Hi kutsala ka Matewu 21:1-46
21 A cikhati leci va nga chikela Bhetfaje Citsungeni ca maOlivha, kusuhani ni Jerusalema, Jesu i no ruma vapizani vambiri,+
2 aku kabye: “Fambani cidhoropaneni leci ci nga mahlweni ka n’wina, mu ta ya kuma mbongola yi bohilweko yi nga ni cimbongolana. Ti tlhatlheni mu ndzi tela nato.
3 Loku a wokari a mu wutisa nchumu, hlamulani muku: ‘A Hosi ya ti lava.’ I ta tekela ku mu tsika muta nato.”
4 Lezvi zvi mahekile kasi ku tatiseka lezvi zvi nga wulilwe hi muphrofeti loyi a ngaku:
5 “Byela a nhanyana wa Ziyoni, uku: ‘Hi nga wona! A hosi ya wena yata ka wena;+ yi rulile+ niku yi khilele mbongola, ina, a cimbongolana ci nga n’wana wa cihari ca ku rwala mindzhwalo.’”+
6 Hikwalaho, a vapizani va no famba va ya maha zvalezvi Jesu a nga va leletele.+
7 Va no wuya ni mbongola ni cimbongolana ca yona, va ta tlhateka tinguwo tabye hehla ka tona, yena a tshama hehla ka tinguwo.+
8 A votala cikari ka citshungu va no andlalela tinguwo tabye laha ruweni,+ ni van’wani kambe va no tshova majakwa va ma andlala laha ruweni.
9 A zvitshungu lezvi zvi nga rangile mahlweni kakwe ni lava va nga mu landzela va wa huwelela, vaku: “Nungungulu, ha ku kombela, hlayisa N’wana wa Dhavhidha!+ I katekile loyi a tako vitweni ga Jehovha!* Nungungulu,+ ha ku kombela, mu hlayise, wena Loyi u nga le hehla matilweni!”+
10 A cikhati leci a nga nghena Jerusalema, a dhoropa gontlhe gi wa hi ka tsanga-tsanga, na giku: “Himani yaloyi?”
11 A zvitshungu zvi no simama zviku: “Loyi hi Jesu, a muphrofeti+ wa le Nazareta wa Galileya!”
12 Jesu i no nghena tempeleni a hlongola vontlhe lava va nga kari va xavisa ni ku xava lomu tempeleni, a khubhunyeta timeza ta vacicisi va mali ni zvitulo zva vaxavisi va zvipomba.+
13 Aku kabye: “Ku tsalilwe ku: ‘A yindlu ya mina yi ta vitaniwa ku i yindlu ya mukhongelo’,+ kanilezvi n’wina mu yi maha mhako ya vaphangi.”+
14 A zvikhumu ni zvilima zvi nota kakwe lomu tempeleni, a ta zvi hanyisa.
15 A cikhati leci a vapristi lava va tihosana ni vatsali va nga wona a zvilo lezvo zvo hlamalisa a nga maha, ni vanana lava va nga huwelela lomu tempeleni, vaku: “Nungungulu, ha ku kombela, hlayisa N’wana wa Dhavhidha!”,+ va no zangara,+
16 vaku kakwe: “Wa zvizwa lezvi va wulako lava?” Jesu aku kabye: “Ina. A mu se tshuka mu gondza lezvi zvaku: ‘Hi non’wini wa vanana ni tinyamani* u humesile kudhumisa’?”+
17 I no va siya laho a huma dhoropeni aya Bhetaniya a ya etlela seyo.+
18 Na a tlhela dhoropeni ni mixo, i nozwa ndlala.+
19 I no wona nkuwu laha mbhirini ya ruwa, a wu yela, kanilezvi a nga kumangi nchumu saseka matluka basi,+ aku ka wona: “U nga ha pswali mihandzu kambe.”+ Zvalezvo a nkuwu wu no woma.
20 A cikhati leci a vapizani va nga zvi wona va no hlamala, vaku: “Zvi mahisa kuyini ku a nkuwu lowu wu tekela ku woma?”+
21 Jesu a va hlamula, aku: “Ndza tiyisa ka n’wina, ndziku: Loku mu hi ni kukholwa, mu nga kanakani, mu nga ta maha basi lezvi ndzi nga maha a nkuwu lowu, kanilezvi loku mu byela citsunga leci muku: ‘Kunuka u ya ti hoxa bimbini’, zvi ta maheka.+
22 Niku zvontlhe lezvi mu zvi kombelako mikhongelweni na mu kholwa, mu ta nyikiwa.”+
23 Loku a nghenile lomu tempeleni, a vapristi lava va tihosana ni madhota va no mu tela na a kari a gondzisa, va taku: “I ntamu muni u mahako hi wona zvilo lezvi? Kona himani a nga ku nyika a ntamu lowo?”+
24 Jesu i no va hlamula, aku: “Minawu ndzi ta mu wutisa nchumu wun’we. Loku mu ndzi hlamula, minawu ndzi ta mu byela a ku i ntamu muni ndzi mahako hi wona a zvilo lezvi:
25 A kubhabhatisa ka Johani ku wata hi kwihi? Ku wata hi le tilweni kutani hi ka vanhu?” Va no sangula ku wulawulisana cikari kabye, vaku: “Loku hiku: ‘Ku wata hi le tilweni’, i taku: ‘Hikuyini mu nga kala ku kholwa kakwe ke?’+
26 Kanilezvi, loku hiku: ‘Ku wata hi ka vanhu’, ha chava citshungu, hakuva vontlhe ve Johani muphrofeti.”
27 Hikwalaho, va no mu hlamula, vaku: “A hi zvi tivi.” Jesu aku kabye: “Minawu ndzi nga ta mu byela a ku i ntamu muni ndzi mahako hi wona a zvilo lezvi.
28 “Mu alakanya yini? A wanuna wo kari i wa hi ni vana vambiri. I noya ka loyi wa nhondzo a yaku: ‘N’wananga, famba u ya tira civhineni* nyamutlha.’
29 A n’wana loye i no hlamula, aku: ‘Nyawowe’, kanilezvi hi ndzhako ka cikhati i no ti laya a gumesa a famba.
30 I noya ka loyi wa ndzisana a ya mu byela zvalezvo. Yena a mu hlamula, aku: ‘Ndzi ta famba, papayi’, kanilezvi a nga yangi.
31 Hi wihi cikari ka lava va vambiri a nga maha kurandza ka papayi wakwe?” Vaku: “Hi loyi wa nhondzo.” Jesu aku kabye: “Ndza tiyisa ka n’wina, ndziku: A vakhupisi ni zvibhayi va mu rangela ku nghena Mufun’weni wa Nungungulu.
32 Hakuva Johani i tile ka n’wina a ta mu gondzisa a ndlela ya kululama kanilezvi a mu kholwangi kakwe. Hambulezvo, a vakhupisi ni zvibhayi va kholwile kakwe.+ Kanilezvi n’wina, hambu a cikhati leci mu nga wona lezvo, a mu ti layangi mu kholwa kakwe.
33 “Zwanani wun’wani mufananiso: Ku wa hi ni wanuna a nga byalile civhina.+ I no ci bhiyela, a kehla cigowolo co kamela vhinyo a tlhela a aka likhokhola,*+ a gumesa a ci nyikela ka varimi, yena a endza aya tikweni gin’wani.+
34 Loku yi chikele a nguva ya mihandzu, i no ruma zvitiri zvakwe lezvaku zvi ya teka mihandzu ka varimi.
35 Kanilezvi a varimi va no khoma a zvitiri zvakwe; va noba cin’we, a cin’wani va daya, ni leci cin’wani va ci gandla hi maribye.+
36 I no tlhela a ruma zvin’wani zvitiri, zvo tala ku hundza lezvi zvo sangula, kanilezvi va no zvi maha zvalezvo.+
37 Hi magumo, i no rumela n’wana wakwe na aku: ‘Va ta chava n’wana wa mina.’
38 Kanilezvi laha a varimi va nga ku mu cu, va no byelana, vaku: ‘Loyi hi yena mugi wa tshomba.+ A hi mu dayeni hi fela ku sala ni tshomba yakwe!’
39 Hikwalaho, va no mu khoma va mu hoxa lahandle ka civhina va mu daya.+
40 Makunu loku a n’winyi wa civhina a wuya, i ta va maha yini a varimi lava ke?”
41 Vaku kakwe: “Kota lezvi va bihileko, i ta va lovisa va ku bhi, a gumesa a nyikela civhina ka van’wani varimi lava va to mu nyika mihandzu ya kona loku yi buvha.”
42 Jesu aku kabye: “A mu se tshuka mu gondza Mitsalweni lezvaku: ‘A ribye legi gi nga aliwa hi vaaki give gona ribye ga laha khoneni ga lisima ka wontlhe.*+ Lezvi zvita hi ka Jehovha,* niku zvi sasekile nguvhu matihlweni ya hina’?+
43 Hikwalaho, ndza mu byela, ndziku: A Mufumo wa Nungungulu wu ta tekiwa ka n’wina wu nyikelwa ka tiko legi gi to pswala mihandzu ya wona.
44 Ahandle ka lezvo, a munhu loyi a to wela ribye legi, i ta pswhandleka.+ Ni loyi gi to mu wela, gi ta mu sila a ku bhi.”+
45 A cikhati leci a vapristi lava va tihosana ni vaFarisi va ngazwa mifananiso yakwe, va no zvi pola lezvaku i wula vona.+
46 Hambu lezvi va nga lava ku mu khoma, va no chava zvitshungu hakuva zvi waku muphrofeti.+
Mitlhamuselo ya lahasi
^ Kutani: “zvihlangi”.
^ A civhina i simu ga tisinya leti ti pswalako mauvha.
^ Kutani: “torre”.
^ Hi kukongoma: “hloko ya magumo”. A ribye legi gi wa vekiwa laha khoneni ku tlhanganako makhurisi mambiri kasi ku ma tiyisa.
