvi a kukarateka+ ku nga tikweni* legi ni ntamu wa kukhohlisa wa titshomba,+ ni kunavela+ a zvilo zvontlhe lezvi zvin’wani, zvi nava zvi tlimba mhaka yi nga pswali mihandzu.
20 Makunu leti ti byalilweko ka misava yo nona hi lava va zwako a mhaka, va yi amukela hi kutsaka va tlhela va pswala mihandzu: va pswala hi ka 30, 60 ni ka 100, a ku hundza lezvi zvi nga byalilwe.”+
21 I no engeta, aku kabye: “Ina va lumeka kandiya va yi khubhunyeta hi cindzala,* kutani ku yi veka lahasi ka mubhedhi ke? Kasi a va lumeki va yi hayeka le hehla ke?+
22 Hakuva a ku na nchumu wu fihlilweko wu to kala ku tiviwa, ne nchumu wu tumbetilweko wu to kala ku humesiwa kubaseni.+
23 Loyi a nga ni tindleve ta kuzwa, i wazwe.”+
24 I no tlhela a va byela, aku: “Chelani kota ka lezvi mu zvi zwako.+ Hi lipimo leli mu pimako hi lona, va ta mu pimawu hi lona, va tlhela va hundzisa.
25 Hakuva ni wihi loyi a nga nazvo i ta nyikiwa zvin’wani,+ kanilezvi loyi a nga hava nchumu, hambu lezvi a nga nazvo i ta tekelwa.”+
26 I no engeta, aku kabye: “Hikwalaho, a Mufumo wa Nungungulu wu fana ni munhu a byalako timbewu misaveni.
27 I etlela ni wusiku a vhuka ni mixo a kuma lezvaku a timbewu ti milile ti kula kanilezvi a nga zvi tivi ku zvi mahisile kuyini.
28 A misava yi pswala mihandzu ha yoce: a kuranga i khava,* ku landzela mipon’wani, hi kugumesa timbewu ti tiyeleko ka mipon’wani.
29 Kanilezvi neti a timbewu ti buvha, i nghena a tshovela hakuva a cikhati ca kutshovela ci chikele.”
30 I no va byela kambe, aku: “A Mufumo wa Nungungulu hi nga wu fananisa ni yini ke? Kutani mufananiso muni hi nga wu tirisako kasi ku wu tlhamusela?
31 Wu fana ni mbewu ya cinapi. Na ya ha byaliwa, hi yona mbewu ya yitsongwani ka tontlhe laha misaveni,+
32 kanilezvi loku yi byalilwe, yi kula yi hundza makhuho wontlhe yi tlhela yi pandza madhavi ya hombe, ni zvinyanyani zva tilo zvita zvi ta zumba ndzhutini wa yona.”
33 I no wulawula navo hi mifananiso yo tala+ yo khwatsi hi leyi, kala laha va nga zvi kota ku zvi zwisisa.
34 Kunene, a ku na nchumu a nga va byela na a nga tirisi mufananiso, kanilezvi a vapizani vakwe i wa va tlhamusela zvilo zvontlhe na va hi voce.+
35 Ka siku lego, a gambo na gi pelile, i te ngalo kabye: “A hi tlhatukeni hiya ka mbhiri leyi yin’wani.”+
36 Hikwalaho, andzhako ka ku tlhatlha citshungu, va no famba naye hi ngalava; ku wa hi ni tin’wani tingalava ti nga longoloka naye.+
37 Makunu, ku no sangula kuba bhubhutsa ga hombe, a mavingo* maba ngalava laha ka kuza yi lava ku tala hi mati.+
38 Kanilezvi i wa etlele le ndzhako* ka ngalava laha ka cikhigelo.* Hikwalaho, va no mu vhuxa, vaku kakwe: “Mugondzisi, a wu zvi woni ku hafa ke?”
39 Zvalezvo, i no vhuka a kawuka moya, aku ka bimbi: “Miyela u ku hwi!”+ A moya wu no nyima, kuva ni kurula ka hombe.
40 Yena aku kabye: “Mu chava yini? A mu seva ni kukholwa ke?”
41 Kanilezvi va no chava nguvhu, va byelana vaku: “Kasi himani yaloyi, wa ku hambu a moya ni bimbi zva mu ingisa?”+
Mitlhamuselo ya lahasi
^ Kutani: “cirundzu”.
^ A khava ku wuliwa a timbewu ti kalako ti nga se rumbuka.
^ Kutani: “mabyandlati; mavimbi”.
^ Hi kukongoma: “cisalwini”.
^ Kutani: “cimasi”.
