Hi kutsala ka Matewu 9:1-38
9 Jesu i no nghena ngalaveni a tlhatuka bimbi aya dhoropeni gakwe.+
2 Zvalezvo va no mu tela ni wanuna wa ku woma zviro na a latilwe laha ka lihlaka.* Na a wona a kukholwa kabye, Jesu i no byela a wanuna loyi wa ku woma zviro, aku: “Tiya hlanha, n’wananga! A zviwonho zva wena zvi tsetselelwe.”+
3 Makunu a vatsali vo kari va no ti byela lezvi timbilwini tabye: “Inaloyi wa rukatela.”
4 Jesu, na a tiva maalakanyo yabye, i te: “Hikuyini mu alakanyelako zvilo zvo biha timbilwini ta n’wina?+
5 Hi cikombiso, hi cihi ci olovako? Ku wula ku: ‘A zviwonho zva wena zvi tsetselelwe’, kutani ku: ‘Suka u yima, u famba’?+
6 Kanilezvi kasi mu zvi tiva lezvaku a N’wana wa munhu i na ni ntamu laha misaveni wa ku tsetselela zviwonho . . .”, i no byela loyi wa ku woma zviro, aku: “Suka u yima, u teka lihlaka* la wena u famba kaya.”+
7 I no suka a yima a khoma ndlela aya kaya.
8 Laha a zvitshungu zvi nga wona lezvo, zvi no chava nguvhu zvi dhumisa Nungungulu, loyi a nyikileko vanhu a ntamu lowo.
9 Na a sukile laho, Jesu i no wona a wanuna a vitaniwako ku hi Matewu na a tshamile laha ku hakhelwako mikhupo, aku kakwe: “Maha mulandzeli wa mina.” Zvalezvo i no suka a mu landzela.+
10 Hi ndzhako ka cikhati, na a kari aga* laha mutini, ku nota vakhupisi vo tala ni vawonhi va taga* na Jesu ni vapizani vakwe.+
11 Kanilezvi laha a vaFarisi va nga wona lezvo, va no wutisa a vapizani vakwe, vaku: “Hikuyini a mugondzisi wa n’wina a gako ni vakhupisi ni vawonhi ke?”+
12 Laha a nga vazwa, i te: “Lava va kalako va nga babyi a va lavi dhokodhela, kanilezvi lava va babyako va mu lava.+
13 Fambani, mu ya gondza ku zvi wula yini ku: ‘Ndzi randza wuxinji, na ku nga hi miphahlo.’+ Hakuva a ndzi telangi ku ta vitana valulamileko, kanilezvi ndzi tele vawonhi.”
14 Hi kulandzela, a vapizani va Johani va nota kakwe va ta mu wutisa ku: “Hikuyini hina ni vaFarisi hi pfhungako* kanilezvi a vapizani va wena va nga pfhungi?”+
15 Jesu i te ngalo kabye: “A vanghana va noivho a va na cigelo ca ku rila loku a noivho+ ya ha hi zvin’we navo, a hi zvona ke? Kanilezvi mata masiku lawa va to tekelwa a noivho,+ hi kona va to pfhunga.*
16 A nga kona a tsemako nguwo ya yiswa a yi rungela kota ciziva ka nguwo ya kale hakuva a ciziva leco ci ta dungurula a nguwo leyo ci engetela ku handzula.+
17 A nga kona kambe a chelako vhinyo ya yiswa ka tinghotso ta kale. Loku a maha lezvo, a tinghotso ti ta phuxuka, a vhinyo yi halaka ni tinghotso ta kona ti wonheka. Kanilezvi va chela vhinyo ya yiswa ka tinghotso ta tiswa kasi zvontlhe zvi hlayiseka.”
18 Na a ha va byela a zvilo lezvi, ku no chikela hosana yo kari yi mu khizamela, yiku: “Ka cikhati leci ndzi alakanya ku a nhanyana wa mina i file, kanilezvi tana le kaya u ta mu tlhateka mandla, i ta vhuka a hanya.”+
19 Andzhako ka lezvo, Jesu i no suka a mu landzela zvin’we ni vapizani vakwe.
20 A wasati wo kari a nga xaniseka hi mababyi yo huma nkhata hi 12 wa malembe+ i no tshinela hi lendzhako a henya machakafula ya nguwo yakwe,+
21 hakuva mbilwini yakwe i waku: “Loku ndzo kota ntsena ku henya a nguwo yakwe, ndzi ta hanya.”
22 Jesu i no hundzuluka niku laha a nga mu wona i te ngalo kakwe: “Tiya hlanha, n’wananga! A kukholwa ka wena ku ku hanyisile.”+ Zvalezvo a wasati loye i no hanya.+
23 Makunu a cikhati leci Jesu a nga chikela mutini wa hosana leyo, a wona vabi va zvitoliya ni citshungu na ci maha tsanga-tsanga,+
24 i te: “Humani lomu ndlwini hakuva a cinhanyetana leci a ci fangi kanilezvi ci no etlela.”+ Laha va ngazwa lezvo va no mu hleka.
25 Zvalezvi a citshungu ci nga humesiwa handle, i no nghena lomu ndlwini a khoma a canja ga cona,+ a cinhanyetana ci se vhuka.+
26 Kunene, a mhaka leyi yi no hangalaka tikweni lego gontlhe.
27 Loku Jesu a sukile laho, a vavanuna vambiri va zvikhumu+ va no mu landzela na va banguleka, vaku: “N’wana wa Dhavhidha, hi mahele wuxinji.”
28 Andzhako ka loku a nghenile mutini, a zvikhumu lezvo zvi nota kakwe, yena aku ka zvona: “Ma kholwa lezvaku ndzi nga mu hanyisa?”+ Vaku kakwe: “Ina, Hosi.”
29 Makunu i no henya matihlo yabye,+ aku: “Kota lezvi mu kholwako, a zvi maheke ka n’wina.”
30 A matihlo yabye ma no vhululeka. Kanilezvi Jesu i no va laya nguvhu, aku: “Mu nga byeli munhu a mhaka leyi.”+
31 Kanilezvi, loku va sukile hi laho, va no wulawula hi yena tikweni lego gontlhe.
32 A cikhati leci va nga ha suka hi laho, ku nota vanhu ni wanuna wo kala ku wulawula a nga hi ni dhimoni.+
33 Andzhako ka loku a hlongolile dhimoni lego, a wanuna loye i no sangula ku wulawula.+ Kwalaho a zvitshungu zvi no hlamala, zviku: “A hi se tshuka hi wona zvilo zvo kota lezvi lomu Izrayeli.”+
34 Kanilezvi a vaFarisi va waku: “I hlongola madhimoni hi ntamu wa hosi ya madhimoni.”+
35 Jesu i no fambafamba madhoropeni wontlhe ni zvidhoropaneni a gondzisa masinagogeni yabye, na a chumayela a mahungu ya manene ya Mufumo, ni ku hanyisa a vanhu ka mababyi ya tixaka tontlhe ni tinghumbe ta tixaka tontlhe.+
36 Laha a nga wona zvitshungu, i no zvi zwela wusiwana+ hakuva zvi wa xaniseka ni ku pepetseka a ku khwatsi tiyivhu to kala murisi.+
37 Makunu i no byela vapizani vakwe, aku: “A ntiro wa kutshovela wa hombe, kanilezvi a vatiri va tsongwani.+
38 Hikwalaho, kombelani a N’winyi wa ntiro lezvaku a rumela vatiri kutshoveleni kakwe.”+
Mitlhamuselo ya lahasi
^ Kutani: “maka; citatara”.
^ Kutani: “maka; citatara”.
^ Kutani: “na a tshamile mezeni”.
^ Kutani: “va ta tshama mezeni”.
^ Kutani: “jejuwarako”.
^ Kutani: “jejuwara”.
