Mitsengo 14:1-45
14 Makunu a hlengeletano yontlhe yi no banguleka, ni vanhu va no simama kuba mikosi ni ku rila gontlhe wusiku lego.+
2 Vontlhe a vaIzrayeli va no sangula ku ngurangurela Mosi na Aroni,+ niku a hlengeletano yontlhe yi no va vhukela, yiku: “Mayiwako loku hi wa no fela tikweni ga Gibhite kutani kwalomu ciwuleni leci!
3 Hikuyini Jehovha a hi tisileko lomu ka tiko legi kasi hi ta dawa hi cipadha?+ A vasati va hina ni vana va hina va ta tekiwa kota muphango.+ A hi chukwana ku hi tlhela Gibhite?”+
4 Va zile va byelana, vaku: “A hi yimiseni murangeli hi tlhela Gibhite!”+
5 Zvalezvo, Mosi na Aroni va nowa lahasi hi tinghohe tabye mahlweni ka bandla gontlhe ga ka Izrayeli legi gi nga tsombene.
6 Joxuwa,+ a n’wana wa Nuni, na Kalebhi,+ a n’wana wa Jefune, lava va nga hi cikari ka lava va nga yile va ya piyara tiko, va no handzula tinguwo tabye,
7 va byela a hlengeletano yontlhe ya ka Izrayeli, vaku: “A tiko legi hi nga fambafamba ka gona hi gi hlola gi nene, i tiko ga ginene nguvhu.+
8 Loku Jehovha a xalala hi hina, hakunene i ta hi nghenisa ka tiko legi, a gi nyikela ka hina, a tiko gi khulungako a masi ni wulombe.+
9 Kanilezvi mu nga hluwukeli Jehovha ne mu nga chavi a vanhu va tiko,+ hakuva hi ta va khadamula.* Leci ci nga kari ci va vhikela ci susilwe kabye niku Jehovha i na hina.+ Mu nga va chavi.”
10 Hambulezvo, yontlhe a hlengeletano yi no wulawula hi ku va gandla hi maribye.+ Kanilezvi a kungangamela ka Jehovha ku no woneka hehla ka tenda ga mutlhangano ka vontlhe vanhu va ka Izrayeli.+
11 Makunu Jehovha i no byela Mosi, aku: “Kasi a vanhu lava va ta ndzi kanyisa kala rini ke?+ Kona va ta simama ku nga kholwi ka mina kala rini hambu lezvi ndzi mahileko a zvihlamaliso zvontlhe cikari kabye ke?+
12 Ndzi tsike ndzi vaba hi ntungu ndzi va lovisa ndzi gumesa ndzi ku maha tiko ga hombe ni ga ntamu a ku hundza vona.”+
13 Kanilezvi Mosi i no byela Jehovha, aku: “A vaGibhite, lava u nga humesa a vanhu lava cikari kabye hi ntamu wa wena, va ta zvizwa,+
14 va hlawutela a vanhu va tiko legi. A vanhu va tiko legi vonawu va zvi zwile lezvaku wena, Jehovha, u cikari ka vanhu lava+ ni lezvaku wa woneka kabye nghohe ni nghohe.+ Va zwile kambe lezvaku hi wena Jehovha ni lezvaku a refu ga wena gi tshama hehla kabye niku wena u famba mahlweni kabye lomu ka mhinga ya refu ni mumu, ni lomu ka mhinga ya ndzilo ni wusiku.+
15 Loku wo daya a vanhu lava vontlhe hi khatigin’we,* a matiko lawa ma zwileko a nduma ya wena ma wa taku:
16 ‘Jehovha a nga zvi kotangi ku chiketa a vanhu lava tikweni legi a hlambanyileko ku va nyika, hikwalaho, i va dele le ciwuleni.’+
17 Makunu, Jehovha, ndza ku kombela, kombisa a wukulu ga ntamu wa wena, kota lezvi u tsumbisileko a cikhati leci u ngaku:
18 ‘Jehovha wa nonoka ku zangara, i tele hi lirandzo li nga mbheliko,+ wa tsetselela cigoho ni cihambunyeto, kanilezvi a nga ta tsika ku tsayisa loyi a nga ni nandzu, hakuva i ta neha tsayiselelo wa cigoho ca vapapayi hehla ka vana vabye, kala ka cizukulwana ca wunharu ni kala ka cizukulwana ca wumune.’+
19 Tsetselela a cigoho ca vanhu lava hi kota ya lirandzo la wena la hombe li nga mbheliko, a ku khwatsi hi lezvi u va tsetseleleko kusukela Gibhite kala lezvi.”+
20 Makunu Jehovha i te ngalo: “Ndza va tsetselela, hi kuya hi mhaka ya wena.+
21 Kanilezvi a ku khwatsi hi lezvi ndzi hanyako, a misava yontlhe yi ta tala hi kungangamela ka Jehovha.+
22 Hambulezvo, i hava ni mun’we cikari ka lava va wonileko a kungangamela ka mina, ni zvihlamaliso zva mina+ lezvi ndzi mahileko le Gibhite ni lomu ciwuleni, kanilezvi a simama ku ndzi ringa+ a 10 wa makhati a tlhela a nga ingisi gezu ga mina,+
23 a to wona tiko legi ndzi hlambanyileko ka vapapayi vakwe. I hava ni mun’we wa lava va ndzi kanyisako a to gi wona.+
24 Kanilezvi kota lezvi a nandza ga mina Kalebhi+ a ngava ni moya wo hambana, a simama ku ndzi landzela hi mbilu yontlhe, hakunene ndzi ta mu nghenisa tikweni legi a nga yile ka gona niku a pswalo wakwe wu ta gi teka kota tshomba ya wona.+
25 Kota lezvi a vaAmaleki ni vaKhanani+ va hanyako le nkoveni, a mandziko jikani mu tlhela ciwuleni hi ndlela ya tlhelo ga Bimbi go Pswhuka.”+
26 Makunu Jehovha i no byela Mosi na Aroni, aku:
27 “Kala rini a hlengeletano leyi ya kubiha na ya ha simama ku ndzi ngurangurela ke?+ Ndzi ku zwile a kungurangura ka vaIzrayeli loku va ndzi ngurangurelako hi kona.+
28 Va byele, uku: ‘“A ku khwatsi hi lezvi ndzi hanyako”, ku wula Jehovha, “ndzi ta mu mahela zvalezvi ndzi mu zwileko na mu wula!+
29 A zvirumbi zva n’wina zvi tawa lomu ciwuleni leci,+ ina, n’wina n’wentlhe mu tsalelweko, kusukela ka 20 wa malembe kuya hehla, n’wentlhe n’wina lava mu ndzi ngurangureleko.+
30 I hava cikari ka n’wina a to nghena ka tiko legi ndzi hlambanyileko* ku mu nyika mu tshama ka gona,+ ahandle ka Kalebhi, a n’wana wa Jefune, na Joxuwa, a n’wana wa Nuni.+
31 “‘“A vana va n’wina, lava mu ngaku va ta tekiwa kota muphango,+ hi vona ndzi to va nghenisa va tiva a tiko legi n’wina mu gi alileko.+
32 Kanilezvi a zvirumbi zva n’wina zvi tawa lomu ciwuleni leci.
33 Makunu a vana va n’wina va tava varisi lomu ciwuleni a 40 wa malembe,+ va rwala a kungatsumbeki* ka n’wina kala loyi wo gumesa cikari ka n’wina afa lomu ciwuleni.+
34 Kota lezvi mu mbhetileko a 40 wa masiku+ na mu piyara a tiko, mu ta rwala a minandzu ya n’wina a 40 wa malembe+ — a siku gin’we i lembe, a siku gin’we i lembe — kasi mu tiva ku zvi wula yini a ku ndzi vhukela.*
35 “‘“Mina, Jehovha, ndzi wulile. Lezvi hi lezvi ndzi to maha ka yontlhe a hlengeletano leyi ya kubiha, leyi yi tsombeneko yi ndzi vhukela: Va ta mbhela ciwuleni leci, vafa ka cona.+
36 A vavanuna lava Mosi a va rumileko a ku ya piyara a tiko, lava va nga maha lezvaku a hlengeletano yontlhe yi mu ngurangurela a cikhati leci va nga wuya ni mubiko wo biha xungetano hi tiko,+
37 ina, a vavanuna lava va nga wuya ni mubiko wo biha xungetano hi tiko va ta biwa vafa mahlweni ka Jehovha.+
38 Kanilezvi Joxuwa, a n’wana wa Nuni, na Kalebhi, a n’wana wa Jefune, lava va nga hi cikari ka lava va nga yile va ya piyara a tiko, va ta simama va hanya.”’”+
39 A cikhati leci Mosi a nga wula magezu lawo ka vaIzrayeli vontlhe, a vanhu va no sangula ku rila nguvhu.
40 Ahandle ka lezvo, va no vindzuka ni mixo va zama ku kandziha vaya madembeleni ya citsunga, vaku: “Hi longile a ku kandziha hiya ka wutshamu legi Jehovha a gi wulileko, hakuva hi wonhile.”+
41 Kanilezvi Mosi i te ngalo: “Hikuyini mu hambunyetako a cileletelo ca Jehovha? Mu nga ta humelela.
42 Mu nga kandzihi hakuva Jehovha a nga na n’wina; mu ta hluliwa hi valala va n’wina.+
43 A vaAmaleki ni vaKhanani va mu rindzele kasi kulwa na n’wina.+ Mu ta dawa hi cipadha. Kota lezvi mu tsikileko ku landzela Jehovha, Jehovha a nga tava na n’wina.”+
44 Hambulezvo, va no maha kani, va kandziha le hehla ka citsunga,+ kanilezvi ne a arke* ga civhumelwano ca Jehovha ne Mosi a va sukangi laha cikari ka wugovelo.+
45 Makunu a vaAmaleki ni vaKhanani, lava va nga hanya citsungeni leco, va no relela va ta va hlasela va va hangalasa kala le Horma.+
Mitlhamuselo ya lahasi
^ Hi kukongoma: “hakuva vona i pawa ka hina”.
^ Hi kukongoma: “a ku khwatsi munhu mun’we”.
^ Hi kukongoma: “ndzi tlakusileko canja ga mina”.
^ Hi kukongoma: “wubhayi”.
^ Kutani: “a ku ndzi maha nala wa n’wina”.
