Mavingu 11:1-31
11 A zvikalo zvi kanganyisako* cinyenyeko ka Jehovha,Kanilezvi a pezo yo lulama* ya mu tsakisa.+
2 Loku a matshandza ma chikela, ku landzela a tingana,+Kanilezvi a wutlhari gi na ni lava va ti koramisako.+
3 A kutsumbeka ka lava va lulamileko hi kona ku va rangelako,+Kanilezvi a mawunwa ya vakanganyisi ma ta va lovisa.+
4 A titshomba ti nga ta vhuna nchumu sikwini ga zanga,+Kanilezvi a kululama hi kona ku to tlhatlhisa kufeni.+
5 A kululama ka loyi wo kala cisolo ku lulameta a ndlela yakwe,Kanilezvi loyi wa kubiha i tawa hi kota ya kubiha kakwe.+
6 A kululama ka lava vo lulama ku ta va tlhatlhisa,+Kanilezvi a vakanganyisi va ta phasiwa hi kunavela kabye.+
7 Loku a munhu wa kubiha afa, a kutsumba kakwe ka mbhela;Ni kurindzela loku a nga hi nako hi ntamu wakwe konawu ka mbhela.+
8 A wakululama wa tlhatlhiswa kukaratekeni,A wakubiha a sala a vhaleta a wutshamu gakwe.+
9 Hi nomu wakwe, a mudhuki* wa lovisa a muakelani wakwe,Kanilezvi hi wutivi, a valulamileko va tlhatlhisiwa.+
10 A wunene ga munhu wa kululama gi tsakisa a dhoropa,Niku loku a wakubiha a lova, ku biwa mikulungwani.+
11 A dhoropa ga tlakusiwa hi kota ya cikatekiso ca wakululama,+Kanilezvi a nomu wa loyi wa kubiha wa gi hohlota.+
12 Ni wihi a nga hava kupima i chepeta* a muakelani wakwe,Kanilezvi a munhu loyi a nga ni kupimisisa wa ti miyelela.+
13 A muhlevi i famba a bhoxa zvihundla,+Kanilezvi a munhu wa kutsumbeka* wa fihla cihundla.*
14 Loku ku nga hi na wurangeli ga wutlhari,* a vanhu vawa,Kanilezvi a mhaka ya tiya* loku a masungukati ma tele.+
15 Loyi a ti bohako a ku riha a nandzu wa mumbe munhu i tava ni zvikarato,+Kanilezvi loyi a alako* ku khoma mandla* i tava kuruleni.
16 A wasati wa munene* i kuma wudzundzo,+Kanilezvi a vavanuna va tihanyi va teka titshomba.
17 A munhu wa munene i maha zvazvinene ka muhefemulo* wakwe,+Kanilezvi a munhu wa xapi i ti nehela zvikarato* yena n’winyi.+
18 A munhu wa kubiha i amukela miholo ya wukanganyisi,+Kanilezvi loyi a byalako kululama i amukela a nchachazelo wa lisine.+
19 Loyi a tiyako a ku nde a yimela kululama i ndleleni ya wutomini,+Kanilezvi loyi a hlongoliselako a zvakubiha i ndleleni ya kufa.
20 Lava va timbilu to gombonyeka cinyenyeko ka Jehovha,+Kanilezvi lava va fambako hi ndlela yi nga solekiko va mu tsakisa.+
21 Tiva lezvi: A munhu wa kubiha a nga ta pona ku tsayisiwa,+Kanilezvi a vana va loyi wa kululama va ta pona.
22 A ku khwatsi i sindza ga ouro nhovhini ya khumba,I tshamisile lezvo a wasati wo saseka loyi a nga hava kupimisisa.
23 A kunavela ka wakululama ku yisa ka zvazvinene,+Kanilezvi lezvi a wakubiha a zvi rindzelako zvi vhuxa zanga.
24 Ku na ni loyi a hanako,* a gumesa ava ni zvotala;+Ni mun’wani a tsonako lezvi a nga fanele ku nyika, kanilezvi ava wusiwaneni.+
25 A munhu* wa kuhana i ta kateka,*+Ni loyi a tangalisako* van’wani i ta tangalisiwawu.+
26 A vanhu va ta rukatela loyi a tsonako a timbewu,Kanilezvi va ta katekisa loyi a xavisako a timbewu.
27 Loyi a ti tsitsiritako a maha zvazvinene i ta mahelwa wuxinji,+Kanilezvi loyi a hlotako zvakubiha hi zvalezvo a to welwa hi zvona.+
28 Loyi a tsumbako a titshomba takwe i tawa,+Kanilezvi a wakululama i ta nyuka a ku fana ni matluka.+
29 Loyi a nehako zvikarato* laha mutini wakwe, a tshomba yakwe yi tava moya,+Ni cipumbu ci tava nandza ga loyi a nga ni mbilu yo tlhariha.
30 A handzu wa munhu wa kululama i sinya ya wutomi,+Ni loyi a ganyako a mihefemulo* i tlharihile.+
31 Loku hakunene a wakululama a kuma hakhelo yakwe laha misaveni,Zvi ta ku yini hi wakubiha ni muwonhi!+
Mitlhamuselo ya lahasi
^ Kutani: “pezo yontlhe ya ribye”.
^ Kutani: “zvi kalavelako”.
^ Kutani: “a nga kholwiko ka Nungungulu”.
^ Kutani: “kanyisa”.
^ Hi kukongoma: “a munhu a tsumbekileko moyeni”.
^ Hi kukongoma: “wa fenengeta mhaka”.
^ Kutani: “wusungukati gi nene”.
^ Kutani: “ku na ni kuhanyisa”.
^ Hi kukongoma: “a vengako”.
^ Ku nga ku khomana mandla mu maha civhumelwano.
^ Kutani: “wa mbhuri”.
^ Kutani: “wa ti wisa tingana”.
^ Hi kukongoma: “a hangalasako”.
^ Hi kukongoma: “a cheletelako mati”.
^ Hi kukongoma: “i ta kuluka”.
^ Kutani: “muhefemulo”.
^ Kutani: “tingana”.