Hi kutsala ka Matewu 13:1-58
-
MIFANANISO YA MUFUMO (1-52)
-
A mubyali (1-9)
-
Lezvi zvi nga maha Jesu a tirisa mifananiso (10-17)
-
A tlhamusela a mufananiso wa mubyali (18-23)
-
A trigo ni nyasavari (24-30)
-
A mbewu ya cinapi ni comelo (31-33)
-
A ku tirisa mifananiso zvi tatisa zviphrofeto (34, 35)
-
A tlhamusela a mufananiso wa trigo ni nyasavari (36-43)
-
Tshomba yi fihlilweko ni perola ga lisima (44-46)
-
A likoka (47-50)
-
Titshomba ta tiswa ni ta kale (51, 52)
-
-
Jesu a aliwa tikweni gakwe (53-58)
13 Ka siku lego, Jesu i no suka laha mutini a ya tshama mbhirini ya bimbi.
2 Ku no hlengeletana a zvitshungu zva hombe kakwe laha ka kuza yena a nghena ngalaveni a tshama; a citshungu contlhe ci no yima mbhirini ya bimbi.+
3 I no va byela zvilo zvo tala hi mifananiso,+ aku: “A mubyali i no huma a ya byala timbewu.+
4 A cikhati leci a nga kari a byala, a timbewu to kari ti no wela laha ndleleni ti se giwa hi zvinyanyani.+
5 A tin’wani ti no wela maribyeni laha ku nga hi hava misava yo enela, ti tekela ku mila hakuva a misava yi wa nga etangi.+
6 Kanilezvi laha a gambo gi nga tsuwuka, ti noswa ti wuna hakuva ti wa nga hi na timitsu.
7 A tin’wani ti no wela cikari ka mimizwa, ni mimizwa yi no kula yi ti tlimba.+
8 Ni tin’wani kambe ti no wela ka misava yo nona ti sangula ku pswala mihandzu: leyi yi pswala hi ka 100, leyi yin’wani hi ka 60, ni yin’wani hi ka 30, a ku hundza lezvi zvi nga byalilwe.+
9 Loyi a nga ni tindleve i wazwe.”+
10 Hikwalaho, a vapizani va nota kakwe, va taku: “Hikuyini u wulawulako navo hi mifananiso?”+
11 I no va hlamula, aku: “N’wina mu nyikilwe ku zwisisa a zvihundla zvo basa+ zva Mufumo wa matilo, kanilezvi vona a va nyikwangi.
12 Hakuva ni wihi loyi a nga nazvo i ta nyikiwa zvin’wani ava ni zvotala; kanilezvi loyi a nga hava nchumu, ni lezvi a nga nazvo i ta tekelwa.+
13 Hi zvalezvo zvi ndzi mahako ndzi wulawula navo hi mifananiso; hakuva va cuwuka kanilezvi va cuwuka mahala, niku vazwa kanilezvi vazwa mahala, ne a va zvi zwisisi.+
14 A ciphrofeto ca Isaya ca tatiseka kabye, leci ci nge: ‘A kuzwa mu ta zvizwa kanilezvi mu nga ta zvi zwisisa, a ku cuwuka mu ta cuwuka kanilezvi mu nga ta zvi wona.+
15 Hakuva a timbilu ta vanhu lava ti tlanyele; hi tindleve tabye vazwa kanilezvi a va mahi nchumu; va tsimbile kasi va nga tshuki va wona ne kuzwa hi tindleve tabye ne hambu ku zvi zwisisa hi timbilu tabye kasi va hundzuluka ndzi va hanyisa.’+
16 “Kanilezvi ma tsaka a matihlo ya n’wina hakuva ma wona, ni tindleve ta n’wina hakuva tazwa.+
17 Hakuva ndza tiyisa ka n’wina ndziku: A vaphrofeti vo tala ni vanhu vo lulama va wa xuva ku wona lezvi n’wina mu zvi wonako kanilezvi a va zvi wonangi,+ ni kuzwa lezvi n’wina mu zvi zwako kanilezvi a va zvi zwangi.
18 “Makunu ingiselani a mufananiso wa mubyali loyi a nga huma ku ya byala.+
19 Laha a wokari a zwako a mhaka ya Mufumo kanilezvi a nga yi zwisisi, kuta loyi wa kubiha+ a ta wutla lezvi zvi nga byaliwa mbilwini yakwe. Leyi hi leyi yi weleko laha ndleleni.+
20 Leyi yi nga wela maribyeni, hi loyi a zwako mhaka a tekela ku yi vhumela hi kutsaka;+
21 kanilezvi kota lezvi a mbewu yi nga kala ku zima timitsu kakwe, yo hanya zva cikhatana. Loku a xanisiwa ni ku vhukelwa hi kota ya mhaka i tekela ku khunguvanyeka.
22 Leyi yi nga wela cikari ka mimizwa, hi loyi a zwako mhaka kanilezvi a kukarateka ku nga tikweni* legi+ ni ntamu wa kukhohlisa wa titshomba zvi tlimba mhaka yi nga pswali mihandzu.+
23 Leyi yi nga wela ka misava yo nona hi loyi a zwako mhaka a yi zwisisa, a tlhela a pswala mihandzu: loyi i pswala hi ka 100, a mun’wani hi ka 60, ni loyi mun’wani hi ka 30, a ku hundza lezvi zvi nga byalilwe.”+
24 I no va hlawutela wun’wani mufananiso, aku: “A Mufumo wa matilo wu nga fananiswa ni munhu a nga byala a mbewu yi nene sin’wini gakwe.
25 A vanhu na va etlele, ku nota nala wakwe a ta byalawu a nyasavari cikari ka trigo, a gumesa a ti fambela.
26 Laha a tihlanga ti nga rumbuka ti sangula ku chela, ku no woneka ni nyasavari.
27 Makunu a zvitiri zva n’winyi wa muti zvi nota kakwe zvi ta mu wutisa, zviku: ‘Hosi, kasi a wu byalangi mbewu yi nene ntsena lomu sin’wini ga wena? Makunu ita hi kwihi a nyasavari loyi?’
28 I no zvi hlamula, aku: ‘I nala a nga maha lezvi.’+ A zvitiri zviku kakwe: ‘U lava ku hi ya wu hlengeletela ke?’
29 Yena aku: ‘Ahihi, ndza chava ku laha mu hlengeletelako a nyasavari mu nga tsuwula ni trigo kambe.
30 Zvi tsikeni zvi kula zvin’we kala kutshoveleni. Cikhatini ca kutshovela, ndzi ta byela vatshoveli, ndziku: A kusangula hlengeletani nyasavari mu wu boha hi tinyandza kasi a hisiwa; andzhako ka lezvo, hlengeletani trigo matshaleni ya mina.’”+
31 I no va hlawutela wun’wani mufananiso, aku: “A Mufumo wa matilo wu fana ni mbewu ya cinapi leyi a munhu a nga yi teka a yi byala sin’wini gakwe.+
32 Kunene, hi yona mbewu ya yitsongwani ka tontlhe, kanilezvi loku yi kulile yi hundza makhuho wontlhe yi maha sinya, ni zvinyanyani zva tilo zvita zvi ta zumba ka madhavi ya yona.”
33 I no va hlawutela wun’wani mufananiso, aku: “A Mufumo wa matilo wu fana ni comelo legi a wasati a nga gi vhuva ni tipimo tinharu ta hombe ta mapa kala a mapa wontlhe ma kukumuka.”+
34 Jesu i no wulawula zvilo zvontlhe lezvi ka zvitshungu hi mifananiso. Kunene, a ku na nchumu a nga va byela na a nga tirisi mufananiso,+
35 kasi ku tatisa lezvi zvi nga wulilwe hi muphrofeti, loyi a ngaku: “Ndzi ta vhulula a nomu wa mina hi mifananiso, ndzi hlawutela lezvi zvi fihlilweko kusukela kusanguleni.”*+
36 Makunu andzhako ka ku hambana ni zvitshungu, i no nghena mutini. A vapizani va nota kakwe, va taku: “Hi tlhamusele a mufananiso wa nyasavari lomu sin’wini.”
37 I no va hlamula, aku: “A mubyali wa mbewu yi nene i N’wana wa munhu;
38 a simu i tiko.+ A mbewu yi nene i vana va Mufumo, kanilezvi a nyasavari i vana va loyi wa kubiha.+
39 A nala loyi a nga ta byala nyasavari hi Dhiyabho. A kutshovela kugumesa ka tiko,* ni vatshoveli tingilozi.
40 Hikwalaho, a ku khwatsi hi lezvi a nyasavari a hlengeletwako a tlhela a hisiwa hi ndzilo, zvi ta mahisa lezvo kugumeseni ka tiko.*+
41 A N’wana wa munhu i ta rumela tingilozi takwe ti ta hlengeleta zvontlhe lezvi zvi khunguvanyisako ni vanhu lava va mahako lezvi zvi nga hiko laha nayweni ti va humesa Mufun’weni wakwe,
42 ti va hoxa lomu ka ndzhimbo* wa ndzilo.+ Kwaseyo va ta rila va getsela matino.
43 Cikhatini leco a vakululama va ta woninga a ku fana ni gambo+ Mufun’weni wa Papayi wabye. Loyi a nga ni tindleve i wazwe.
44 “A Mufumo wa matilo wu fana ni tshomba yi fihlilweko lomu sin’wini, leyi a munhu a nga yi kuma a yi fihla. Hi kota ya kutsaka i noya a ya xavisa zvontlhe a nga nazvo, a xava a simu lego.+
45 “A Mufumo wa matilo wu fana kambe ni muxavisi a fambafambako a lavetela maperola ya lisima.
46 A cikhati leci a nga kuma perola gin’we ga lisima nguvhu, i no famba a ya tekela ku xavisa zvontlhe a nga hi nazvo, a gi xava.+
47 “A Mufumo wa matilo wu fana kambe ni likoka* li petilweko bimbini li kukuta tinjhanjhi ta tixaka tontlhe.
48 A cikhati leci li nga tala, va no li kokela handle, va ta tshama hasi va sangula ku hlawulela leti ta tinene+ va ti chela zvibyeni, kanilezvi leti ti nga vhuniko nchumu+ va ti hoxa.
49 Zvi ta mahisa lezvo kugumeseni ka tiko.* A tingilozi ti ta huma ti ya hambanisa vakubiha cikari ka vakululama
50 ti va hoxa lomu ka ndzhimbo wa ndzilo. Kwaseyo va ta rila va getsela matino.
51 “Mu zvi zwisisile zvontlhe lezvi ke?” Vaku kakwe: “Ina.”
52 Aku kabye: “Loku zvi hi tano, ni wihi mugondzisi loyi a gondzisilweko xungetano hi Mufumo wa matilo i fana ni n’winyi wa muti a humesako ndlwini yakwe a titshomba ta tiswa ni ta kale.”
53 Laha Jesu a nga mbheta ku va hlawutela mifananiso leyi, i no suka laho.
54 Loku a chikele tikweni gakwe,+ i no sangula ku va gondzisa lomu sinagogeni gabye, hikwalaho va no hlamala nguvhu, vaku: “Kasi inaloyi i gi kumile kwihi a wutlhari legi ni mitiro leyi ya ntamu?+
55 Xana loyi a hi yena a n’wana wa muvatli ke?+ A mamani wakwe a hi Mariya? A vamakabye vakwe a hi Jakobe, na Josefa, na Simoni, na Judhasi ke?+
56 Ni vamakabye vakwe va cisati a hi valava vontlhe va nga na hina ke? Makunu i zvi kuma kwihi zvontlhe lezvi?”+
57 Hikwalaho, va no khunguvanyeka hi yena.+ Kanilezvi Jesu i te ngalo kabye: “A muphrofeti wa dzundziwa ni kwihi a yako, ahandle ka lomu tikweni gakwe ni mutini wakwe.”+
58 Hikwalaho, a nga mahangi mitiro yo tala ya ntamu laho hi kota ya kungakholwi kabye.
Mitlhamuselo ya lahasi
^ Zvi nga maha na zvi wula ku: “kusukela kusanguleni ka tiko”.
^ Kutani: “nguva”. Wona Tlhamuselo wa magezu ya Bhibhiliya.
^ Kutani: “nguva”. Wona Tlhamuselo wa magezu ya Bhibhiliya.
^ Kutani: “fornalha”.
^ Kutani: “juya”.
^ Kutani: “nguva”. Wona Tlhamuselo wa magezu ya Bhibhiliya.