Mitsengo 13:1-33
13 Makunu Jehovha i no wulawula na Mosi, aku:
2 “Ruma vavanuna va ya hlola a tiko ga Khanani, legi ndzi lavako ku nyika a vaIzrayeli. Mu ta ruma wanuna mun’we ka lixaka lin’we ni lin’wani la vapapayi vakwe, loyi a nga hosana+ cikari kabye.”+
3 Hikwalaho, Mosi i no va ruma va suka hi ciwuleni ca Parani,+ kota lezvi Jehovha a nga leletele. Vontlhe a vavanuna lava va wa hi tihosana ta vaIzrayeli.
4 A mavito yabye hi lawa: Ka lixaka la ka Rubheni hi Xamuwa, a n’wana wa Zakura;
5 ka lixaka la ka Simeyoni hi Xafate, a n’wana wa Hori;
6 ka lixaka la ka Judha hi Kalebhi,+ a n’wana wa Jefune;
7 ka lixaka la ka Isakari hi Igali, a n’wana wa Josefa;
8 ka lixaka la ka Efrayime hi Hoxeya,+ a n’wana wa Nuni;
9 ka lixaka la ka Bhenjamini hi Palti, a n’wana wa Rafu;
10 ka lixaka la ka Zebhuloni hi Gadhiyeli, a n’wana wa Sodhi;
11 ka lixaka la ka Josefa,+ hi ka lixaka la Manase,+ hi Gadhi, a n’wana wa Susi;
12 ka lixaka la ka Dhani hi Amiyeli, a n’wana wa Gemali;
13 ka lixaka la ka Axeri hi Setura, a n’wana wa Mikayeli;
14 ka lixaka la ka Naftali hi Nabhi, a n’wana wa Vhofsi;
15 ka lixaka la ka Gadhi hi Geweli, a n’wana wa Maki.
16 Lawa mavito ya vavanuna lava Mosi a nga va ruma kasi va ya piyara tiko. Mosi i no chula Hoxeya, a n’wana wa Nuni, aku hi Joxuwa.*+
17 A cikhati leci Mosi a nga va ruma a kuya va ya piyara tiko ga Khanani, i te ngalo kabye: “Kandzihani muya Negebhe, andzhako ka lezvo mu kandziha muya tikweni ga zvitsunga.+
18 Hlolani kasi mu wona lezvaku i tiko ga matshamela muni+ ni lezvaku a vanhu lava va hanyako ka gona vanhu va ntamu kutani a va na ntamu ke, mu hlola ku va tsongwani kutani va tele;
19 hlolani kambe kasi mu wona ku a tiko gi nene kutani a hi gi nene, niku a madhoropa lawa va tshamako ka wona ma bhiyelwe kutani a ma bhiyelwangi.
20 Zamani ku pola lezvaku a misava ya kona yi nonile* kutani cisapa,*+ ni lezvaku ku na ni tisinya kutani a ti kona. Tiyani hlanha+ mu wuya ni mihandzu yo kari ya tiko.” Yi wa hi nguva ya kubuvha ka mauvha yo sangula.+
21 Hikwalaho, va no kandziha va ya piyara a tiko kusukela ciwuleni ca Zini+ kala Rehobha,+ kusuhani ni Lebho-Hamate.*+
22 A cikhati leci va nga kandziha vaya Negebhe, va no chikela le Hebroni,+ lomu ku nga hanya Ahimani, na Xexayi, na Talmayi,+ a vaAnake.+ A dhoropa ga Hebroni gi rangile gi akiwa na ka ha kiyela 7 wa malembe kasi legi ga Zowane wa le Gibhite gi akiwa.
23 Laha va nga chikela le Nkoveni wa Exkole+ va no tsema a dhavi ga vhina* gi nga hi ni citata cin’we ca mauvha, leci zvi nga lava ku ci rwaliwa hi vavanuna vambiri hi pingu, a ku patsa ni maromã yo kari ni makuwu.+
24 A wutshamu lego va no gi chula ku i Nkova wa Exkole,*+ hi kota ya citata leci a vaIzrayeli va nga ci tsema leyo.
25 Kumbheleni ka 40 wa masiku,+ va no wuya hi le ka ku piyara tiko.
26 Hikwalaho, va no wuya ka Mosi na Aroni ni ka yontlhe a hlengeletano ya ka Izrayeli ciwuleni ca Parani, le Kadhexe.+ Va no neha a mubiko ka yontlhe hlengeletano va tlhela va yi komba a mihandzu ya tiko.
27 Lezvi va nga hlawutela Mosi hi lezvi: “Hi nghenile tikweni legi u nga hi ruma kuya ka gona niku hakunene ga khulunga a masi ni wulombe;+ a mihandzu ya gona hi leyi.+
28 Hambulezvo, a vanhu lava va hanyako ka tiko lego va na ni ntamu niku a madhoropa ma vhikelweko khwatsi ya hombe nguvhu. Hi wonile ni vaAnake seyo.+
29 A vaAmaleki+ va hanya tikweni ga Negebhe+ niku a vaHiti, ni vaJebhusi+ ni vaAmori+ va hanya tikweni ga zvitsunga. A vaKhanani+ va hanya mbhirini ya bimbi+ ni kusuhani ni Jordhani.”
30 Makunu Kalebhi i no zama ku miyeta vanhu laha va nga yimile mahlweni ka Mosi, aku: “A hi kandziheni zvezvi; ha tiyiseka lezvaku hi ta gi teka, hakuva hakunene hi nga gi hlula.”+
31 Kanilezvi a vavanuna lava va nga fambile zvin’we naye va te: “Hina a hi nge zvi koti a ku kandziha hi yalwa ni vanhu lavo, hakuva va na ni ntamu nguvhu a ku hundza hina.”+
32 Va no simama a ku va nyika mubiko wo biha+ a vaIzrayeli xungetano hi tiko legi va nga gi piyarile, vaku: “A tiko legi hi nga fambafamba hi gi piyara i tiko gi khadamulako a vahanyi va gona niku vontlhe a vanhu lava hi va wonileko ka gona vanhu va ku leha nguvhu.+
33 Hi wonile a vaNefelime seyo, a vana va Anake,+ va tako hi ka* vaNefelime; loku hi ti ringanisa navo, hi fana ni bhandzala kuwoneni ka hina ni kuwoneni kabye.”
Mitlhamuselo ya lahasi
^ Kutani: “Jehoxuwa”, zvi wulako ku: “Jehovha Kuhanyisa”.
^ Hi kukongoma: “gi wondzile”.
^ Hi kukongoma: “gi na ni mafura”.
^ Kutani: “nyangwa ya Hamate”.
^ A vhina i sinya leyi yi pswalako mauvha.
^ Zvi wulako ku: “Citata ca mauvha”.
^ Kutani: “a vana va”.
