Mavingu 18:1-24
18 Loyi a ti hambanisako ni van’wani i ti kokela gakwe basi;I ala* a wutlhari gontlhe gi vhunako.
2 A cipumbu a ci tsakisiwi hi kupimisisa;Ci lava ku paluxa lezvi zvi nga mbilwini ya cona.+
3 Loku a munhu wa kubiha a chikela, a tingana tonawu to chikela;A tingana tita zvin’we ni kuchepetiwa.+
4 A timhaka ti humako hi lomu non’wini wa munhu i mati yo eta.+
A cibuka ca wutlhari i congo wu khulungako.
5 A hi zvinene a kuva ni cihlawulela u yimelela a wakubiha,+Hambu ku mu alela a kululama loyi a lulamileko.+
6 A timhaka ta cipumbu ti vhuxa tiholova,+Ni nomu wa cona wu ci vitanisela kubiwa.+
7 A nomu wa cipumbu hi wona wu ci lovisako,+Ni minomu ya cona i ntlhamu ka wutomi* ga cona.
8 A magezu ya muhlevi ma fana ni zvakuga zvo nandziha;*+Ma mitiwa ma tekela ku relela lomu khwirini.+
9 Ni wihi a lolohako ntirweni wakweMakabye wa mulovisi.+
10 A vito ga Jehovha likhokhola* lo tiya.+
Loyi a lulamileko i tsutsumela ka gona, a ya vhikelwa.*+
11 A tshomba ya munhu wo ganya i dhoropa gakwe gi vhikelweko khwatsi;Maalakanyweni yakwe i muro wu vhikelako.+
12 Na a nga sewa, a mbilu ya munhu ya ti kulisa;+Na ku nga seta wudzundzo ku ranga kutikoramisa.+
13 Loku a munhu a hlamula a mhaka na a nga sezwa lisine la konaI kombisa wupumbu gakwe, a ti wisa tingana.+
14 A moya wa munhu wu nga mu tiyisa loku a kari a babya,+Kanilezvi himani a nga rwalako a moya wu tshovekileko* ke?+
15 A mbilu ya loyi a nga ni kupimisisa yi kuma wutivi,+Ni ndleve ya loyi a tlharihileko yi hlota wutivi.
16 A cinyikiwo ca munhu ca mu vhulela ndlela,+Ci mu yisa ka vanhu vahombe.
17 Loyi a rangako a tlhamusela mhaka yakwe i wonekisa ku khwatsi i lulamile,+Kala kuta loyi mun’wani a ta mu wutisela.*+
18 A kuba tihlolo zvi mbheta a tiholova,+Zvi tsema mhaka cikari ka* valala vahombe.
19 A makabye a zangarileko a nga tshineleleki a ku hundza ni dhoropa gi vhikelweko khwatsi.+Ku na ni tiholova ti fanako ni zvikwinyaro zva khokhola.+
20 Hi mihandzu ya nomu wakwe, a munhu i ta tata a khwiri gakwe;+A munhu i ta eneliswa hi lezvi zvi humako minon’wini yakwe.
21 A kufa ni kuhanya zvi ntan’wini wa lirimi;+Lava va randzako ku li tirisa va taga a mihandzu ya lona.+
22 Loyi a kumako a sati wa munene i kumile tshomba,+Niku i kuma tipswalo ta Jehovha.+
23 A cisiwana ci wulawula hi kukhongotela,Kanilezvi a munhu wa ku ganya i hlamula hi xapi.
24 Ku na ni vanghana lava va longileko ku wisana,+Kanilezvi ku na ni munghana a namarelako ku hundza makabye.+
Mitlhamuselo ya lahasi
^ Kutani: “I chepeta”.
^ Kutani: “muhefemulo”.
^ Kutani: “ni zvilo zva kuga hi ku konyetela”.
^ Kutani: “torre”.
^ Hi kukongoma: “a tlakusiwa”, a kuma kupona kasi a nga kumiwi.
^ Kutani: “wu nga kukaratekeni ka hombe”.
^ Kutani: “a ta mu hlolisisa khwatsi”.
^ Kutani: “Zvi lamula”.
