Hi kutsala ka Marku 8:1-38
8 Masikwini lawo, ku no hlengeletana kambe a citshungu ca hombe niku ci wa nga hi na nchumu wa kuga. Hikwalaho, i no vitanisa vapizani, aku kabye:
2 “Ndza ci zwela wusiwana a citshungu leci,+ hakuva va tshamile masiku manharu na mina niku a va na ca kuga.+
3 Loku ndzo va tlhelisa kaya ni ndlala,* va ta famba va sika hi ndlela hakuva a vokari vabye vata hi kule.”
4 Kanilezvi a vapizani vakwe va no mu hlamula, vaku: “Hi ta ti kuma kwihi a tipawa ta ku xurisa a vanhu lava kwalomu ciwuleni?”
5 I no va wutisa, aku: “Tipawa tingani mu nga nato?” Vaku: “I 7.”+
6 I no byela citshungu lezvaku ci tshama hasi. Hi kulandzela, i no teka a tipawa leto ta 7, a bonga, a ti khemelela a nyika vapizani vakwe kasi va avela, ni vapizani va no avela citshungu.+
7 Va wa hi ni zvinjhanjhana zvi tsongwani kambe; andzhako ka ku zvi katekisa, i no va byela lezvaku va zvi avelawu ka vanhu.
8 Hikwalaho, va noga va xura, va hlengeletela a zvikhemu lezvi zvi nga sele va tata 7 wa zvindzala* zva hombe.+
9 Ku wa hi ni cipimo ca 4000 wa vavanuna. Andzhako ka lezvo, i no va tlhatlha va famba.
10 Zvalezvo i no nghena ngalaveni ni vapizani vakwe aya tikweni ga Dhalmanuta.+
11 A vaFarisi va no tshinela kakwe va sangula ku kanetisana naye va mu kurumeta lezvaku a va komba ciwoniso ca le tilweni, na vo mu ringa.+
12 Hikwalaho, i no hefemula hi ntamu moyeni wakwe, aku: “Hikuyini a cizukulwana leci ci nge kho ni ku lava ciwoniso?+ Ndza tiyisa, ndziku: A cizukulwana leci ci nga ta nyikiwa ciwoniso ne cin’we.”+
13 Hikwalaho, i no va tsika, a nghena kambe ngalaveni aya ka tlhelo legi gin’wani ga bimbi.
14 Kanilezvi a vapizani va no rivala ku teka tipawa; va wa nga hi na nchumu lomu ngalaveni saseka pawa yin’we basi.+
15 I no va tlharihisa, aku: “Vhulani mahlo, mu ti wonela ka comelo ga vaFarisi ni ga Herodhi.”+
16 Hikwalaho, va no sangula ku wulawulisana hi lezvi va nga hi hava tipawa.
17 Laha a nga pola lezvo, i no va wutisa ku: “Hikuyini mu wulawulisanako hi lezvi mu nga hava tipawa? Kasi a mu se zvi zwisisa ke? A zvi se dlunyateka timbilwini ta n’wina?
18 ‘Kasi hambu lezvi mu nga ni matihlo a mu woni; hambu lezvi mu nga ni tindleve a mu ingisi ke?’ A mu zvi alakanyi
19 lezvaku zvindzala zvingani mu nga tata hi zvikhemu lezvi mu nga hlengeletela, a cikhati leci ndzi nga khemelela a ntlhanu wa tipawa+ ta ku nyika lava va 5000 ke? Vaku: “I 12.”+
20 “A cikhati leci ndzi nga khemelela a 7 wa tipawa ta ku nyika a 4000 wa vavanuna, zvindzala zvingani zva hombe, zva ku tala hi zvikhemu, mu nga hlengeletela ke?” Vaku: “I 7.”+
21 Hikwalaho, i no va wutisa, aku: “A mu se zvi zwisisa?”
22 Makunu va no chikela Bhetsayidha. Kwalaho, a vanhu va no mu tisela wanuna wa cikhumu va ta mu khongotela lezvaku a mu henya.+
23 I no khoma a wanuna loye wa cikhumu hi canja a huma naye handle ka cidhoropana. Andzhako ka ku phelela matihlo yakwe,+ i no mu tlhateka mandla a mu wutisa, aku: “Wa wona nchumu ke?”
24 A wanuna i no cuwuka hehla, aku: “Ndzi wona vanhu, kanilezvi vo khwatsi tisinya ti fambako.”
25 I no tlhateka kambe mandla yakwe matihlweni ya wanuna loye, niku a wanuna loye i no wona khwatsi. I no tlheliselwa kuwona, a sangula ku zvi wona khwatsi zvontlhe.
26 Hikwalaho, i no mu tlhelisa kaya, aku: “U nga ngheni cidhoropaneni.”
27 Jesu ni vapizani vakwe va no suka vaya zvidhoropaneni zva Khezariya wa Filipi. Laha ndleleni i no wutisa vapizani vakwe, aku: “A vanhu ve hi mina mani?”+
28 Vaku kakwe: “Ve hi wena Johani Mubhabhatisi,+ kanilezvi a van’wani ve hi wena Elija,+ ni van’wani kambe ve u mun’we wa vaphrofeti.”
29 I no va wutisa, aku: “N’wina ke, mu hi mina mani?” Pedro i no mu hlamula, aku: “Hi wena Kristu.”+
30 Hikwalaho, i no va laya nguvhu lezvaku va nga byeli munhu.+
31 I no sangula ku va gondzisa lezvaku a N’wana wa munhu i ta xaniseka nguvhu, a aliwa hi madhota ni vapristi lava va tihosana ni vatsali, a dawa,+ a gumesa a vhuka andzhako ka masiku manharu.+
32 Kunene, i wa nga fihli nchumu ka mhaka leyi. Kanilezvi Pedro i no mu koka hi tlhelo a ya mu kawuka.+
33 Zvalezvo i no hundzuluka a cuwuka vapizani vakwe, a kawuka Pedro, aku: “Suka ka mina, Sathani! Hakuva a maalakanyo ya wena a hi ya Nungungulu kanilezvi ya vanhu.”+
34 Makunu i no vitana citshungu ni vapizani vakwe, aku kabye: “Loku a munhu a lava ku ndzi landzela i wa ti tsike, a rwala a mhandze yakwe ya hlomulo* a simama ku ndzi landzela.+
35 Hakuva ni wihi a lavako ku ponisa wutomi* gakwe i ta gi luza, kanilezvi loyi a luzako wutomi* gakwe hi kota ya mina ni hi kota ya mahungu ya manene, i ta gi ponisa.+
36 Hakuva zvi ta mu vhuna yini munhu a ku ganya tiko gontlhe kanilezvi a luza wutomi* gakwe ke?+
37 Kona cini leci hakunene a nga ci nyikelako kasi ku tlhatlhisa wutomi* gakwe?+
38 Hakuva loyi a dhanako hi kota ya mina ni timhaka ta mina ka cizukulwana leci ca wubhayi* ni ca kuwonha, a N’wana wa munhu yenawu i ta dhana hi yena+ a cikhati leci a tota kungangameleni ka Papayi wakwe na a hi ni tingilozi to basa.”+
Mitlhamuselo ya lahasi
^ Kutani: “na va nga gangi nchumu”.
^ Kutani: “zvirundzu”.
^ Kutani: “muhefemulo”.
^ Kutani: “muhefemulo”.
^ Kutani: “muhefemulo”.
^ Kutani: “muhefemulo”.
^ Kutani: “ci nga tsumbekiko”.
