Hi kutsala ka Matewu 4:1-25
4 Andzhako ka lezvo, Jesu i no yiswa ciwuleni hi moya kasi a ya ringiwa+ hi Dhiyabho.+
2 Andzhako ka ku tshama a 40 wa masiku ni 40 wa wusiku na a ngagi nchumu, i nozwa ndlala.
3 Makunu a Muringi+ i no mu tela, a taku: “Loku u hi n’wana wa Nungungulu, byela maribye lawa ma cica ma maha tipawa.”
4 Kanilezvi i no mu hlamula, aku: “Ku tsalilwe ku: ‘A munhu a nga faneli ku hanya hi pawa yoce, kanilezvi hi timhaka tontlhe ti humako non’wini wa Jehovha.’”*+
5 Makunu Dhiyabho i no mu yisa dhoropeni go basa,+ a ya mu yimisa le cixungweni ca* tempeli,+
6 aku kakwe: “Loku u hi n’wana wa Nungungulu, ti tsikelete uwa lahasi hakuva ku tsalilwe ku: ‘I ta laya tingilozi takwe xungetano hi wena’, niku: ‘Ti ta ku khamukela mandleni ya tona kasi a nkondzo wa wena wu nga gumuli ribye’.”+
7 Jesu i no mu hlamula, aku: “Ku tsalilwe kambe ku: ‘U nga ringi Jehovha,* a Nungungulu wa wena.’”+
8 Andzhako ka lezvo, Dhiyabho i no mu yisa le hehla ka citsunga co leha nguvhu a ya mu komba a mifumo yontlhe ya misava ni kungangamela ka yona.+
9 Aku kakwe: “Ndzi ta ku nyika zvontlhe lezvi, loku u khizama u ndzi khozela.”*
10 Jesu i no mu hlamula, aku: “Suka Sathani! Hakuva ku tsalilwe ku: ‘Khozela Jehovha,* a Nungungulu wa wena,+ niku hi yena yece u faneleko ku mu tirela.’”+
11 Makunu Dhiyabho i no mu tsika.+ Andzhako ka lezvo, ku nota tingilozi ti ta mu tirela.+
12 A cikhati leci a ngazwa lezvaku Johani i khomilwe,+ i no suka aya Galileya.+
13 Loku a sukile Nazareta, i no ya tshama Kapernawume,+ kusuhani ni bimbi, ka madhistrito ya Zebhuloni ni ya Naftali,
14 kasi ku tatiseka lezvi zvi nga wuliwa hi muphrofeti Isaya, aku:
15 “O tiko ga Zebhuloni ni tiko ga Naftali, mu nga ndleleni ya bimbi, le tlhatuko wa Jordhani, a Galileya ga matiko!
16 A vanhu lava va tshamileko munyameni va wonile kuwonekela ka hombe, ni lava va tshamileko ndzhutini wa kufa va woningelwe+ hi kuwonekela.”+
17 Kusukela ka cikhati leco, Jesu i no sangula ku chumayela, aku: “Ti soleni hakuva a Mufumo wa matilo wu tshinele.”+
18 Na a famba hi mbhiri ya Bimbi ga Galileya, i no wona va ka makabye vambiri, ku nga Simoni, loyi a gin’wani vito a nga Pedro,+ ni makabye wakwe Andrewu, na va peta likoka* lomu bimbini hakuva va wa hi vakukuti.*+
19 Aku kabye: “Ndzi landzeleni, ndzi ta mu maha vakukuti va vanhu.”+
20 Va no tekela ku tsika tikoka* tabye va mu landzela.+
21 Loku a sukile hi laho, i no wona van’wani va vambiri va nga hi va ka makabye, ku nga Jakobe, a n’wana wa Zebhedhi, na Johani a makabye wakwe.+ Va wa hi lomu ngalaveni ni papayi wabye Zebhedhi, na va runga tikoka* tabye, a se va vitana.+
22 Zvalezvo, va no siya ngalava ni papayi wabye va mu landzela.
23 I no fambafamba tikweni gontlhe ga Galileya,+ a gondzisa masinagogeni yabye+ ni ku chumayela a mahungu ya manene* ya Mufumo wa Nungungulu, a tlhela a hanyisa vanhu ka mababyi ya tixaka tontlhe ni zvitshetshela zva tixaka tontlhe.+
24 A mahungu lawo ma no hangalaka tikweni gontlhe ga Siriya. Hikwalaho, va no neha kakwe vontlhe lava va nga kari va xaniseka hi mababyi ya tixakaxaka ni kubayisa ka hombe,+ ni lava va nga hi ni madhimoni+ ni nyokani,+ ni lava va ku woma zviro,* a ta va hanyisa.
25 Hi kota ya lezvo, a zvitshungu zva hombe zvi ngata hi Galileya, ni Dhekapoli,* ni Jerusalema, ni Judhiya ni le tlhatuko wa Jordhani zvi no mu landzela.
Mitlhamuselo ya lahasi
^ Kutani: “le madembeleni ya”.
^ Kutani: “u ndzi khozela khati gin’we”.
^ Kutani: “juya”.
^ Kutani: “vatandi”.
^ Kutani: “majuya”.
^ Kutani: “majuya”.
^ Kutani: “ivhangeli”.
^ Kutani: “paralíticos”.
^ Kutani: “Tiko ga 10 wa Madhoropa”.