Hi kutsala ka Matewu 19:1-30
19 A cikhati leci Jesu a nga mbheta ku wulawula timhaka leti, i no suka Galileya a tlhatuka Jordhani aya mimbhinganweni ya Judhiya.+
2 I no landzelwa hi zvitshungu zva hombe, a zvi hanyisa ka wutshamu lego.
3 A vaFarisi, na va lava ku mu ringa, va nota kakwe va ta mu wutisa, vaku: “Zva vhumelelwa hi nayo ku a wanuna a tlhatlha wukati* ni sati wakwe hi ni yihi mhaka ke?”+
4 I no hlamula, aku: “Kasi a mu se gondza lezvaku loyi a va vangileko kusanguleni i no maha wanuna ni wasati,+
5 aku: ‘Hi cigelo leco, a wanuna i ta siya papayi wakwe ni mamani wakwe a namarela ka sati wakwe, lava vambiri va tava nyama yin’we’ ke?+
6 Makunu a va ha hi vambiri, kanilezvi i nyama yin’we. Hikwalaho, lezvi Nungungulu a zvi tlhanganisileko, zvi nga hambanisiwi hi munhu.”+
7 Vaku kakwe: “Makunu, hikuyini Mosi a nga laya lezvaku a wanuna a mu nyika papilo ga ku tlhatlha wukati* a tlhela a mu hlongola?”+
8 Yena aku kabye: “Mosi i mu vhumelele ku tlhatlha wukati* ni vasati va n’wina hi kota ya kunonoha ka timbilu ta n’wina,+ kanilezvi zvi wa nga tshamisangi lezvo kusanguleni.+
9 Ndza mu byela, ndziku: Ni wihi loyi a tlhatlhako wukati* ni sati wakwe ahandle ka wubhayi,* a chadha ni mun’wani, wa maha wubhayi.”+
10 A vapizani vaku kakwe: “Loku a mhaka ya wanuna ni sati wakwe yi tshamisile lezvo, i chukwana ku nga chadhi.”
11 Yena aku kabye: “A hi vontlhe va zvi kotako ku maha lezvo, ntsena lava va nyikilweko.+
12 Hakuva ku na ni mithenwa yi nga pswalisiwa zvalezvo, ni mithenwa leyi yi nga mahiwa hi vanhu, ni lava va ti mahako mithenwa hi kota ya Mufumo wa matilo. Loyi a zvi kotako ku maha lezvo i wa mahe.”+
13 Andzhako ka lezvo, va no mu tela ni vanana kasi a ta va tlhateka mandla a va khongelela, kanilezvi a vapizani va no va bhongela.+
14 Hambulezvo, Jesu i te ngalo: “Tsikani vanana, mu nga va beteli kuta ka mina, hakuva a Mufumo wa matilo wu lumba vanhu vo kota vona.”+
15 I no va tlhateka mandla a gumesa a suka laho.
16 Makunu ku nota wokari a taku kakwe: “Mugondzisi, zvini zva zvinene ndzi faneleko ku maha kasi ndzi kuma wutomi ga pindzukelwa?”+
17 Aku kakwe: “Hikuyini u ndzi wutisako hi lezvi zvi nga zvinene? Mun’we ntsena a nga munene.+ Hambulezvo, loku u lava ku nghena wutomini, simama ku ingisa milayo.”+
18 A munhu loye aku: “Yihi ya kona?” Jesu aku: “U nga dayi,+ u nga mahi wubhayi,+ u nga yivi,+ u nga nyiki wukustumunyu ga mawunwa,+
19 kombisa cichavo ka papayi wa wena ni ka mamani wa wena,+ niku randza muakelani wa wena a ku fana ni lezvi u ti randzisako zvona.”+
20 A jaha lego giku kakwe: “Ndza maha zvontlhe lezvo; ndza ha kiyelelwa hi yini?”
21 Jesu i te ngalo kakwe: “Loku u lava ku mbhelela, famba u ya xavisa lezvi u nga nazvo u teka mali ya kona u nyika zvisiwana; u tava ni tshomba tilweni.+ Andzhako ka lezvo, tana u ta maha mulandzeli wa mina.”+
22 A cikhati leci a jaha lego gi ngazwa lezvo, gi no suka gi famba na gi bayisekile hakuva gi wa ganyile nguvhu.+
23 Jesu aku ka vapizani vakwe: “Ndza tiyisa ka n’wina, ndziku: Zvi ta karata lezvaku a munhu wo ganya a nghena Mufun’weni wa matilo.+
24 Ndza wula kambe ka n’wina, ndziku: Zva olova ku a kameli gi nghena non’wini wa chingani a ku hundza ku a munhu wo ganya a nghena Mufun’weni wa Nungungulu.”+
25 Laha a vapizani va ngazwa lezvo, va no hlamala nguvhu, vaku: “Himani hakunene wa ku a nga ponisiwa?”+
26 Jesu i no va cuwuka tinghoheni tabye, aku: “Ka vanhu a zvi koteki, kanilezvi ka Nungungulu a zvilo zvontlhe zva koteka.”+
27 Pedro aku: “Hi siyile zvilo zvontlhe hi ku landzela. Wu tava wihi a nchachazelo wa hina?”+
28 Jesu aku kabye: “Ndza tiyisa ka n’wina, ndziku: A cikhati leci zvontlhe zvi to vhuxetwa luswa, laha a N’wana wa munhu a to tshama citshan’wini cakwe ca wuhosi co ngangamela, n’wina lava mu ndzi landzelako mu ta tshama ka 12 wa zvitshamu zva wuhosi mu lamula a 12 wa tixaka ta ka Izrayeli.+
29 Ni wihi loyi a siyileko tiyindlu, kutani vamakabye, kutani papayi, kutani mamani, kutani vana, kutani mipetso hi kota ya vito ga mina, i ta amukela zvilo lezvo hi ka 100 ni ku hundza, a tlhela a kuma tshomba ya wutomi ga pindzukelwa.+
30 “Kanilezvi a kutala ka lava va nga vo sangula va ta maha vo gumesa, niku lava vo gumesa va ta maha vo sangula.+
Mitlhamuselo ya lahasi
^ Kutani: “a maha divórcio”.
^ Kutani: “ga divórcio”.
^ Kutani: “ku maha divórcio”.
^ Kutani: “a mahako divórcio”.
^ Hi ciGreki: porneía. Wona Tlhamuselo wa magezu ya Bhibhiliya.