Hi kutsala ka Matewu 17:1-27
17 Andzhako ka 6 wa masiku, Jesu i no teka Pedro, na Jakobe, ni makabye wakwe Johani a famba navo citsungeni co leha na va hi voce.+
2 I no hundzuka mahlweni kabye; a nghohe yakwe yi no woninga ku fana ni gambo, ni tinguwo takwe ti phatima* a ku khwatsi kuwonekela.+
3 Ku no woneka kabye Mosi na Elija na va bhula naye.
4 Pedro i te ngalo ka Jesu: “Hosi, zva hi tsakisa a ku tshama laha. Loku u zvi lava, ndzi nga gwimba matenda manharu: a gin’we ga wena, a gin’we ga Mosi ni gin’wani ga Elija.”
5 Na a ha wulawula, va no fenengetwa hi refu go ngangamela, ku zwala gezu hi lomu refini, giku: “Loyi i N’wana wa mina ndzi mu randzako, loyi ndzi xalalako hi yena.+ Mu ingiseni.”+
6 Laha va ngazwa lezvo, a vapizani va nowa lahasi hi tinghohe va chava nguvhu.
7 Jesu i no tshinela kabye, a va henya, aku: “Vhukani. Mu nga chavi.”
8 A cikhati leci va nga cuwuka hehla, a va wonangi munhu, sine Jesu yece.
9 Laha va nga kari va relela hi citsungeni, Jesu i no va laya, aku: “Mu nga byeli munhu a muwoniso lowu kala a N’wana wa munhu a vhuxiwa hi ka vafileko.”+
10 Kanilezvi a vapizani va no mu wutisa, vaku: “Makunu, hikuyini a vatsali va nge ku ta ranga hi Elija ata?”+
11 Yena aku kabye: “Kunene Elija wata, a ta vhuxeta zvilo zvontlhe.+
12 Hambulezvo, ndza mu byela, ndziku: Elija i sina a tile kanilezvi a va mu tivangi; va mahile ni cihi va nga ci lava laha kakwe.+ A N’wana wa munhu yenawu i ta xaniseka mandleni yabye.”+
13 Makunu a vapizani va no zvi zwisisa lezvaku i wa wulawula hi Johani Mubhabhatisi.
14 A cikhati va nga chikela laha ku nga hi ni citshungu,+ ku nota wanuna wo kari a ta mu khizamela, aku:
15 “Hosi, mu mahele wuxinji a mufana wa mina hakuva i na ni nyokani niku ya mu xanisa nguvhu. I tala ku wela laha ndzilweni ni lomu matini.+
16 Ndzi tile naye ka vapizani va wena kanilezvi a va zvi kotangi ku mu hanyisa.”
17 Jesu i no hlamula, aku: “N’wina cizukulwana ci nga kholwiko ni co gombonyeka,+ ndzi ta simama na n’wina kala rini? Ndzi ta mu timisela kala rini? Tanani naye laha ka mina.”
18 Makunu Jesu i no hlongola dhimoni gi huma ka mufanyana loye; zvalezvo a mufanyana i no hanya.+
19 Andzhako ka lezvo, a vapizani va noya ka Jesu na va hi voce va yaku: “Hikuyini hina hi nga zvi tsandzeka ku gi hlongola?”
20 Aku kabye: “Hi lezvi a kukholwa ka n’wina ku nga kutsongwani. Ndza tiyisa ka n’wina, ndziku: Loku mu hi ni kukholwa ko ringana ni mbewu ya cinapi mu ta wula ka citsunga leci muku: ‘Kunuka laha uya le’, ci ta kunuka; a ku na leci ci to mu tsandza.”+
21 *——
22 Laha va nga tlhangene le Galileya, Jesu i te ngalo kabye: “A N’wana wa munhu i ta nyikelwa mandleni ya vanhu+
23 va mu daya, kanilezvi hi siku ga wunharu, i ta vhuxiwa.”+ A vapizani va no karateka nguvhu.
24 Andzhako ka loku va chikele Kapernawume, a vavanuna lava va nga hlengisa a khupo wa tidrakma timbiri* va no tshinela ka Pedro, vaku: “A mugondzisi wa n’wina a nga humesi a khupo wa tidrakma timbiri ke?”+
25 Yena aku: “Wa humesa.” Kanilezvi a cikhati leci a nga nghena lomu ndlwini, Jesu i no wulawula na Pedro kuranga, aku: “U alakanya yini Simoni? A tihosi ta misava ti amukela hi ka vamani a ndzuvo* kutani a khupo ke? Hi ka vana vabye kutani hi ka vambe vanhu ke?”
26 Laha a ngaku: “Hi ka vambe vanhu”, Jesu i te ngalo kakwe: “Makunu-ke, hakunene a vana va tlhatlhekile ka khupo.
27 Kanilezvi kasi hi nga va khunguvanyisi,+ famba bimbini u ya hoxela cimemba* u teka a njhanjhi yo sangula u to phasa. Laha u to vhulula a nomu wa yona, u ta kuma cingerengere ca prata.* Teka u va nyika kota khupo wa mina ni wa wena.”
Mitlhamuselo ya lahasi
^ Kutani: “ti basa”.
^ Kutani: “tributo”, wona laha kaku: “ndzuvo” ka Tlhamuselo wa magezu ya Bhibhiliya.
^ Kutani: “cilowe”.
