Hi kutsala ka Matewu 8:1-34
8 Andzhako ka loku a chikile hi citsungeni, a zvitshungu zva hombe zvi no mu landzela.
2 Ku nota kakwe a wanuna wa hlokonho a ta mu khizamela, aku: “Hosi, loku u zvi lava, u nga ndzi basisa.”+
3 I no nawuluta canja gakwe a mu henya, aku: “Ndza zvi lava! Basiswa.”+ Zvalezvo i no basiswa ka hlokonho yakwe.+
4 Jesu aku kakwe: “U nga byeli munhu,+ kanilezvi famba u ya ti kombekisa ka mupristi,+ u nyikela cinyikiwo leci Mosi a ci yimisileko+ kasi civa wukustumunyu kabye.”
5 Laha a nga nghena Kapernawume, ku nota kakwe a hosana ya butho yi ta mu khongotela,+
6 yiku: “Hosi, a nandza ga mina gi etlele le kaya, gi womile zviro niku ga xaniseka nguvhu.”
7 I te ngalo kakwe: “Loku ndzi chikela seyo, ndzi ta mu hanyisa.”
8 A hosana ya butho yi no mu hlamula, yiku: “Hosi, a ndzi munhu wo kala ndzi ku amukela ndlwini ya mina, kanilezvi wula gezu basi, a nandza ga mina gi ta hanya.
9 Hakuva minawu ndzi munhu a fumiwako, na ndzi hi ni masochwa ndzi ma rangelako; ndza wula ka gin’we, ndziku: ‘Famba!’, gi famba; ndziku ka gin’wani: ‘Tana!’, gita; ni ka citiri ca mina, ndziku: ‘Maha lezvi!’ ci maha.”
10 Laha Jesu a ngazwa lezvo, i no hlamala, a byela lava va nga mu landzela, aku: “Ndza mu byela lisine, ndziku: A ndzi se kuma munhu lomu Izrayeli a nga ni kukholwa ka hombe ko kota loku.+
11 Kanilezvi ndza mu byela lezvaku a votala va tako hi le mutsuwuka-gambo ni le mupela-gambo va tata va ta tshama mezeni zvin’we na Abrahama na Isaka na Jakobe Mufun’weni wa matilo;+
12 kuveni a vana va Mufumo va ta hoxiwa le handle munyameni. Kwaseyo va ta rila va getsela matino.”+
13 Jesu i no byela hosana ya butho, aku: “Famba. Kota lezvi u kholwako, a zvi maheke lezvi u zvi kombeleko.”+ Ka cikhati caleco, a nandza gi no hanya.+
14 Loku Jesu a chikele mutini wa Pedro, i no kuma a mukokati wakwe+ na a etlele hakuva i wa hi ni feveri.+
15 Hikwalaho, i no henya a canja gakwe,+ a feveri yi se hangalaka, a ku kakatsuko a sangula ku mu tirela.
16 Laha gi nga phumile, va no mu tisela a vanhu vo tala va nga hi ni madhimoni; i no hlongola mimoya leyo hi gezu gin’we, a hanyisa vontlhe va nga kari va xaniseka,
17 kasi ku tatiseka lezvi zvi nga wulilwe hi muphrofeti Isaya, zvaku: “Hi yena a nga teka mababyi ya hina, a rwala ni tinghumbe ta hina.”+
18 A cikhati leci Jesu a nga wona a citshungu ci nga hi matlhelweni yakwe, i no byela vapizani vakwe lezvaku va tlhatuka vaya ka mbhiri leyi yin’wani.+
19 Ku nota mutsali a taku kakwe: “Mugondzisi, ndzi ta ku landzela ni kwihi u yako.”+
20 Kanilezvi Jesu i te ngalo kakwe: “A tinghowo* ti na ni mikele, ni zvinyanyani zva tilo zvi na ni zvisaka, kanilezvi a N’wana wa munhu a nga na ka ku lata kona hloko.”+
21 Andzhako ka lezvo, a mun’we wa vapizani i te ngalo kakwe: “Hosi, ndzi tsike ndzi ranga hi ku ya lahla papayi.”+
22 Jesu aku kakwe: “Wena simama ku ndzi landzela. Tsika vafileko va lahla vafileko vabye.”+
23 A cikhati leci a nga nghena ngalaveni, a vapizani vakwe va no mu landzela.+
24 Makunu ku no vhuka a bhubhutsa ga hombe lomu bimbini laha ka kuza a ngalava yi lava ku khubhunyetwa hi mavingo;* kanilezvi Jesu i wa etlele.+
25 A vapizani va nota kakwe va ta mu vhuxa, vaku: “Hosi, hi ponise, hafa!”
26 Kanilezvi yena i te ngalo kabye: “Mu chava yini, n’wina va kukholwa kutsongwani?”+ Zvalezvo i no vhuka a kawuka moya ni bimbi, kuva ni kurula ka hombe.+
27 Hikwalaho, a vavanuna lavo va no hlamala nguvhu, vaku: “Kasi munhu wo tshamisa kuyini yaloyi wa ku hambu moya ni bimbi zva mu ingisa?”
28 A cikhati leci a nga chikela ka mbhiri leyi yin’wani tikweni ga vaGadhara, i no telwa hi vavanuna vambiri va nga hi ni madhimoni na va huma hi lomu zvilahleni.+ Va wa hi vanhu vo leva nguvhu, hikwalaho a nga kona a nga tiya ku famba hi ruwa lego.
29 Va no banguleka vaku: “Cini hi nga ku gohela, wena N’wana wa Nungungulu?+ U tele ku ta hi xanisa+ na ci nga se chikela cikhati ci yimisilweko?”+
30 Hi le kule, ku wa hi ni ntlhambi wa hombe wa makhumba ma nga kari maga.+
31 Hikwalaho, a madhimoni ma no mu khongotela, maku: “Loku u hi hlongola, hi rumele ntlhambini wa makhumba.”+
32 Yena aku ka wona: “Fambani!” Zvalezvo ma no huma ma ya nghena ka makhumba. A ntlhambi wontlhe wu no tsutsuma wu ya wela bimbini wu fela lomo.
33 Kanilezvi a varisi va makhumba va no tsutsuma vaya dhoropeni va ya hlawutela zvontlhe, a ku patsa ni mahungu ya vavanuna lava va nga hi ni madhimoni.
34 Makunu a vanhu vontlhe va lomu dhoropeni va no huma va ya tlhangana na Jesu. Laha va nga mu wona, va no mu kombela lezvaku a suka tikweni gabye.+