Hi kutsala ka Matewu 14:1-36
14 Hi cikhati leco, Herodhi, a adhimistradhori wa dhistrito, i nozwa lezvi Jesu a nga kari a maha,+
2 aku ngalo ka malandza yakwe: “Loyi hi Johani Mubhabhatisi, a nga vhuxiwa hi ka vafileko, hi zvona zvi mu mahako a maha mitiro leyi ya ntamu.”+
3 Herodhi* i wa khomile Johani a mu boha, a mu vhalela paxweni hi kota ya Herodhiya, a sati wa Filipu, a makabye wakwe.*+
4 Hakuva Johani i wa tala ku mu byela ku: “A wu vhumelelwi hi nayo a ku teka Herodhiya.”+
5 Kanilezvi, hambu lezvi Herodhi a nga lava ku mu daya, i wa chava citshungu hakuva ci wa ku muphrofeti.+
6 Kanilezvi ka mubuzo wa ku tlhanganisa malembe ya kupswaliwa ka Herodhi,+ a nhanyana wa Herodhiya i no kina mahlweni ka vanhu, a mu tsakisa nguvhu Herodhi+
7 laha ka kuza a hlambanya lezvaku i ta mu nyika ni cihi a to ci kombela.
8 Makunu na a kucetelwa hi mamani wakwe, i te ngalo: “Ndzi nyike a hloko ya Johani Mubhabhatisi lomu ka bhandeja.”+
9 Hambu lezvi a hosi yi nga karateka hi kota ya lezvo, yi no laya lezvaku a nyikiwa a hloko leyo hi lezvi a nga hlambanyile ni hi kota ya lava a ngaga zvin’we navo.*
10 Hikwalaho, i no rumela mhaka paxweni ya lezvaku ku tsemiwa hloko ya Johani.
11 Va nota ni hloko lomu ka bhandeja va ta nyika nhanyana, a se famba nayo ka mamani wakwe.
12 Andzhako ka cikhati, a vapizani vakwe va no ta teka cirumbi cakwe va ya lahla; andzhako ka lezvo, va no ya hlawutela Jesu lezvi zvi nga humelela.
13 Laha Jesu a ngazwa lezvo, i no suka laho hi ngalava aya ka wutshamu ga ciwula kasi a ya tshama yece. Kanilezvi laha a zvitshungu zvi nga zvi tiva, zvi no mu landza hi minenge na zvi huma hi lomu madhoropeni.+
14 A cikhati leci a nga huma hi lomu ngalaveni, i no wona citshungu ca hombe, a va zwela wusiwana,+ a hanyisa lava va nga babya.+
15 Kanilezvi laha gi nga kari gi pela, a vapizani vakwe va nota kakwe, va taku: “A wutshamu legi ciwula niku a gambo gi pelile; tlhelisa zvitshungu zvi famba, kasi zviya zvidhoropaneni zvi ya ti xavela zvakuga.”+
16 Kanilezvi Jesu i te ngalo kabye: “Va nga fambi; va nyikeni zvakuga n’wina.”
17 Vaku kakwe: “A hi na nchumu, hova ni ntlhanu wa tipawa ni tinjhanjhi timbiri basi.”
18 Yena aku: “Tanani nazvo seno ka mina.”
19 Makunu i no byela zvitshungu lezvaku zvi tshama byanyini. Hi kulandzela, i no teka a tipawa leto ta ntlhanu ni tinjhanjhi timbiri a cuwuka tilweni a zvi katekisa.+ Andzhako ka loku a khemelele tipawa i no nyika vapizani vakwe, a vapizani va avela zvitshungu.
20 Hikwalaho, vontlhe va noga va xura, va hlengeletela a zvikhemu lezvi zvi nga sele va tata a 12 wa zvindzala.*+
21 Lava va ngaga va wa hi 5000 wa vavanuna, na ku nga hlayiwi a vavasati ni vanana.+
22 Zvalezvo i no byela vapizani vakwe lezvaku va nghena ngalaveni va ranga vaya ka mbhiri leyi yin’wani ya bimbi, yena na a ha tlhelisa zvitshungu.+
23 Andzhako ka loku a tlhelisile zvitshungu, i noya citsungeni a ya khongela na a hi yece.+ A wusiku gi noza gi tiyela na a ha hi yece kwaseyo.
24 Ka cikhati leco, a ngalava yi wa tsawukene ni misava hi mazana yo tala ya timetro* na yi biwa hi mavingo,* hakuva a moya wu waba wuya ko hambana ni lomu va ngaya kona.
25 Kanilezvi na giya kuceni,* i nota kabye na a famba hehla ka bimbi.
26 Laha a vapizani va nga mu wona na a famba hehla ka bimbi, va no dzuka, vaku: “A cigono!”, vaba huwa hi kuchava.
27 Kanilezvi Jesu i no tekela ku va angula, aku: “Tiyani hlanha! Hi mina; mu nga chavi.”+
28 Pedro i no mu hlamula, aku: “Hosi, loku ku hi wena, ndzi vitane ndzita ka wena hi hehla ka mati.”
29 Jesu aku kakwe: “Tana!” Hikwalaho, Pedro i no huma lomu ngalaveni a famba hehla ka mati aya kakwe.
30 Kanilezvi a cikhati leci a nga cuwuka a wona lezvaku a moya wa hombe i no chava. Laha a nga sangula ku mbombomela i noba huwa, aku: “Hosi, ndzi ponise!”
31 Jesu i no tekela ku nawuluta woko gakwe a mu khoma, aku: “Wena wa kukholwa kutsongwani, hikuyini u kanakanako?”+
32 Loku va nghenile ngalaveni, a moya wu no nyima.
33 Lava va nga hi lomu ngalaveni va no mu khizamela, vaku: “Hakunene u N’wana wa Nungungulu.”
34 Va no tsemakanya bimbi va chikela Genezareta.+
35 Laha a vanhu va wutshamu lego va nga pola ku hi yena, va no rumela gezu ka man’wani matshamu ya laha kusuhani. Makunu a vanhu va nota ni vontlhe lava va nga babya.
36 Va no mu khongotela, va kombela ku henya machakafula ya nguwo yakwe basi.+ Vontlhe lava va nga ma henya va wo hanya hi kumbhelela.
Mitlhamuselo ya lahasi
^ Ku nga Herodhi Antipasi. Wona Tlhamuselo wa magezu ya Bhibhiliya.
^ Kutani: “a makabye wa Herodhi”.
^ Kutani: “a nga tshamile zvin’we navo mezeni”.
^ Kutani: “zvirundzu”.
^ Hi kukongoma: “maestadhio yo tala”. A estadhio cin’we ci wa hi ni 185 m.
^ Kutani: “mabyandlati; mavimbi”.
^ Kwalomu ka 3 hora kala 6 hora ya kuca.
