Hi kutsala ka Matewu 6:1-34
6 “Ti woneleni ku maha a kululama ka n’wina mahlweni ka vanhu hi ku fela ku va mu wona;+ loku mu maha lezvo mu nga tava ni nchachazelo ka Papayi wa n’wina a nga le matilweni.
2 Hikwalaho, loku u ci nyika nchumu a cisiwana, u ngabi mpundzu mahlweni ka wena a ku khwatsi hi lezvi a vakanganyisi va mahako lomu masinagogeni ni lomu maruweni kasi va dzundziwa hi vanhu. Ndza tiyisa ka n’wina, ndziku: Va sina va amukele a nchachazelo wabye wontlhe.
3 Kanilezvi loku wena u humesa zvilo kasi ku nyika cisiwana, u nga tsiki woko ga wena ga cibhabha gi tiva lezvi legi ga cinene gi mahako,
4 kasi a zvinyikiwo zva wena zviva cihundleni. Makunu a Papayi wa wena loyi a wonako cihundleni i ta ku tlhelisela.+
5 “Loku mu khongela, mu nga fani ni vakanganyisi,+ hakuva va randza ku khongela na va yimile lomu masinagogeni ni lomu mahandzakanyeni ya maruwa ya hombe kasi va woniwa hi vanhu.+ Ndza tiyisa ka n’wina, ndziku: Va sina va amukele a nchachazelo wabye wontlhe.
6 Kanilezvi loku u khongela, nghena lomu ndlwini ya wena u vhala livati u khongela ka Papayi wa wena loyi a nga cihundleni.+ Makunu a Papayi wa wena loyi a wonako cihundleni i ta ku tlhelisela.
7 Loku u khongela, u nga phindaphindi magezu yalawa ya man’we a ku khwatsi hi lezvi va mahako vamatiko, hakuva va alakanya ku va ta zwiwa hi ku tatela magezu.
8 Makunu n’wina mu nga fani navo, hakuva a Papayi wa n’wina wa zvi tiva lezvi mu zvi lavako+ hambu loku mu nga se mu kombela.
9 “Hikwalaho, khongelisani lezvi:+
“‘Papayi wa hina wa le tilweni, a vito ga wena+ a gi basisiwe.*+
10 A wute Mufumo wa wena.+ A kurandza ka wena ku wa mahiwe,+ le tilweni ni laha misaveni konawu.+
11 Hi nyike nyamutlha a zvakuga zva siku legi;+
12 u hi tsetselela mangava* ya hina khwatsi hi lezvi hinawu hi tsetselelako lava va hi dhevhako.+
13 U nga hi yisi kuringweni,+ kanilezvi hi tlhatlhise* ka loyi wakubiha.’+
14 “Hakuva loku mu tsetselela vanhu a zvihambunyeto zvabye, a Papayi wa n’wina wa le tilweni yenawu i ta mu tsetselela;+
15 kanilezvi loku mu nga va tsetseleli a zvihambunyeto zvabye, ni Papayi wa n’wina yenawu a nga ta mu tsetselela a zvihambunyeto zva n’wina.+
16 “Loku mu pfhunga,*+ mu nga ha tsuvi a ku fana ni vakanganyisi, hakuva ka masiku lawo va cica a tshamela ga tinghohe tabye kasi va woniwa hi vanhu lezvaku va lomu ka ku pfhunga.+ Ndza tiyisa ka n’wina, ndziku: Va sina va amukele a nchachazelo wabye wontlhe.
17 Kanilezvi wena, loku u pfhunga,* tola mafura hlokweni ya wena u tlhela u hlamba nghohe,
18 kasi u nga woniwi hi vanhu lezvaku u lomu ka ku pfhunga,* kanilezvi u woniwa ntsena hi Papayi wa wena loyi a nga cihundleni. Makunu a Papayi wa wena loyi a wonako cihundleni i ta ku tlhelisela.
19 “Tsikani ku ti hlengeletelela titshomba laha misaveni,+ laha a muhlwa ni kuchacharela* zvi gako ni laha a makhamba ma pandzako ma yiva.
20 Kanilezvi ti hlengeleteleleni titshomba le tilweni,+ laha ku nga hava muhlwa ne kuchacharela,+ ni laha a makhamba ma nga pandziko ma yiva.
21 Hakuva laha a tshomba ya wena yi nga kona, ni mbilu ya wena yi tava kwalaho.
22 “A kandiya ya miri i tihlo.+ Hikwalaho, loku a tihlo ga wena gi potiyela ka nchumu wun’we,* a miri wa wena wontlhe wu ta wonekela.*
23 Kanilezvi loku a tihlo ga wena gi hi ni matshoho,*+ a miri wa wena wontlhe wu tava munyama. Loku a kuwonekela ka wena ku hi munyama, a munyama wa kona wu tava wa hombe nguvhu!
24 “I hava a zvi kotako kuva citiri ca tihosi timbiri; hakuva i ta venga yin’we a randza leyi yin’wani,+ kutani ku namarela ka yin’we a kanyisa leyi yin’wani. A mu nge zvi koti kuva zvitiri zva Nungungulu ni zva Titshomba.+
25 “Hikwalaho, ndza mu byela, ndziku: Tsikani ku karateka+ hi wutomi ga n’wina xungetano hi ku mu taga yini, kutani ku mu tanwa yini kutani hi mimiri ya n’wina lezvaku mu ta boha yini.+ A wutomi* a gi hundzi zvakuga ke? Ni miri a wu hundzi tinguwo ke?+
26 Cuwukani khwatsi a zvinyanyani zva tilo,+ a zvi byali, a zvi tshoveli, ne a zvi veketeli zvakuga matshaleni, hambulezvo a Papayi wa n’wina wa le tilweni wa zvi wundla. N’wina a mu va lisima a ku hundza zvona ke?
27 Himani cikari ka n’wina, loyi hi ku karateka, a zvi kotako ku engetela a nkono* wun’we ka kuleha ka wutomi gakwe ke?+
28 Kona hikuyini mu karatekako hi zva kuboha? Gondzani ka lezvi a makhon’wa ma kulisako zvona; a ma tiri, ne a ma swuli;
29 kanilezvi ndza mu byela, ndziku: Hambu Solomoni+ kungangameleni kakwe kontlhe a nga zangi a bohisa a ku khwatsi gin’we ga wona.
30 Makunu loku Nungungulu a gi bohisisa lezvo a byanyi ga khwati, legi gi nga kona nyamutlha kuveni a mandziko gi ta hoxiwa ndzilweni, a nga ta mu bohisa a ku hundza lezvo, n’wina va kukholwa kutsongwani ke?
31 Hikwalaho, mu nga tshuki mu karateka+ muku: ‘Hi taga yini?’ kutani ku: ‘Hi tanwa yini?’ hambu ku: ‘Hi ta boha yini?’+
32 Hakuva a zvilo lezvi zvontlhe hi lezvi a vamatiko va ti karatelako ku zvi kuma. A Papayi wa n’wina wa le tilweni wa zvi tiva lezvaku ma zvi lava zvontlhe lezvo.
33 “Simamani ku lava a Mufumo ni kululama kakwe kuranga, zvontlhe a zvilo lezvi zvin’wani zvi ta engetelwa ka n’wina.+
34 Hikwalaho, mu nga tshuki mu karatekela zva mandziko,+ hakuva a mandziko i tava ni zvikarato zvakwe. A siku gin’we ni gin’wani gi na ni zvikarato zvi ringanako gona.
Mitlhamuselo ya lahasi
^ Kutani: “a gi woniwe kota gi basileko”.
^ Kutani: “zviwonho”.
^ Kutani: “hi ponise”.
^ Kutani: “jejuwara”.
^ Kutani: “jejuwara”.
^ Kutani: “jejuwara”.
^ Kutani: “kuferujara; kutshutshumbala”.
^ Kutani: “gi wona khwatsi”.
^ Kutani: “wu ta tala hi kuwonekela”.
^ Hi kukongoma: “gi bihile”.
^ Kutani: “A muhefemulo”.