Hi kutsala ka Matewu 11:1-30
11 Loku Jesu a mbhetile ku va nyika zvileletelo a vapizani vakwe va 12, i no suka laho a ya gondzisa ni ku chumayela madhoropeni yabye.+
2 Kanilezvi, loku Johani a zwile mitiro ya Kristu na a hi paxweni,+ i no ruma vapizani vakwe+
3 va ya mu wutisa ku: “Hi wena Loyi a Tako kutani hi fanele ku rindzela mun’wani ke?”+
4 Jesu i no va hlamula ku: “Fambani mu ya byela Johani lezvi mu zvi zwako ni lezvi mu zvi wonako, muku:+
5 A zvikhumu makunu zva wona+ ni zvilima zva famba, a vahlokonho+ va basiswa ni zviwiri zvazwa, a vafileko va vhuxiwa ni zvisiwana zva byeliwa a mahungu ya manene.+
6 Wa tsaka loyi a nga khunguvanyekiko hi kota ya mina.”+
7 A cikhati leci va nga famba, Jesu i no sangula ku wulawula ni zvitshungu hi Johani, aku: “Mu waya mu ya wona yini le ciwuleni?+ Mu wa yela ku ya wona a lihlanga li ninginisiwako hi moya ke?+
8 Makunu mu waya mu ya wona yini? A wanuna a bohileko tinguwo to saseka?* Phela lava va bohako tinguwo to saseka va lomu tindlwini ta tihosi.
9 Khwatsi-khwatsi mu wa yela yini? Mu waya mu ya wona muphrofeti? Ina, hi yena, niku wa hundza nguvhu a muphrofeti.+
10 Loyi hi yena ku tsalilweko ha yena ku: ‘Ndza rumela a cirun’wa ca mina mahlweni ka wena,* ci to ranga mahlweni ka wena ci ku longisela ndlela!’+
11 Ndza tiyisa ka n’wina, ndziku: Cikari ka lava va pswalilweko hi vavasati a ku se humelela wahombe ku hundza Johani Mubhabhatisi, kanilezvi loyi a nga mutsongwani Mufun’weni wa matilo wa hombe ku hundza yena.+
12 Kusukela masikwini ya Johani Mubhabhatisi kala nyamutlha, a vanhu va kulula va n’watseka na va lava Mufumo wa matilo, niku lava va kululako va n’watseka va wu kuma.+
13 Hakuva a Vaphrofeti vontlhe ni Nayo va phrofetile kala ka Johani;+
14 makunu loku mu zvi lava ku kholwa, yena hi ‘Elija loyi a nga wa tata’.+
15 Loyi a nga ni tindleve i wazwe.
16 “A cizukulwana leci ndzi ta ci fananisa na mani ke?+ Ci fana ni vanana va tshamileko merkadho lava va vitanako vanghana vabye,
17 vaku: ‘Hi mu bele citoliya kanilezvi a mu kinangi; hi bile huwa kanilezvi a mu ti bangi zvifuva hi hlomulo.’
18 Hizvalezvo, Johani i tile a ta tshama a ngagi ne kunwa, kanilezvi a vanhu ve ngalo: ‘I na ni dhimoni.’
19 A N’wana wa munhu i tile a taga ni kunwa,+ kanilezvi a vanhu ve: ‘I khobomu* niku cidhakwa; munghana wa vakhupisi ni vawonhi.’+ Hambulezvo, a wutlhari gi kombisa kululama* hi mitiro* ya gona.”+
20 Andzhako ka lezvo, i no sangula ku sola a madhoropa lawa a nga mahile ka wona a mitiro yakwe yo tala ya ntamu hakuva a va ti solangi, aku:
21 “Khombo ka wena Korazini na wena Bhetsayidha! Hakuva loku a mitiro ya ntamu leyi yi mahilweko ka n’wina yi wa no mahiwa le Tire ni le Sidhoni na va ti solile kale nguvhu, va boha tisakwa va tshama khumeni.+
22 Kanilezvi ndza wula ka n’wina, ndziku: Sikwini ga Kulamula, zvi ta hehuka nguvhu ka Tire ni Sidhoni a ku hundza ka n’wina.+
23 Wena ke, Kapernawume,+ ina u ta tlakuselwa tilweni ke? Kokwihi! U ta relela kala Cilahleni.*+ Hakuva loku a mitiro ya ntamu leyi yi mahilweko ka wena yi wa no mahiwa le Sodhoma, na ga ha hi kona kala nyamutlha.
24 Kanilezvi ndza wula ka wena, ndziku: Sikwini ga Kulamula, zvi ta hehuka nguvhu ka tiko ga Sodhoma a ku hundza ka wena.”+
25 Hi kota ya lezvo, Jesu i te: “Ndza ku dhumisa Papayi mahlweni ka vanhu, wena Hosi ya tilo ni misava, hakuva u fihlile a timhaka leti ka vatlharihileko ni lava va gondzileko, u ti tivekisa ka vanana va vatsongwani.+
26 Ina, Papayi, hakuva loko hi kona kurandza ka wena.
27 Papayi i ndzi nyikile zvilo zvontlhe.+ A ku na munhu a mu tivako khwatsi a N’wana, saseka Papayi.+ Ne a nga kona a mu tivako khwatsi Papayi, saseka N’wana ni loyi a N’wana a xuvako ku mu wonekelisa kakwe.+
28 Tanani ka mina n’wina n’wentlhe mu tirako yi nga chayi ni ku bindziwa, ndzi ta mu humuta.
29 Pingani a kanga wa mina mu gondza ka mina hakuva ndzi rulile niku ndzi na ni mbilu ya kutikoramisa,+ mu ta humula.*
30 Hakuva a kanga wa mina a wu gogonyi ni ndzhwalo wa mina wa vevuka.”
Mitlhamuselo ya lahasi
^ Kutani: “tinguwo ta tinene”.
^ Hi kukongoma: “ka nghohe ya wena”.
^ Kutani: “Munhu wa makolo”.
^ Kutani: “gi lweliwa”.
^ Kutani: “hi mihandzu”.
^ Kutani: “Hayidhesi”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Kutani: “mu ta pepa mihefemulweni ya n’wina”.
