Hi kutsala ka Matewu 16:1-28
16 A vaFarisi ni vaSadhusi va nota kakwe va ta mu ringa, va mu kombela lezvaku a va komba ciwoniso ca le tilweni.+
2 I no va hlamula, aku: “Loku gi phuma, mu ngalo: ‘Gi taca khwatsi hakuva a tilo gi pswhukile’,
3 ni mixo muku: ‘Nyamutlha ku ta titimela ku tlhela kuna vhula hakuva a tilo gi pswhukile na gi hi ni marefu.’ Ma zvi tiva ku tlhamusela a matshamela ya tilo, kanilezvi a mu zvi koti ku tlhamusela a zviwoniso zva zvikhati.
4 N’wina cizukulwana co biha ni ci nga tsumbekiko,* mu kho ni ku lava ciwoniso, kanilezvi a ku na ciwoniso mu to nyikiwa,+ ahandle ka ciwoniso ca Jona.”+ Hikwalaho, i no va siya kwalaho a famba.
5 A vapizani va no tsemakanya vaya ka tlhelo legi gin’wani ga bimbi, kanilezvi va no rivala ku teka tipawa.+
6 Jesu aku kabye: “Vhulani mahlo, mu ti wonela ka comelo ga vaFarisi ni vaSadhusi.”+
7 Hikwalaho, va no sangula ku wulawulisana, vaku: “A hi tekangi tipawa.”
8 Laha Jesu a nga zvizwa, i te ngalo kabye: “Hikuyini mu nge a mu tekangi tipawa, n’wina va kukholwa kutsongwani?
9 Kasi a mu se zvi zwisisa? A ma ha ti alakanyi a ntlhanu wa tipawa leti ti nga gisa a 5000 wa vanhu ni ku zvindzala* zvingani mu nga rolela ke?+
10 Kona a mu no rivala a 7 wa tipawa leti ti nga gisa a 4000 wa vanhu ni ku zvindzala* zvingani zva hombe mu nga rolela ke?+
11 Hikuyini mu kalako mu nga se zvi zwisisa lezvaku a ndzi wuli tipawa? Kanilezvi ti woneleni ka comelo ga vaFarisi ni vaSadhusi.”+
12 Makunu hi kona va nga zvi zwisisa lezvaku i wa nga wuli ku va fanele ku ti wonela ka comelo ga tipawa, kanilezvi ka tigondzo ta vaFarisi ni vaSadhusi.
13 Loku Jesu a chikele Khezariya wa Filipi, i no wutisa vapizani vakwe, aku: “A vanhu ve hi yena mani a N’wana wa munhu ke?”+
14 Vaku kakwe: “A vokari ve hi Johani Mubhabhatisi,+ a van’wani vaku hi Elija,+ ni van’wani kambe ve hi Jeremiya kutani mun’we wa vaphrofeti.”
15 Yena aku kabye: “N’wina ke, mu hi mina mani?”
16 Simoni Pedro i no hlamula, aku: “Hi wena Kristu,+ a N’wana wa Nungungulu a hanyako.”+
17 Jesu i no mu hlamula, aku: “U katekile* wena Simoni n’wana Jona, hakuva a hi nyama ni nkhata zvi* nga ku vhululela ku tiva a mhaka leyi, kanilezvi hi Papayi wa mina loyi a nga le matilweni.+
18 Ndza wula kambe ka wena, ndziku: Wena u Pedro.+ Hehla ka ribye legi+ ndzi ta aka bandla ga mina, niku a tinyangwa ta Cilahla* ti nga ta gi hlula.
19 Ndzi ta ku nyika makhiya ya Mufumo wa matilo. Ni cihi leci u to ci boha laha misaveni ci tava ci bohilwe matilweni, niku ni cihi u to ci tlhatlha laha misaveni ci tava ci tlhatlhilwe matilweni.”
20 Andzhako ka lezvo, i no va laya nguvhu a vapizani lezvaku va nga byeli munhu a ku hi yena Kristu.+
21 Kusukela kwalaho, Jesu i no sangula ku tlhamusela vapizani vakwe lezvaku i fanele kuya Jerusalema a ya xaniseka nguvhu mandleni ya madhota ni vapristi lava va tihosana ni vatsali, a dawa, a gumesa a vhuxiwa hi siku ga wunharu.+
22 Laha Pedro a ngazwa lezvo, i no mu koka hi tlhelo a ya mu kawuka, aku: “Hosi, u nga alakanyi lezvo. A zvilo lezvo zvi nga ta tshuka zvi maheka ka wena.”+
23 Kanilezvi i no fularela Pedro, aku kakwe: “Suka ka mina, Sathani! U cikhunguvanyiso ka mina, hakuva a maalakanyo ya wena a hi ya Nungungulu kanilezvi ya vanhu.”+
24 Andzhako ka lezvo, Jesu i no byela vapizani vakwe, aku: “Loku munhu a lava ku ndzi landzela i wa ti tsike, a rwala a mhandze yakwe ya hlomulo* a simama ku ndzi landzela.+
25 Hakuva ni wihi a lavako ku ponisa wutomi* gakwe i ta gi luza, kanilezvi loyi a luzako wutomi* gakwe hi kota ya mina i ta gi kuma.+
26 Hakuva zvi ta mu vhuna yini munhu a ku ganya tiko gontlhe kanilezvi a luza wutomi* gakwe ke?+ Kona cini ca ku a nga ci nyikela kasi ku tlhatlhisa wutomi* gakwe?+
27 Hakuva a N’wana wa munhu i tata kungangameleni ka Papayi wakwe na a hi ni tingilozi takwe, a ta tlhelisela mun’we ni mun’wani hi kuya hi mitiro yakwe.+
28 Ndza tiyisa ka n’wina, ndziku: Ku na ni vokari va yimileko laha va to kala ku ringa kufa kala va wona N’wana wa munhu na ata Mufun’weni wakwe.”+
Mitlhamuselo ya lahasi
^ Hi kukongoma: “ca wubhayi”.
^ Kutani: “zvirundzu”.
^ Kutani: “zvirundzu”.
^ Kutani: “hakuva a hi munhu a”.
^ Hi kukongoma: “Wa tsaka”.
^ Kutani: “Hayidhesi”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Kutani: “muhefemulo”.
^ Kutani: “muhefemulo”.
^ Kutani: “muhefemulo”.
^ Kutani: “muhefemulo”.
