Hi kutsala ka Matewu 26:1-75
-
A vapristi va luka mano ya ku daya Jesu (1-5)
-
Ku chululiwa a mafura yo nuhela ka Jesu (6-13)
-
Phasika go gumesa ni kutokometwa (14-25)
-
Kuyimiswa ka Cilalelo ca Hosi (26-30)
-
A phrofeta ku Pedro i ta kaneta lezvaku wa mu tiva (31-35)
-
Jesu a khongela le Getsemane (36-46)
-
Jesu a khon’wa (47-56)
-
A xuxisiwa mahlweni ka Tribhunali ya Hombe (57-68)
-
Pedro a kaneta lezvaku wa mu tiva Jesu (69-75)
26 Loku Jesu a mbhetile ku wula a timhaka leti tontlhe, i no byela vapizani vakwe, aku:
2 “Ma zvi tiva lezvaku ku no sala masiku mambiri kasi ku mahiwa Phasika,+ makunu a N’wana wa munhu i ta nyikelwa lezvaku a dawa laha mhandzeni.”+
3 A vapristi lava va tihosana ni madhota va no hlengeletana mutini wa mupristi wa hombe a nga vitaniwa ku hi Kayafasi,+
4 va luka cikungo+ ca ku khoma Jesu hi mano, ni ku mu daya.
5 Kanilezvi va waku: “Hi nga mu khomeni laha mubuzweni, kasi ku nga vhuki vhilinganya cikari ka vanhu.”
6 A cikhati leci Jesu a nga hi Bhetaniya, mutini wa Simoni loyi wa hlokonho,+
7 ku nota kakwe a wasati ni botori ga alabhasteri gi nga hi ni mafura yo nuhela yo dhura nguvhu, a ta ma chulula hlokweni yakwe na a kari aga.*
8 Laha va nga wona lezvo, a vapizani va no swireka, vaku: “Ma xakelelwa yini?
9 Phela a mafura lawa na ma xavisilwe hi mali yo tala kasi yi nyikiwa zvisiwana.”
10 A cikhati leci Jesu a nga tiva lezvo, i te ngalo kabye: “Mu mu karatela yini a wasati loyi? I ndzi mahele zvilo zva zvinene.
11 Hakuva a zvisiwana zvi na n’wina contlhe cikhati,+ kanilezvi a hi contlhe cikhati mu tova na mina.+
12 I chelile mafura lawa yo nuhela mirini wa mina kasi ku longisela kulahliwa ka mina.+
13 Ndza tiyisa ka n’wina, ndziku: Ni kwihi laha ku to chumayelwa a mahungu lawa ya manene tikweni gontlhe, lezvi zvi mahilweko hi wasati loyi zvonawu zvi ta hlawutelwa kasi ku mu alakanya hi zvona.”+
14 Makunu a mun’we wa lava va 12, a vitaniwako ku hi Judhasi Iskariyoti,+ i noya ka vapristi lava va tihosana,+
15 a yaku: “Mu ta ndzi nyika yini loku ndzi mu nyikela* ka n’wina ke?”+ Va no mu tsumbisa a 30 wa zvingerengere zva prata.+
16 A kusukela kwalaho, i no lavetela cikhati ca cinene ca ku mu tokometa hi cona.
17 Ka siku go sangula ga Tipawa to kala Comelo,+ a vapizani va nota ka Jesu, va taku: “U lava ku hi ya ku longiselela kwihi a Phasika?”+
18 Aku kabye: “Fambani ka manyani le dhoropeni mu ya mu byela lezvi: ‘Mugondzisi i ngalo: “A cikhati ca mina ci yimisilweko ci laha kusuhani; ndzi taga Phasika ni vapizani va mina mutini wa wena.”’”
19 Hikwalaho, a vapizani va no maha zvalezvi Jesu a nga va leletela, va longisela Phasika.
20 A cikhati leci gi nga phuma,+ i no tshama mezeni ni vapizani vakwe va 12.+
21 Na va kari vaga, i te ngalo kabye: “Ndza tiyisa ka n’wina, ndziku: A mun’we wa n’wina i ta ndzi tokometa.”+
22 Na va bayisekile nguvhu hi kota ya lezvo, a mun’we ni mun’wani wabye i no mu wutisa, aku: “Hosi, hi mina ke?”
23 I no va hlamula, aku: “Loyi a nghenisako canja gakwe na mina lomu ngelweni hi yena a to ndzi tokometa.+
24 Lisine lezvaku a N’wana wa munhu wa famba, kota lezvi zvi tsalilweko xungetano hi yena, kanilezvi khombo+ ka loyi a to tokometa a N’wana wa munhu!+ Na zvi vile chukwana ka yena loku i wa nga pswaliwangi.”+
25 Judhasi, loyi a nga lava ku mu tokometa, i no wutisa, aku: “Rabi, hi mina ke?” Jesu a mu hlamula, aku: “U wula zvona.”
26 Na va haga, Jesu i no teka pawa, niku andzhako ka ku yi katekisa, i no khema+ a nyika vapizani vakwe, aku kabye: “Tekani muga. A pawa leyi yi yimela a miri wa mina.”+
27 I no teka kopo ya vhinyo, a bonga a va nyika, aku: “Nwanani hi yona n’wentlheni,+
28 hakuva a vhinyo leyi yi yimela a ‘nkhata+ wa mina wa civhumelwano’,+ lowu wu to halatiwa hi kota ya votala+ kasi ku tsetselela a zviwonho.+
29 Kanilezvi ndza wula ka n’wina, ndziku: Ndzi nga ta hanwa kambe a mihandzu ya vhina* kala ka siku legi ndzi tonwa leyi ya yiswa na ndzi hi na n’wina Mufun’weni wa Papayi wa mina.”+
30 Hi kugumesa, andzhako ka loku va yimbelele a tisimu ta kudhumisa, va noya Citsungeni ca maOlivha.+
31 Jesu i te ngalo kabye: “N’wina n’wentlhe mu ta khunguvanyeka ha mina a wusiku legi, hakuva ku tsalilwe ku: ‘Ndzi taba murisi, niku a tiyivhu ta ntlhambi ti ta hangalaka.’+
32 Hambulezvo, loku ndzi vhuxilwe, ndzi ta ranga mahlweni ka n’wina ndziya Galileya.”+
33 Kanilezvi Pedro i no mu hlamula, aku: “Hambu loku vontlhe lava van’wani vo khunguvanyeka ha wena, mina ndzi nga ta khunguvanyeka!”+
34 Jesu aku kakwe: “Ndza tiyisa ka wena ndziku: Ka wusiku legi, a nkuku na wu nga seba, u ta ndzi kaneta kunharu.”+
35 Pedro aku kakwe: “Hambu loku zvi lava ku ndzifa na wena, ndzi nga ta tshuka ndzi ku kaneta.”+ A vapizani vontlhe lava van’wani va no wula zvalezvo.
36 Andzhako ka lezvo, Jesu i no chikela navo wutshan’wini gi vitaniwako ku Getsemane,+ aku ka vapizani vakwe: “Tshamani laha, ndza haya lahaya ndzi ya khongela.”+
37 I no teka Pedro zvin’we ni vana vambiri va Zebhedhi a famba navo, a sangula ku tsan’wa a karateka nguvhu.+
38 Hi kulandzela i te ngalo kabye: “Ndzafa hi kukarateka.* Salani laha mu rindzela zvin’we na mina.”+
39 I no suka laho a fambanyana phambeni a yawa hi nghohe, a khongela,+ aku: “Papayi, loku zvi koteka, a kopo leyi+ yi wa suke ka mina. Hambulezvo, na ku nga hi kurandza ka mina, kanilezvi kota kurandza ka wena.”+
40 I no wuya ka vapizani a ta va kuma na va etlele, aku ka Pedro: “A mu zvi koti ne ku rindzela hora yin’we zvin’we na mina ke?+
41 Tshamani na mu rindzele,+ mu simama ku khongela+ kasi mu nga weli kuringweni.+ Kunene, a moya wa zvi lava, kanilezvi a nyama yi na ni gome.”+
42 I no famba kambe hi khati ga wumbiri a ya khongela, aku: “Papayi, loku zvi nga koteki ku a kopo leyi yi hundza na ndzi nga nwangi, a ku maheke kurandza ka wena.”+
43 I no wuya kambe a ta va kuma na va etlele hakuva a matihlo yabye ma wa bindza hi wurongo.
44 I no va siya a famba kambe a ya khongela hi khati ga wunharu, a wula zvalezvi zva zvin’we.
45 Andzhako ka lezvo, i no wuya ka vapizani, a taku kabye: “Ka cikhati co kota leci, n’wina mo etlela, mu humula! Phela a cikhati ca ku a N’wana wa munhu a nyikelwa mandleni ya vawonhi ci tshinele.
46 Sukani hi famba. Loyi a ndzi tokometako i laha kusuhani.”
47 Zvalezvo, na a ha wulawula, Judhasi, a mun’we wa lava va 12, i no chikela ni citshungu ca hombe ci nga hi ni zvipadha ni migomba, ci nga rumilwe hi vapristi lava va tihosana ni madhota ya vanhu.+
48 A mutokometi wakwe i wa va nyikile cikombiso, aku: “Loyi ndzi to mu pswopswa hi yaloye, mu khomeni.”
49 I no kongoma Jesu, a yaku kakwe: “Xewe Rabi!” a mu pswopswa.
50 Kanilezvi Jesu i te ngalo kakwe: “Munghana, u tela yini laha?”+ Va no tshinela va khoma Jesu va famba naye.
51 Zvalezvo a mun’we wa lava va nga hi na Jesu i no hlomula cipadha cakwe aba nandza ga mupristi wa hombe, a gi tsema ndleve.+
52 Kanilezvi Jesu aku kakwe: “Tlhelisa cipadha ca wena wutshan’wini ga cona,+ hakuva vontlhe lava va khomako cipadha va ta dawa hi cipadha.+
53 U alakanya ku ndzo tsandzeka ku kombela Papayi wa mina lezvaku a ndzi rumelela zvalezvi a 12 wa mabutho* ya tingilozi ke?+
54 Loku ndzo maha lezvo, yi ta tatisekisa kuyini a Mitsalo leyi yi nge zvi fanele ku mahekisa lezvi ke?”
55 Hi cikhati caleco, Jesu i no byela zvitshungu, aku: “Mu ndzi tela ni zvipadha ni migomba kasi ku ta ndzi khoma, ndzova khamba ke? Siku ni siku ndzi wa tshama tempeleni ndzi gondzisa,+ kanilezvi a mu ndzi khomangi.+
56 Hambulezvo, zvontlhe lezvi zvi maheka kasi ku tatiseka a mitsalo ya vaphrofeti.”+ Makunu a vapizani vontlhe va no mu tsika va tsutsuma.+
57 Lava va nga khoma Jesu va no famba naye ka Kayafasi,+ a mupristi wa hombe, laha a vatsali ni madhota va nga tlhangene kona.+
58 Kanilezvi Pedro i no simama ku mu landzela hi le kule, kala tsendzeleni* wa mupristi wa hombe. Andzhako ka loku a nghenile, i no ya tshama ni zvitiri kasi ku wona lezvi zvi nga lava ku maheka.+
59 A vapristi lava va tihosana ni yontlhe Tribhunali ya Hombe va no lavetela a wukustumunyu ga mawunwa ga ku kona Jesu kasi va mu daya.+
60 Kanilezvi a va gi kumangi, hambu lezvi ku nga humelela vakustumunyu vo tala va mawunwa.+ Hi magumo ku no humelela vambiri,
61 vaku: “A wanuna loyi i te: ‘Ndzi nga hahlula a tempeli ya Nungungulu ndzi tlhela ndzi yi aka hi masiku manharu.’”+
62 Laha a mupristi wa hombe a ngazwa lezvo, i no suka a yima, aku kakwe: “A wu hlamuli nchumu? A wu zvizwi lezvi a vavanuna lava va ku kecarako hi zvona ke?”+
63 Kanilezvi Jesu i no simama ku miyela.+ Hikwalaho, a mupristi wa hombe i te ngalo kakwe: “Ndza ku hlambanyisa hi Nungungulu a hanyako lezvaku u hi byela a ku hakunene hi wena Kristu, a N’wana wa Nungungulu ke!”+
64 Jesu aku kakwe: “U wula zvona. Kanilezvi ndza wula ka n’wina, ndziku: Kusukela lezvi mu ta wona a N’wana wa munhu+ na a tshamile reveni ga cinene ga ntamu+ na ata hi marefu ya tilo.”+
65 Zvalezvo, a mupristi wa hombe i no handzula tinguwo takwe, aku: “I rukatele! Ha ha va lavela yini a vakustumunyu? Mu mu zwile na a rukatela.
66 Mu zvi wonisa kuyini?” Va no hlamula, vaku: “I fanele ku dawa!”+
67 Va no mu phelela lomu nghoheni,+ va muba zvibhakela.+ A van’wani va no muba tipama lomu nghoheni,+
68 vaku: “Hi nga hi phrofetela Kristu. Himani a nga kuba?”
69 Pedro i wa tshamile lehandle laha tsendzeleni;* makunu ku nota citiri ca nhanyana ci taku kakwe: “Wenawu u wa hi na Jesu wa le Galileya!”+
70 Kanilezvi i no kaneta mahlweni ka vontlhe, aku: “A ndzi zvi tivi lezvi u wulawulako hi zvona.”
71 Loku a sukile laho aya nyangweni ya muti, i no woniwa hi mun’wani nhanyana, aku ka lava va nga hi laho: “A wanuna loyi i wa hi na Jesu wa le Nazareta.”+
72 I no kaneta kambe, a hlambanya, aku: “A ndzi mu tivi wanuna loye!”
73 Andzhako ka cikhatana, lava va nga yimile laho va no tshinela ka Pedro, vaku: “Hakunene wenawu u mun’we wabye, hakuva a wulawulela ga wena ga ku polekisa.”
74 I no sangula ku rukatela a tlhela a hlambanya, aku: “A ndzi mu tivi wanuna loye!” Zvalezvo a nkuku wu noba.
75 Pedro i no alakanya lezvi Jesu a nga wulile, zvaku: “A nkuku na wu nga seba, u ta ndzi kaneta kunharu.”+ I no huma a ya rila nguvhu.
Mitlhamuselo ya lahasi
^ Kutani: “na a tshamile mezeni”.
^ Kutani: “tokometa”.
^ A vhina i sinya leyi yi pswalako mauvha.
^ Kutani: “A muhefemulo wa mina wa karateka”.
^ Kutani: “12 wa zvikwata”. A cikwata cin’we ci wa hi ni cipimo ca 4000 kala 6000 wa masochwa. Laha gi tirisilwe kasi ku komba a ntsengo wa tsandza-vahlayi.
^ Kutani: “pátio”.
^ Kutani: “pátio”.