Hi kutsala ka Matewu 15:1-39
15 A vaFarisi ni vatsali va ngata hi Jerusalema+ va noya ka Jesu va yaku:
2 “Hikuyini a vapizani va wena va hambunyetako a zvihena zva vakale? Hi cikombiso, a va hlambi* mandla loku va lava kuga.”+
3 I no va hlamula, aku: “Hikuyini n’winawu mu hambunyetako a nayo wa Nungungulu hi kota ya zvihena zva n’wina?+
4 Hi cikombiso, Nungungulu i te ngalo: ‘Kombisa cichavo ka papayi wa wena ni ka mamani wa wena’,+ niku: ‘Ni wihi loyi a wulawulako zvahava hi* papayi wakwe kutani mamani wakwe i wa dawe’.+
5 Kanilezvi n’wina mu ngalo: ‘Ni wihi loyi a byelako papayi wakwe kutani mamani wakwe, aku: “Ni cihi leci ndzi nga naco ndzi nga lava ku ku vhuna hi cona ndzi ci nyikele ka Nungungulu”,+
6 a zva ha faneli ku a kombisa cichavo ka papayi wakwe kutani ka mamani wakwe.’ Hikwalaho, mu chipisile a mhaka ya Nungungulu hi kota ya zvihena zva n’wina.+
7 Vakanganyisi ndzin’wina! Isaya i wa phrofeta hi n’wina a cikhati leci a ngaku:+
8 ‘A vanhu lava va ndzi dzundza hi minomu yabye, kanilezvi a timbilu tabye ti kule nguvhu na mina.
9 Va ndzi khozela mahala, hakuva a zvigondzo lezvi va zvi gondzisako zvileletelo zva vanhu.’”+
10 I no vitana citshungu aku ka cona: “Zwanani mu tlhela mu zvi zwisisa:+
11 Lezvi zvi bihisako munhu a hi lezvi zvi nghenako non’wini wakwe, kanilezvi lezvi zvi humako hi non’wini wakwe hi zvona zvi mu bihisako.”+
12 Makunu a vapizani va nota kakwe va taku: “Wa zvi tiva ku a vaFarisi va khunguvanyekile hi kuzwa lezvi u nga wula?”+
13 I no va hlamula, aku: “Ni yihi sinya yi nga kala ku byaliwa hi Papayi wa mina wa le tilweni yi ta tsuwuliwa.
14 Va tsikeni. Zvikhumu zvi rangelako zvikhumu-kuloni. Makunu loku a cikhumu ci rangela cikhumu, hi wumbiri ga zvona zvi ta wela nkeleni.”+
15 Pedro aku ngalo kakwe: “Hi tlhamusele a mufananiso lowu.”
16 I te ngalo: “Kasi n’winawu a mu se zvi zwisisa?+
17 A mu zvi tivi ku ni cihi ci nghenako non’wini ci hundza hi lomu khwirini ci gumesa ciya cikoti?
18 Kanilezvi, ni cihi leci ci humako hi lomu non’wini cita hi mbilwini. A zvilo lezvo hi zvona zvi bihisako munhu.+
19 Hi lomu mbilwini ku huma maalakanyo ya kubiha:+ a kudaya, ni wubhayi,* ni kuyiva, ni kuhemba ni kurukatela.
20 Lezvi hi zvona zvi bihisako munhu, kanilezvi a kuga na u nga hlambangi* mandla a zvi bihisi munhu.”
21 Jesu i no suka hi laho aya Tire ni Sidhoni.+
22 Makunu ku nota wasati wa muFenikiya* hi tikweni lego a ta mu rilela, aku: “Hosi, N’wana wa Dhavhidha, ndzi mahele wuxinji. A nhanyana wa mina i na ni dhimoni gi mu xanisako nguvhu.”+
23 Kanilezvi a nga mu hlamulangi. Hikwalaho, a vapizani vakwe va nota va ta mu khongotela, vaku: “Mu byele a famba hakuva wa hi kulumela.”
24 I no hlamula, aku: “A ndzi rumelwangi ka vanhu vontlhe, kanilezvi ndzi rumelwe ntsena ka tiyivhu ti lahlekileko ta yindlu ya ka Izrayeli.”+
25 Kanilezvi a wasati i nota a ta mu khizamela, aku: “Hosi, ndzi vhune!”
26 I no mu hlamula, aku: “A zvi ringani ku teka pawa ya vanana u nyika zvimbyanana.”
27 A wasati aku ngalo: “Hi zvona Hosi, kanilezvi a zvimbyanana zvaga a matlhatlha lawa ma wako hi laha mezeni ya venyi va zvona.”+
28 Jesu aku kakwe: “Wasati, a kukholwa ka wena ka hombe; a zvi maheke ka wena lezvi u zvi kombelako.” Zvalezvo a nhanyana wakwe i no hanya.
29 Jesu i no suka laho aya kusuhani ni Bimbi ga Galileya;+ i no kandziha citsungeni a tshama.
30 Ku nota kakwe a zvitshungu zva hombe zvi ngata ni zvilima, ni zvigulani, ni zvikhumu, ni lava vo kala ku wulawula ni van’wani vo tala, va ta va veka mikondzweni yakwe, a va hanyisa.+
31 Hikwalaho, a citshungu ci no tsaka nguvhu hi ku wona lava va nga kala va nga wulawuli na va wulawula, a zvigulani na zvi hanyiswa, a zvilima na zvi famba, ni zvikhumu na zvi wona; va no dhumisa Nungungulu wa Izrayeli.+
32 Jesu i no vitana vapizani vakwe aku kabye: “Ndza ci zwela wusiwana a citshungu leci,+ hakuva va tshamile masiku manharu na mina, niku a va ha hi na ca kuga. A ndzi zvi lavi ku va tlhelisa ni ndlala* hakuva va nga famba va sika hi ndlela.”+
33 Kanilezvi a vapizani va te ngalo kakwe: “Hi ta ti kuma kwihi tipawa lomu ciwuleni hi nga kona ti ringanako ku xurisa a citshungu co kota leci?”+
34 Jesu aku ngalo kabye: “Tipawa tingani mu nga nato?” Vaku: “I 7 ni zvinjhanjhana zvi tsongwani basi.”
35 Hikwalaho, andzhako ka ku byela citshungu lezvaku ci tshama hasi,
36 i no teka a tipawa leto ta 7 ni tinjhanjhi a khongela. Loku a khemelele, i no nyika vapizani, a vapizani va avela zvitshungu.+
37 Vontlhe va noga va xura, va hlengeletela a zvikhemu lezvi zvi nga sele va tata 7 wa zvindzala* zva hombe.+
38 Lava va ngaga va wa hi 4000 wa vavanuna, na ku nga hlayiwi a vavasati ni vanana.
39 Andzhako ka ku tlhelisa zvitshungu, i no nghena ngalaveni aya tlhelweni ga Magadhani.+
Mitlhamuselo ya lahasi
^ Ku nga ku ti basisa hi kuya hi nayo.
^ Kutani: “a rukatelako”.
^ Hi ciGreki: porneía. Wona Tlhamuselo wa magezu ya Bhibhiliya.
^ Ku nga ku kala ku ti basisa hi kuya hi nayo.
^ Kutani: “muKhanani”.
^ Kutani: “na va nga gangi nchumu”.
^ Kutani: “zvirundzu”.