Hi kutsala ka Matewu 20:1-34
20 “Hakuva a Mufumo wa matilo wu fana ni n’winyi wa muti loyi a nga huma ni mixo a ya thola vatiri kasi va ta tira civhineni* cakwe.+
2 Loku a vhumelelene ni vatiri lezvaku i ta va holisa dhenario* hi siku, i no va rumela civhineni cakwe.
3 Laha a nga huma kambe kwalomu ka hora ya wunharu,* i no wona van’wani va nga yimile merkadho na va nga tiri nchumu,
4 aku kabye: ‘N’winawu fambani civhineni ca mina. Ndzi ta mu holisa, ndzi nga ta mu kalavela.’
5 Hikwalaho, va no famba. I no huma kambe kwalomu ka hora ya wu 6* ni ya wu 9* a ya maha zvalezvo.
6 Hi kugumesa, i no huma kwalomu ka hora ya wu 11* a ya kuma van’wani na va yimile, aku kabye: ‘Hikuyini mu yimileko laha siku gontlhe na mu nga tiri nchumu?’
7 Va no hlamula, vaku: ‘Hi ku i hava a nga hi thola.’ Aku kabye: ‘N’winawu fambani civhineni ca mina.’
8 “Loku gi pelile, a n’winyi wa civhina i no byela a muwoneleli wa vatiri, aku: ‘Vitana vatiri u ta va hakhela a muholo wabye.+ Sangula hi lava vo gumesa, u gumesa hi lava vo sangula.’
9 A cikhati leci lava va hora ya wu 11 va nga chikela, a mun’we ni mun’wani wabye i no amukela a dhenario.*
10 Hikwalaho, a cikhati leci lava vo sangula va nga chikela, va wa alakanya lezvaku va ta amukela yo tala, kanilezvi vonawu a mun’we ni mun’wani i no amukela a muholo wa dhenario.*
11 Loku va amukele, va no sangula ku khala ka n’winyi wa muti,
12 vaku: ‘Vainalava vo gumesa va tirile a hora yin’we basi, hambulezvo u va fananisile na hina hi nga koroka siku gontlhe laha mun’wini!’
13 Kanilezvi i te ngalo ka mun’we wabye: ‘Munghana, a ndzi ku kalaveli. Hi bhulile hi dhenario,* a hi zvona ke?+
14 Teka zva wena u famba. Ndzi lava ku nyika loyi wo gumesa a muholo wo fana ni lowu ndzi nga ku nyika.
15 A ndzi na fanelo ya ku maha lezvi ndzi zvi lavako hi zvilo zva mina? A tihlo ga wena a gova ni matshoho* hi lezvi ndzi nga munene* ke?’+
16 Hizvalezvo, a vo sangula va tava vo gumesa ni vo gumesa vava vo sangula.”+
17 Na va kandziha vaya Jerusalema, Jesu i no koka a vapizani vakwe va 12 hi tlhelo, aku kabye:+
18 “Ma zvi wona! Hiya Jerusalema. A N’wana wa munhu i ta nyikelwa mandleni ya vapristi lava va tihosana ni vatsali. Va ta mu konela ku dawa,+
19 va mu nyikela ka vamatiko lezvaku va mu poyila ni ku muba va gumesa va mu daya laha mhandzeni,+ kanilezvi hi siku ga wunharu i ta vhuxiwa.”+
20 Andzhako ka lezvo, a mamani wa vana va Zebhedhi+ i no tshinela kakwe na a hi ni vana vakwe, a mu khizamela, a mu kombela nchumu.+
21 Jesu aku kakwe: “U lava yini?” Yena aku: “Laya lezvaku a vana va mina lava va vambiri va tshama Mufun’weni wa wena, a mun’we reveni ga wena ga cinene ni mun’wani reveni ga wena ga cibhabha.”+
22 Jesu i no hlamula, aku: “A mu ci tivi leci mu ci kombelako. Mu nganwa a kopo leyi ndzi lavako kunwa ke?”+ Vona vaku: “Ina.”
23 Yena aku kabye: “Kunene mu tanwa a kopo ya mina,+ hambulezvo a ku tshama reveni ga mina ga cinene ni ga cibhabha a zvi ntan’wini wa mina a ku mu nyika. A matshamu lawo ma lumba lava va longiselelweko wona hi Papayi wa mina.”+
24 A cikhati leci lava van’wani va 10 va nga zvizwa, va no zangarela a va ka makabye lava va vambiri.+
25 Kanilezvi Jesu i no va vitana vata kakwe, a taku: “Ma zvi tiva lezvaku a tihosi ta matiko ta bindzisela lava ti va fumelako, niku a vahombe vabye a va va nyenyeleti.+
26 N’wina mu nga mahisi lezvo;+ kanilezvi ni wihi loyi a lavako kuva wahombe cikari ka n’wina i fanele kuva citiri ca n’wina,*+
27 ni loyi a lavako kuva wo sangula cikari ka n’wina i fanele kuva khumbi ya n’wina.+
28 A ku khwatsi hi lezvi a N’wana wa munhu a tileko, na a nga teli ku ta tirelwa, kanilezvi a ku ta tirela+ ni ku nyikela wutomi* gakwe kota hakhelo ya ku tlhatlhisa votala.”+
29 A cikhati va nga huma hi Jeriko, a citshungu ca hombe ci no mu landzela.
30 A vavanuna vambiri va zvikhumu va nga tshamile mbhirini ya ruwa va nozwa lezvaku Jesu wa hundza hi laho, va se banguleka, vaku: “Hosi, N’wana Dhavhidha, hi mahele wuxinji!”+
31 Kanilezvi a citshungu ci no va kawuka, ciku kabye: “Miyelani!” Hambulezvo, a zvikhumu lezvo zvi no engetela ku banguleka, zviku: “Hosi, N’wana wa Dhavhidha, hi mahele wuxinji!”
32 Hikwalaho, Jesu i no nyima a va vitana, aku: “Mu lava ku ndzi mu mahela yini?”
33 Vaku kakwe: “Hosi, hi vhulule matihlo.”
34 Jesu i no va zwela wusiwana a henya matihlo yabye.+ Zvalezvo va no tlhela va wona, va mu landzela.
Mitlhamuselo ya lahasi
^ A civhina i simu ga tisinya leti ti pswalako mauvha.
^ Ku nga kwalomu ka ma 9 hora.
^ Ku nga kwalomu ka dhina.
^ Ku nga kwalomu ka ma 15 hora.
^ Ku nga kwalomu ka ma 17 hora.
^ Hi kukongoma: “a gi no biha”.
^ Kutani: “ndzi hanako”.
^ Kutani: “nandza ga n’wina”.
^ Kutani: “muhefemulo”.
