Hi kutsala ka Matewu 24:1-51
-
CIKOMBISO CA KUVAKONA KA KRISTU (1-51)
24 Laha Jesu a nga kari a huma lomu tempeleni, a vapizani vakwe va no tshinela kakwe va mu komba tiyindlu ta tempeli.
2 Hikwalaho, i te ngalo kabye: “Ma zvi wona zvontlhe lezvi ke? Ndza tiyisa ka n’wina, ndziku: Laha ku nga ta siyiwa a ribye gin’we hehla ka gin’wani, legi gi to kala gi nga khungumulwi.”+
3 Na a tshamile Citsungeni ca maOlivha, a vapizani va nota kakwe na va hi voce va taku: “Hi nga hi byela: Kasi a zvilo lezvi zvi ta maheka rini? Kona ci tava cihi a cikombiso ca kuvakona* ka wena+ ni ca kugumesa ka tiko?”*+
4 Jesu i no va hlamula, aku: “Ti woneleni kasi mu nga hambukisiwi hi munhu,+
5 hakuva a votala va tata hi vito ga mina va taku: ‘Hi mina Kristu’, va hambukisa votala.+
6 Mu tazwa tiyimpi ni mahungu ya tiyimpi. Ti woneleni kasi mu nga dzuki, hakuva a zvilo lezvi zvi fanele ku maheka kanilezvi a hi kona kugumesa.+
7 “Hakuva a tiko gi ta vhukela tiko, ni mufumo wu vhukela mufumo;+ ku tava ni tindlala+ ni kutsekatseka ka misava ka matshamu yo hambanahambana.+
8 Zvontlhe lezvi masangulo ntsena ya kuxaniseka.
9 “A vanhu va ta mu xanisa+ va tlhela va mu daya.+ Mu ta vengiwa hi matiko wontlhe hi kota ya vito ga mina.+
10 A votala va ta khunguvanyeka, va tokometana va tlhela va vengana.
11 Ku ta humelela vaphrofeti vo tala va mawunwa va hambukisa votala;+
12 niku hi kota ya kuendzeleka ka kuhambunyetwa ka nayo, a lirandzo la votala li ta titimela.
13 Kanilezvi loyi a timiselako kala magumo hi yena a to ponisiwa.+
14 A mahungu lawa ya manene ya Mufumo ma ta chumayelwa misaveni yontlhe kasi mava wukustumunyu ka matiko wontlhe,+ hi kona ku to chikela a kugumesa.
15 “Hikwalaho, loku mu wona a cilo co nyenyeza ci hahlulako na ci yimile wutshan’wini go basa, kota lezvi zvi wulilweko hi muphrofeti Dhaniyeli+ (a muleri i wa tirise kupimisisa),
16 makunu lava va nga le Judhiya va wa tsutsumele zvitsungeni.+
17 Loyi a nga hehla ka yindlu a nga chiki a ya teka lezvi zvi nga lomu ndlwini yakwe,
18 ni loyi a nga masin’wini a nga tlheli a ya teka bhaji gakwe.
19 Khombo ka vavasati lava va to ngha va hi ni tinyimba ni lava va to ngha va an’wisa ka masiku lawo!
20 Simamani ku khongelela lezvaku a kutsutsuma ka n’wina ku ngavi hi nguva ya cirami ne hi siku ga sabhadho;
21 hakuva ku tava ni kuxaniseka ka hombe+ ka ku a ku se tshuka ku humelela kusukela kuvangiweni ka tiko kala lezvi, niku ku nga ta ha humelela kambe.+
22 Kunene, loku a masiku lawo ma wa nga komiswangi, i hava a nga wa ta pona; kanilezvi hi kota ya vahlawulilweko a masiku lawo ma ta komisiwa.+
23 “Makunu loku a wokari a mu byela ku: ‘Hi loyi Kristu!’+ kutani ku: ‘Hi gaya!’, mu nga kholwi.+
24 Hakuva ku ta humelela vaKristu va mawunwa ni vaphrofeti va mawunwa+ va maha zviwoniso zva hombe ni zvihlamaliso kasi va hambukisa+ hambu ni vahlawulilweko, loku zvi koteka.
25 Ndza mu tlharihisa na zvi nga se maheka.
26 Hikwalaho, loku a vanhu vaku: ‘I le ciwuleni’, mu ngayi; kutani ku: ‘I lomu ndlwini’, mu nga kholwi.+
27 Hakuva a ku fana ni lezvi a lihati li humako hi mutsuwuka-gambo li woninga kala mupela-gambo, ku tava tano ni kuvakona* ka N’wana wa munhu.+
28 Ni kwihi laha ku nga ni cirumbi, a magama ma ta hlengeletana laho.+
29 “Zvalezvi ku to mbhela a kuxaniseka ka masiku lawo, a gambo gi ta pfhupeliswa,+ ni hweti yi nga ta woninga; a tinyeleti ti tawa hi le tilweni, ni mintamu ya le tilweni yi ta tsekatsekiswa.+
30 Andzhako ka lezvo, ku ta woneka ciwoniso ca N’wana wa munhu le tilweni. A vanhu va tixaka tontlhe ta laha misaveni va ta tiba zvifuva hi kukarateka.+ Va ta wona a N’wana wa munhu+ na ata hi marefu ya tilo na a hi ni ntamu ni kungangamela ka hombe.+
31 I ta ruma tingilozi takwe hi mpundzu wo vhuma nguvhu lezvaku ti ya hlengeleta a vahlawulilweko ka mune wa matlhelo ya misava,* kusukela ka magemeta-musi man’we ya matilo kala ka man’wani magemeta-musi ya matilo.+
32 “Gondzani ka mufananiso lowu wa nkuwu: Neti a zvidhavana zva wona zvi nyuka zvi hluka matluka, ma zvi tiva lezvaku a cimumu ci laha kusuhani.+
33 Na n’winawu, loku mu wona a zvilo lezvi zvontlhe, zvi tiveni lezvaku a N’wana wa munhu i laha kusuhani, kwalaha tinyangweni.+
34 Ndza tiyisa ka n’wina, ndziku: A cizukulwana leci ci nga ta hundza na zvi nga se maheka zvontlhe a zvilo lezvi.
35 A tilo ni misava zvi ta hundza, kanilezvi a timhaka ta mina ti nga ta hundza.+
36 “Xungetano hi siku lego ni cikhati ca kona i hava a zvi tivako,+ ne tingilozi ta matilo ne hambu N’wana, zvo tiviwa hi Papayi yece.+
37 Hakuva a ku fana ni masikwini ya Nowa,+ zvi ta mahisa zvezvo ni kuvakona* ka N’wana wa munhu.+
38 Hakuva masikwini lawo mahlweni ka Ndambi, a vanhu va waga ni kunwa, a vavanuna va chadha, ni vavasati va chadhiwa kala a siku legi Nowa a nga nghena hi gona lomu tarwini;*+
39 a va chelangi kota kala a Ndambi yita yi ta va kukuleta vontlhe,+ zvi ta mahisa zvezvo ni kuvakona ka N’wana wa munhu.
40 A vavanuna vambiri va tava masin’wini; a mun’we i ta tekiwa, loyi mun’wani a tsikiwa.
41 A vavasati vambiri va ta ngha va gaya cigayweni ca mandla; a mun’we i ta tekiwa, loyi mun’wani a tsikiwa.+
42 Hikwalaho, tshamani na mu rindzele hakuva a mu gi tivi a siku legi a Hosi ya n’wina yi tota hi gona.+
43 “Kanilezvi tivani lezvi: Loku a n’winyi wa muti i wa no ci tiva a cikhati* leci a khamba gi nga wa tata hi cona,+ na a tshamile a rindzela; na a nga tsikangi a yindlu yakwe yi pandziwa.+
44 Hikwalaho, n’winawu tshamani na mu longile+ hakuva a N’wana wa munhu wata hi cikhati mu nga ci alakanyiko.
45 “Himani loyi hakunene a nga nandza go tsumbeka ni go tlhariha legi a n’winyi wa gona a gi yimisileko hehla ka malandza yakwe, kasi ku ma phamela zvakuga hi cikhati ca kona ke?+
46 Ga tsaka* a nandza lego loku a n’winyi wa gona a wuya a ta gi kuma na gi maha lezvo!+
47 Ndza tiyisa ka n’wina, ndziku: I ta gi nyika ntiro wa ku wonelela zvontlhe a nga nazvo.
48 “Kanilezvi loku a nandza lego go biha go tshuka gi ti byela lezvi mbilwini ya gona: ‘A n’winyi wa mina wa hlwela’,+
49 makunu gi sangula kuba malandza-kulobye, giga ni kunwa zvin’we ni zvidhakwa,
50 a n’winyi wa nandza lego i ta wuya hi siku legi gi nga gi rindzelangiko ni cikhati leci gi nga ci tiviko,+
51 a ta gi tsayisa zva xapi, a gi nyika ciavelo ca gona zvin’we ni vakanganyisi. Kwaseyo gi ta rila gi getsela matino.+
Mitlhamuselo ya lahasi
^ Kutani: “ka nguva”. Wona Tlhamuselo wa magezu ya Bhibhiliya.
^ Hi kukongoma: “ka mune wa mimoya”.
^ Hi kukongoma: “bhokiseni”. A taru lego gi wa hi ngalava ya hombe yo fana ni bhokisa.
^ Kutani: “cikhati ca wusiku”.
^ Kutani: “Gi katekile”.