Mitsengo 12:1-16
12 Makunu Miriyamu na Aroni va no hleva Mosi hi kota ya wasati wa muKuxe loyi a nga chadhile naye, hakuva i wa tekile a sati wa muKuxe.+
2 Va waku: “Kasi Jehovha i no wulawula hi ku tirisa Mosi yece ke? A nga wulawulangi hi ku tirisa hinawu ke?”+ Jehovha i wa kari a zvizwa.+
3 Mosi i wa hi yena munhu wo rula a ku hundza vontlhe*+ laha misaveni.
4 Hi citshuketi, Jehovha i no wulawula na Mosi, na Aroni na Miriyamu, aku: “Humani hi wunharu ga n’wina muya tendeni ga mutlhangano.” Hikwalaho, va no huma hi wunharu gabye.
5 Jehovha i no relela hi lomu ka mhinga ya refu+ a ya yima laha nyangweni ya tenda, a vitana Aroni na Miriyamu. Hi wumbiri gabye va no tshinela.
6 Makunu i te ngalo: “Zwanani magezu ya mina, ndzo kombela. Loku ku wa hi ni muphrofeti wa Jehovha cikari ka n’wina, na ndzi ti tivekisile kakwe hi muwoniso,+ ndzi wulawula naye hi noro.+
7 Kanilezvi a zvi mahisi lezvo ka nandza ga mina Mosi! Yena i nyikilwe ku wonelela a yindlu ya mina yontlhe.*+
8 Ndzi wulawula naye nghohe ni nghohe,*+ laha kubaseni. A ndzi wulawuli naye hi mifihlakalo. Yena wa wona ciwumbeko ca Jehovha. Hikuyini mu nga kala ku chava ku hleva a nandza ga mina Mosi ke?”
9 Hikwalaho, a zanga ya Jehovha yi no vhura yi va vhukela, a gumesa a suka kabye.
10 A refu gi no suka laha tendeni. Miriyamu i no biwa hi hlokonho yo basa yo fana ni gapongo.+ Aroni i no hundzuluka a cuwuka Miriyamu, a se wona lezvaku i bilwe hi hlokonho.+
11 Aroni i no tekela ku byela Mosi, aku: “Ndza ku khongotela, hosi yanga! U nga cheli kota hi ciwonho leci! Hi mahile wupumbu!
12 Ndza ku kombela lezvaku u nga mu tsiki a maha ku khwatsi munhu a nga pswaliwa na a file, loyi a khihlanya ga nyama yakwe yi gilweko!”
13 Mosi i no rila ka Jehovha hi gezu ga hombe, aku: “O Nungungulu, ndza ku khongotela, mu hanyise!”+
14 Jehovha i no hlamula Mosi, aku: “Loku a papayi wakwe i wo mu phelela lomu nghoheni, i wa nga tawa tingana hi 7 wa masiku ke? I wa tshame yece 7 wa masiku le handle ka wugovelo.+ Andzhako ka lezvo, i ta wuya lomu wugovelweni.”
15 Hikwalaho, Miriyamu i no tshama yece le handle ka wugovelo 7 wa masiku;+ a vanhu a va sukangi laho kala loku Miriyamu a wuyisilwe.
16 Makunu a vanhu va no suka le Hazerote+ vaya gova ciwuleni ca Parani.+
Mitlhamuselo ya lahasi
^ Kutani: “wo ti koramisa nguvhu (wo olova) a ku hundza ni wihi mun’wani munhu”.
^ Hi kukongoma: “Lomu ndlwini ya mina yontlhe, i tsumbekile”.
^ Hi kukongoma: “nomu ni nomu”.
