Hi kutsala ka Matewu 7:1-29
7 “Tsikani ku lamula,+ kasi mu nga lamuliwi;
2 hakuva lezvi mu va lamulisako zvona van’wani, n’winawu mu ta lamuliswa zvalezvo;+ hi lipimo leli mu pimako van’wani hi lona, vonawu va ta mu pima hi lona.+
3 Makunu hikuyini u cuwukisako a citoti ci nga ka tihlo ga makabye wa wena kanilezvi u nga woni a tsandza wu nga ka tihlo ga wena ke?+
4 U ta zvi kotisa kuyini ku byela makabye wa wena ku: ‘Hi nga khwatsi ndzi ku susa citoti ci nga ka tihlo ga wena’, kasi lezvo ka legi ga wena i tsandza wu nga kona?
5 Mukanganyisi ndziwena! Ranga hi ku susa tsandza lowu wu nga ka tihlo ga wena, hi kona u to zvi wona khwatsi lezvi u nga ci susisako zvona a citoti ci nga ka tihlo ga makabye wa wena.
6 “Mu nga nyiki timbyana a zvilo zvi basileko ne hambu ku teka maperola ya n’wina mu hoxela makhumba,+ kasi ma nga tshuki ma ma kandzihetela ma gumesa ma hundzuluka ma mu khadamula.
7 “Simamani ku kombela, mu ta nyikiwa;+ simamani ku lava, mu ta zvi kuma; simamani ku gongondza, mu ta vhululelwa.+
8 Hakuva ni wihi loyi a kombelako wa nyikiwa,+ ni wihi loyi a lavako wa zvi kuma, ni wihi loyi a gongondzako i ta vhululelwa.
9 Kona himani cikari ka n’wina wa ku loku a n’wana wakwe a mu kombela pawa i mu nyika ribye?
10 Kutani loku a kombela njhanjhi i mu nyika nyoka ke?
11 Makunu loku n’wina, hambu lezvi mu bihileko, mu tiva ku va nyika a zvinyikiwo zvo saseka a vana va n’wina, a ndza ha wuli hi Papayi wa n’wina a nga le matilweni. I ta va nyika zvinyikiwo zvo saseka+ lava va mu kombelako!+
12 “Hikwalaho, zvontlhe lezvi mu lavako ku a vanhu va mu mahela, n’winawu va maheleni zvalezvo.+ Lezvo hi lezvi a Nayo ni Vaphrofeti va wulako.+
13 “Nghenani hi nyangwa yo hlongana,+ hakuva a nyangwa leyi yi yako kulovisweni yi anamile, ni ndlela yi yako kona ya hombe, niku va tele va fambako hi yona;
14 kanilezvi a nyangwa yi yako wutomini yi hlongile, ni ndlela yi yako kona yi manyene, niku va tsongwani va yi kumako.+
15 “Ti woneleni ka vaphrofeti va mawunwa+ lava va tako ka n’wina na va bohile a bhebhe ga yivhu,+ kuveni hi le ndzeni mahlolwa ma lambileko.+
16 Mu ta va tiva hi mihandzu yabye. A vanhu va tshuka va kola mauvha lomu ka mimizwa kutani makuwu lomu ka zvigetlwani ke?+
17 Hi zvalezvo kambe, ni tisinya tontlhe ta tinene ti pswala mihandzu ya yinene, kanilezvi a tisinya tontlhe to kala ti nga hi tinene ti pswala mihandzu yo kala yi nga hi yinene.+
18 A sinya ya yinene a yi nge pswali mihandzu yo kala yi nga hi yinene, ne hambu sinya yo kala yi nga hi yinene a yi nge pswali mihandzu ya yinene.+
19 A tisinya tontlhe ti nga pswaliko mihandzu ya yinene ti tsemiwa ti hoxiwa ndzilweni.+
20 Hikwalaho, a vanhu lavo mu ta va tiva hi mihandzu yabye.+
21 “A hi vontlhe lava va nge ngalo ka mina: ‘Hosi, Hosi’, va to nghena Mufun’weni wa matilo, kanilezvi ku ta nghena ntsena loyi a mahako kurandza ka Papayi wa mina loyi a nga matilweni.+
22 A votala va taku ka mina hi siku lego: ‘Hosi, Hosi,+ a hi phrofetangi hi vito ga wena ke? A hi hlongolangi madhimoni hi vito ga wena ke? A hi mahangi mitiro yo tala ya ntamu hi vito ga wena ke?’+
23 Kanilezvi ndzi taku ka vona: ‘A ndzi mu tivi! Sukani ka mina, n’wina vamahi va lezvi zvo kala zvi nga hi laha nayweni!’+
24 “Hikwalaho, ni wihi loyi a zwako timhaka leti ta mina a ti maha, i ta fana ni munhu wo tlhariha loyi a nga aka yindlu yakwe laha ribyeni.+
25 Ku nona vhula, kuta tindambi, kuta cingulo ci taba yindlu leyo, kanilezvi a yi wangi hakuva yi wa akilwe laha ribyeni.
26 Ni wihi loyi a zwako timhaka leti ta mina a nga ti mahi, i ta fana ni munhu wa cipumbu loyi a nga aka yindlu yakwe laha vhunyeni.+
27 Ku nona vhula, kuta tindambi, kuta cingulo ci taba yindlu leyo,+ yi sewa. A kuwa ka yona kuve ka hombe.”
28 Laha Jesu a nga mbheta ku wula timhaka leti, a zvitshungu zvi no hlamala nguvhu hi magondzisela yakwe,+
29 hakuva i wa gondzisa kota loyi a nga ni ntamu.+ I wa nga fani ni vatsali vabye.