Hi kutsala ka Matewu 18:1-35
18 Ka cikhati leco, a vapizani va no tshinela ka Jesu, vaku: “Himani loyi hakunene a nga wahombe Mufun’weni wa matilo?”+
2 Makunu i no vitana cin’wanana a ta ci yimisa cikari kabye,
3 aku: “Ndza tiyisa ka n’wina, ndziku: Loku mu nga cici mu fana ni zvivanana,+ mu nga ta tshuka mu nghena Mufun’weni wa matilo.+
4 Hikwalaho, ni wihi loyi a to ti koramisa a fana ni cin’wanana leci hi yena a nga wahombe Mufun’weni wa matilo;+
5 ni loyi a amukelako a cin’wanana co kota leci hi kota ya vito ga mina i amukela na minawu.
6 Kanilezvi loyi a khunguvanyisako a mun’we wa lava va vatsongwani va kholwako ka mina, zvi wa tava chukwana ku a bohelelwa ribye ga cigayo nhan’wini yakwe a rikhiswa bimbini.+
7 “Khombo ka tiko hi kota ya zvikhunguvanyiso zva gona! Kunene, a zvi koteki lezvaku a zvikhunguvanyiso zvi ngati, kanilezvi khombo ka munhu loyi a cikhunguvanyiso ci tako hi ka yena!
8 Hikwalaho, loku a canja ga wena kutani nkondzo wa wena wu ku maha u wonha,* zvi tseme u zvi hoxa kule.+ I chukwana a ku nghena wutomini na u hi cilima kutani na u khwita a ku hundza ku hoxiwa ndzilweni wa pindzukelwa na u hi ni mandla mambiri kutani mikondzo yimbiri.+
9 Ni loku a tihlo ga wena gi ku maha u wonha,* gi xokole u gi hoxa kule. Hakuva i chukwana a ku nghena wutomini ni tihlo gin’we a ku hundza ku hoxiwa Gehena* gi vhurako na u hi ni matihlo mambiri.+
10 Mu nga tshuki mu kanyisa a mun’we wa lava va vatsongwani, hakuva ndza wula ka n’wina, ndziku: A tingilozi tabye ti nga le tilweni contlhe cikhati ta wona nghohe ya Papayi wa mina a nga le tilweni.+
11 *——
12 “Mu zvi wonisa kuyini? Loku a munhu a hi ni 100 wa tiyivhu ku lahleka yin’we,+ a nga ta siya leti ta 99 zvitsungeni a famba a lavetela leyi yi nga lahleka ke?+
13 Loku a yi kuma, ndza tiyisa ka n’wina, ndziku: I tsaka nguvhu hi yona a ku hundza leti ta 99 ti nga kala ku lahleka.
14 Hi zvalezvo, a hi kurandza ka Papayi wa mina* a nga le tilweni lezvaku ku lova ni mun’we wa lava va vatsongwani.+
15 “Ahandle ka lezvo, loku a makabye wa wena a ku wonhela famba u ya bhula naye hi cihoxo cakwe* na mu hi n’wece va vambiri.+ Loku a ku ingisa, u mu kumile a makabye wa wena.+
16 Kanilezvi loku a nga ku ingisi, famba u ya bhula naye na u hi ni mun’wani munhu kutani vambiri, kasi ni yihi mhaka yi fela ku tiyisiwa hi nomu wa vakustumunyu vambiri kutani vanharu.+
17 Loku a nga va ingisi, byela bandla. Loku a nga ingisi ne ni bandla, mu wonise ku khwatsi munhu wa matiko+ ni mukhupisi.+
18 “Ndza tiyisa ka n’wina ndziku: Zvontlhe lezvi mu to zvi boha laha misaveni zvi tava zvi bohilwe le tilweni, ni zvontlhe lezvi mu to zvi tlhatlha laha misaveni zvi tava zvi tlhatlhilwe le tilweni.
19 Ndza tiyisa kambe ka n’wina, ndziku: Loku a vambiri cikari ka n’wina va vhumelelana ku kombela nchumu wa lisima, a Papayi wa mina wa le tilweni i ta va nyika.+
20 Hakuva laha ku tlhangeneko vanhu vambiri kutani vanharu hi kota ya vito ga mina,+ ndzi kona kwalaho cikari kabye.”
21 Makunu Pedro i nota kakwe, a taku: “Hosi, makhati mangani ndzi faneleko ku tsetselela a makabye wa mina loku a ndzi wonhela? Kala 7 wa makhati ke?”
22 Jesu aku kakwe: “A ndzi ku byeli ku kala 7 wa makhati, kanilezvi kala 77 wa makhati.+
23 “Hi cigelo leco, a Mufumo wa matilo wu nga fananisiwa ni hosi yi nga lava ku londza mangava ka malandza ya yona.
24 A cikhati leci yi nga sangula ku maha lezvo, va no yi tisela wanuna a nga yi dhevha a 10 000 wa titalenta.*
25 Kanilezvi, kota lezvi a nga hi hava co hakhela hi cona, a hosi yakwe yi no laya lezvaku a xavisiwa, yena, ni sati wakwe, ni vana vakwe ni zvontlhe a nga hi nazvo, kasi ku hakhela mangava lawo.+
26 Hikwalaho, a nandza gi no mu khizamela gi mu khongotela, giku: ‘Ndzi timiselele, ndzi ta ku hakhela zvontlhe ndzi ku dhevhako.’
27 Hi kota ya lezvo, a hosi ya nandza lego yi no gi zwela wusiwana yi gi tsika gi famba, yi gi tsetselela a mangava ya gona.+
28 Kanilezvi a nandza lego gi no ya kuma nandza-kulobye, legi gi nga gi dhevha a 100 wa tidhenario,* gi gi khoma, gi gi tlimba nkolo, giku: ‘Ndzi hakhele zvontlhe u ndzi dhevhako.’
29 Hikwalaho, a nandza legi gi no mu khizamela gi sangula ku mu khongotela, giku: ‘Ndzi timiselele, ndzi ta ku hakhela.’
30 Hambulezvo, a nga vhumelangi, kanilezvi i no gi nyikela gi vhalelwa paxweni kala gi hakhela mangava wontlhe.
31 Laha a malandza lawa man’wani ma nga zvi wona, ma no bayiseka nguvhu, ma ya hlawutela hosi ya wona zvontlhe lezvi zvi nga maheka.
32 Makunu a hosi yi no vitanisa nandza lego, yi taku ka gona: ‘Nandza go biha, ndzi ku tsetselele mangava ya wena wontlhe a cikhati leci u nga ndzi khongotela.
33 U wa nga fanelangi ku gi mahela wuxinji a nandza-kuloni a ku fana ni lezvi mina ndzi nga ku mahela wuxinji ke?’+
34 Hi kota ya lezvo, a hosi yi no zangara nguvhu, yi gi vhalela paxweni* kala gi hakhela mangava wontlhe.
35 A Papayi wa mina wa le tilweni yenawu i ta mu maha lezvo+ loku a mun’we ni mun’wani wa n’wina a nga tsetseleli a makabye wakwe hi mbilu yontlhe.”+
Mitlhamuselo ya lahasi
^ Kutani: “wu ku phinganyeta”.
^ Kutani: “gi ku maha u ti phinganyeta”.
^ Zvi nga maha na zvi wula ku: “wa n’wina”.
^ Hi kukongoma: “famba u ya mu kawuka”.
^ Hi kukongoma: “yi gi nyikela ka vagadhi va paxo”.
