Hi kutsala ka Matewu 28:1-20
28 Andzhako ka sabhadho, laha a siku go sangula ga vhiki gi nga kari gica, Mariya Magdhala* na Mariya loyi mun’wani va noya va ya wona cilahla.+
2 Ku wa vile ni kutsekatseka ka hombe ka misava, hakuva a ngilozi ya Jehovha* yi wa relele hi le tilweni yi ta wumbuluta ribye, niku yi wa tshamile hehla ka gona.+
3 Yi wa ku khwatsi lihati, niku a tinguwo ta yona ti wa basile a ku fana ni gapongo.+
4 Hi ku yi chava, a varindzeli va no rurumela va titivala.
5 Kanilezvi a ngilozi yi no byela vavasati lavo, yiku: “Mu nga chavi, hakuva ndza zvi tiva lezvaku mu lava Jesu loyi a delweko mhandzeni.+
6 A nga kona laha, hakuva i vhuxilwe kota lezvi a nga wula.+ Tanani mu ta wona laha a nga latilwe kona.
7 Makunu tsutsumani mu ya byela a vapizani vakwe lezvaku i vhuxilwe hi ka vafileko, niku wa ranga mahlweni ka n’wina a kuya Galileya.+ Mu ta ya mu wona seyo. Hi zvalezvo ndzi nga lava ku mu byela.”+
8 Hikwalaho, va no hatlisa va suka laha cilahleni, na va chava, hambulezvo na va tsakile nguvhu, va tsutsuma va ya byela a vapizani vakwe a timhaka leti.+
9 Makunu Jesu i no kumana navo, aku kabye: “Gi cile!” Va no tshinela va khoma mikondzo yakwe va mu khizamela.
10 Jesu aku kabye: “Mu nga chavi! Fambani mu ya byela a vamakabye va mina a timhaka leti kasi vaya Galileya. Va ta ya ndzi wona seyo.”
11 A vavasati lavo na va ha hi ndleleni, a varindzeli vo kari+ va noya dhoropeni va ya byela a vapristi lava va tihosana zvontlhe lezvi zvi nga maheka.
12 Andzhako ka loku a vapristi va hombe va tlhangene ni madhota va bhula hi zvona, va no teka zvingerengere zvo tala zva prata va nyika a masochwa,
13 vaku: “Wulani lezvi: ‘Ku tile vapizani vakwe ni wusiku va ta mu yiva, hina na hi etlele.’+
14 Loku govhernadhori a zvizwa, hi ta mu tlhamusela* a mhaka leyi. N’wina mu nga karateki.”
15 Hikwalaho, va no teka a zvingerengere lezvo zva prata va maha lezvi va nga leletelwe. A mahungu lawo ma no hangalaka cikari ka vaJudha kala ni nyamutlha lezvi.
16 Kanilezvi a vapizani lava va 11 va noya Galileya+ citsungeni leci Jesu a nga va byelile ku va ta kumana kona.+
17 Laha va nga mu wona, va no mu khizamela, kanilezvi a vokari va no kanakana.
18 Jesu i no tshinela kabye, aku: “Ndzi nyikilwe a ntamu wontlhe le tilweni ni laha misaveni.+
19 Hikwalaho, fambani mu va maha vapizani a vanhu va matiko wontlhe,+ mu va bhabhatisa+ hi vito ga Papayi ni ga N’wana ni ga moya wo basa,
20 mu va gondzisa a ku ingisa zvontlhe lezvi ndzi mu layileko.+ Ndzi na n’wina masiku wontlhe kala kugumeseni ka tiko.”*+
Mitlhamuselo ya lahasi
^ Kutani: “Mariya wa le Magdhala”.
^ Hi kukongoma: “hi ta mu kholwisa”.
^ Kutani: “nguva”. Wona Tlhamuselo wa magezu ya Bhibhiliya.