Hi kutsala ka Marku 5:1-43
5 Makunu va no chikela ka mbhiri leyi yin’wani ya bimbi tikweni ga vaGerasa.+
2 Zvalezvi Jesu a nga huma hi lomu ngalaveni, i no telwa hi wanuna a nga hi ni moya wa kubiha na a huma hi lomu zvilahleni.
3 I wa tshama lomu zvilahleni, niku kala ka cikhati leco, i hava a nga zvi kota ku mu boha a nga phewuli, hambu loku a bohiwa hi chini.
4 I wa tshamela ku fasiwa hi tinghomondo* ni ku bohiwa hi machini kanilezvi i wo phewula, a tshova ni tinghomondo. I hava a nga hi ni ntamu wa ku mu khoma a nga chukuli.
5 Wusiku ni mumu i wa tshama hi ku banguleka lomu zvilahleni ni lomu zvitsungeni na a ti tsemelela hi maribye.
6 Kanilezvi laha a nga wona Jesu hi le kulenyana, i no tsutsuma a mu khinga a yawa mahlweni kakwe,+
7 a banguleka hi gezu ga hombe, aku: “Cini ndzi nga ku gohela wena Jesu, N’wana wa Nungungulu a Tlakukileko ku Hundza Vontlhe? Hlambanya hi Nungungulu lezvaku u nga ta ndzi xanisa.”+
8 Hakuva Jesu i wa wu byelile, aku: “Moya ndziwena wa kubiha, huma ka wanuna loyi.”+
9 Kanilezvi Jesu i no wu wutisa, aku: “Hi wena mani?” Wuku: “Hi mina Cikwata, hakuva hi tele.”
10 Wu no mu khongotela nguvhu Jesu lezvaku a nga hlongoli mimoya yi huma tikweni lego.+
11 Ku wa hi ni ntlhambi wa hombe wa makhumba+ ma nga kari maga laha citsungeni.+
12 Hikwalaho, a mimoya yi no mu khongotela, yiku: “Hi rumele ka makhumba kasi hi ya nghena ka wona.”
13 I no yi vhumelela. Hikwalaho, a mimoya ya kubiha yi no huma yi ya nghena ka makhumba, makunu a ntlhambi wu no tsutsuma wu ya wela bimbini wu mbemba. Ku wa hi cipimo ca 2000 wa makhumba.
14 Kanilezvi a varisi va makhumba va no tsutsuma va ya hlawutela mahungu lawo dhoropeni ni ka matshamu ya lomu kusuhani; a vanhu va nota va ta wona lezvi zvi nga mahekile.+
15 Hikwalaho, va nota ka Jesu va ta wona a wanuna wa madhimoni, yaloyi a nga hi ni cikwata, na a tshamile, na a bohile tinguwo, lezvo na a tiva. Hikwalaho, va no chava.
16 Lava va nga zvi wona, va no va hlawutela lezvi a mhaka leyi yi nga mahekisa zvona ka wanuna loyi a nga hi ni madhimoni ni ka makhumba.
17 Hikwalaho, va no khongotela Jesu lezvaku a huma tikweni gabye.+
18 Laha Jesu a nga kari a nghena lomu ngalaveni, a wanuna loyi a nga hi ni madhimoni i no mu khongotela lezvaku va famba zvin’we.+
19 Hambulezvo, a nga vhumelangi, kanilezvi i no mu byela, aku: “Famba kaya ka maxaka ya wena u ya ma hlawutela zvontlhe lezvi Jehovha* a nga ku mahela ni wuxinji legi a ku maheleko.”
20 A wanuna loyi i no suka a famba a sangula ku huwelela le Dhekapoli* xungetano hi zvontlhe lezvi Jesu a nga mu mahela, niku a vanhu vontlhe va no hlamala.
21 Andzhako ka loku Jesu a tlhatukile kambe hi ngalava a wuya tlhelweni legi gin’wani ga bimbi, a citshungu ca hombe ci no hlengeletana kakwe, yena na a hi mbhirini ya bimbi.+
22 Ku nota a mun’we wa varangeli va sinagoga a vitaniwako ku hi Jairo. Laha a nga mu wona, i nowa mikondzweni yakwe,+
23 a mu khongotela makhati yo tala, aku: “A nhanyana wa mina wa babya zva mahati.* Ndza ku kombela lezvaku u ta mu tlhateka mandla+ kasi a kalamuka a hanya.”
24 Zvalezvo, Jesu i no famba naye, ni citshungu ca hombe ci no mu landzela na ci mu manya.
25 Makunu ku wa hi ni wasati a nga hi ni mababyi yo huma nkhata+ hi 12 wa malembe.+
26 I wa xanisekile nguvhu mandleni ya vadhokodhela vo tala niku i wa mbhetile mali yakwe yontlhe, kanilezvi i wa nga chukwatangi, a mababyi ma wo kula.
27 A cikhati leci a ngazwa mahungu hi Jesu, i no mu landza hi lendzhako lomu cikari ka citshungu a ya henya a nguwo yakwe,+
28 hakuva i waku: “Loku ndzo kota ntsena ku henya a nguwo yakwe, ndzi ta hanya.”+
29 Zvalezvo, a nkhata wakwe wu no nyima ku huma, a zvizwa lomu mirini wakwe lezvaku i hanyisilwe ka mababyi yakwe yo bayisa.
30 Jesu i no tekela ku zvizwa lezvaku ku humile ntamu+ hi ka yena, a se hundzuluka a wutisa citshungu, aku: “Himani a nga henya tinguwo ta mina?”+
31 Kanilezvi a vapizani vakwe va te ngalo kakwe: “A wu ci woni citshungu leci ci ku manyako, makunu hikuyini u wutisako ku: ‘Himani a nga ndzi henya?’”
32 Hambulezvo, i no cuwuka matlhelweni kasi ku wona loyi a nga mu henya.
33 A wasati, na a kari a chava ni ku rurumela, ni ku tiva lezvi zvi nga mu mahekela, i nota a tawa mahlweni kakwe a mu byela a lisine lontlhe.
34 Jesu aku kakwe: “N’wananga, a kukholwa ka wena ku ku hanyisile. Famba hi kurula,+ u hanyiswa ka mababyi ya wena yo bayisa.”+
35 Na a ha wulawula, ku no chikela vavanuna vo kari va ngata hi mutini wa murangeli wa sinagoga, va taku: “A nhanyana wa wena i file! Wa ha mu karatela yini Mugondzisi?”+
36 Kanilezvi Jesu i no zvizwa, a byela murangeli wa sinagoga, aku: “U nga chavi,* wena kholwa basi.”+
37 Kanilezvi a nga tsikangi munhu a mu landza, ahandle ka Pedro, na Jakobe, na Johani a makabye wa Jakobe.+
38 A cikhati leci va nga chikela mutini wa murangeli wa sinagoga, i no wona a tsanga-tsanga ni lava va nga kari va rila ni kuba tihuwa.+
39 Loku a nghenile, i te kabye: “Hikuyini mu rilako ni ku maha tsanga-tsanga? A n’wanana loyi a nga fangi, i no etlela.”+
40 Laha va ngazwa lezvo va no mu hleka. Kanilezvi andzhako ka loku a humesile vontlhe lomu ndlwini, i no teka a papayi ni mamani wa n’wanana ni lava a nga hi navo va nghena lomu a n’wanana a nga hi kona.
41 Hi kulandzela, i no khoma canja ga n’wanana, aku kakwe: “Talita kumi”, lezvi loku zvi hundzuluselwa zvi wulako ku: “Nhanyana, ndziku ka wena: Vhuka!”+
42 A nhanyana i no tekela ku vhuka a sangula ku fambafamba. (I wa hi ni 12 wa malembe.) Zvalezvi va nga wona lezvo, a va ti kotangi hi kutsaka.
43 Kanilezvi i no va laya nguvhu lezvaku va nga byeli munhu a mhaka leyi,+ a tlhela a va byela ku va mu nyika zvakuga.
Mitlhamuselo ya lahasi
^ Kutani: “tinjema”.
^ Kutani: “Tikweni ga Khume ga Madhoropa”.
^ Kutani: “i kusuhani ni kufa”.
^ Kutani: “Tsika ku chava”.