Mitsengo 15:1-41
-
Milayo xungetano hi minyikelo (1-21)
-
Nayo wun’we ka vaIzrayeli va mabeleko ni ka valuveli (15, 16)
-
-
Minyikelo ya loku a munhu a wonha hi kuphazama (22-29)
-
Tsayiselelo ya loku a munhu a wonha ha womu (30, 31)
-
A muhambunyeti wa nayo wa sabhadho a dawa (32-36)
-
A tinguwo ti wave ni machakafula le magumo (37-41)
15 Jehovha i no engeta a byela Mosi, aku:
2 “Byela a vaIzrayeli, uku: ‘Laha hi kugumesa mu to nghena tikweni legi ndzi mu nyikako kasi mu tshama ka gona,+
3 mu nyikela ka Jehovha a munyikelo wu hisiwako hi ndzilo, hi homu, kutani yivhu, kutani mbuti — kani munyikelo wa kuhiswa,+ kutani muphahlo wa ku maha cifungo co hlawuleka, kutani munyikelo wa kuzvirandza,+ kutani munyikelo wu mahiwako ka mibuzo ya n’wina ya zvikhati zvi yimisilweko+ kasi zviva masema yo nuhela ma tsakisako Jehovha+ —
4 loyi a nyikelako a munyikelo wakwe i fanele ku nyikela ka Jehovha ni munyikelo wa tindzhoho wa mapa ma sililweko khwatsi,+ ya cipandze ca wukhume ca efa,* ma patsilweko ni cipandze ca wumune ca hini* ya mafura.
5 U fanele ku nyikela a cipandze ca wumune ca hini ya vhinyo kota munyikelo wa zvakunwa zvin’we ni munyikelo wa kuhiswa+ kutani ni muphahlo wa yivhana yin’we ni yin’wani ya matsune.
6 Loku yi hi yivhu ya matsune, u ta nyikela a munyikelo wa tindzhoho wa zvipandze zvimbiri zva efa zva mapa ma sililweko khwatsi, ma patsilweko ni cipandze ca wunharu ca hini ya mafura.
7 U ta nyikela a cipandze ca wunharu ca hini ya vhinyo kota munyikelo wa zvakunwa, wuva masema yo nuhela ma tsakisako Jehovha.
8 “‘Kanilezvi loku u nyikela ka Jehovha a cidhunana ca homu kota munyikelo wa kuhiswa+ kutani kota muphahlo wa ku maha a cifungo co hlawuleka,+ kutani kota muphahlo wa kuhlengela,+
9 u ta nyikela a cidhunana leco ca homu zvin’we ni munyikelo wa tindzhoho+ wa zvipandze zvinharu zva efa zva mapa ma sililweko khwatsi ma vhuvilweko ni khihlanya ga hini ya mafura.
10 U ta nyikela kambe ni khihlanya ga hini ya vhinyo, kota munyikelo wa zvakunwa,+ wuva munyikelo wu hisiwako hi ndzilo, kota masema yo nuhela ma tsakisako Jehovha.
11 Lezvi hi lezvi zvi faneleko ku mahiwa hi dhuna gin’we ni gin’wani, kutani hi yivhu yin’we ni yin’wani ya matsune, kutani hi yivhana yin’we ni yin’wani ya matsune, kutani hi mhongo yin’we ni yin’wani.
12 Kani zvingani u nyikelako, a cin’we ni cin’we ci fanele ku mahiswa lezvo, hi kuya hi ntsengo wa zvona.
13 A vaIzrayeli vontlhe va mabeleko va fanele ku wu mahisa lezvo a munyikelo wu hisiwako hi ndzilo, kota masema yo nuhela ma tsakisako Jehovha.
14 “‘Loku a muluveli loyi a hanyako na n’wina kutani munhu loyi a nga cikari ka n’wina hi cikhati co leha a nyikela a munyikelo wu hisiwako hi ndzilo, kota masema yo nuhela ma tsakisako Jehovha, i fanele ku zvi mahisa zvalezvi n’winawu mu mahisako zvona.+
15 Ku tava ni cileletelo cin’we ka n’wina mu lumbako bandla ni ka muluveli loyi a hanyako na n’wina. Ci tava cileletelo ca kala kupindzuka zvizukulwaneni zva n’wina zvontlhe. A muluveli i fanele ku fana na n’wina mahlweni ka Jehovha.+
16 Ku tava ni nayo mun’we ni cileletelo cin’we ca kulamula, a ka n’wina ni ka muluveli loyi a hanyako na n’wina.’”
17 Jehovha i no engeta a byela Mosi, aku:
18 “Byela a vaIzrayeli, uku: ‘Loku mu nghena tikweni legi ndzi mu yisako ka gona,
19 muga zvakuga* zva tiko lego,+ mu ta nyikela munyikelo ka Jehovha.
20 Mu ta nyikela a munyikelo wa mihandzu ya n’wina yo sangula+ ya tindzhoho hi tipawa to khwatsi tiphera. Mu ta wu nyikelisa lezvi mu nyikelisako zvona a munyikelo wa wutshamu go hulela kona timbewu.
21 Ka mihandzu ya n’wina yo sangula, pambulani yo kari mu nyikela ka Jehovha kota munyikelo wa tindzhoho zvizukulwaneni zva n’wina zvontlhe.
22 “‘Loku mu phazama mu nga ingisi zvontlhe a zvileletelo lezvi Jehovha a byelileko Mosi
23 — zvontlhe lezvi Jehovha a mu leleteleko hi nomu wa Mosi, kusukela ka siku legi Jehovha a leleteleko hi gona zviya mahlweni, zvizukulwaneni zva n’wina —
24 ni loku zvi mahilwe hi kuphazama a hlengeletano na yi nga zvi tivi, a hlengeletano yontlhe yi ta nyikela a cidhunana ca homu kota munyikelo wa kuhiswa wuva masema yo nuhela ma tsakisako Jehovha, zvin’we ni munyikelo wa kona wa tindzhoho, ni munyikelo wa kona wa zvakunwa, hi kuya hi mamahela ya kona yo toloveleka,+ ni cimbutana cin’we, kota munyikelo wa ciwonho.+
25 A mupristi i ta yi mahela muphahlo wa ku kombela ku tsetselelwa zviwonho a hlengeletano yontlhe ya ka Izrayeli; vona va ta tsetselelwa+ hakuva va no phazama niku va nehile a munyikelo wabye, a munyikelo wu hisiwako hi ndzilo wu mahelwako Jehovha ni munyikelo wabye wa ciwonho mahlweni ka Jehovha, hi kota ya kuphazama kabye.
26 A hlengeletano yontlhe ya vaIzrayeli ni muluveli loyi a hanyako cikari kabye va ta tsetselelwa, hakuva a vanhu va no phazama.
27 “‘Loku a munhu* a wonha hi kuphazama, i ta nyikela mbuti ya kati ya lembe gin’we, kota munyikelo wa ciwonho.+
28 A mupristi i ta mu mahela muphahlo wa ku kombela ku tsetselelwa zviwonho a munhu* loye a phazamileko a maha ciwonho mahlweni ka Jehovha. I ta maha muphahlo wa ku kombela ku tsetselelwa a ciwonho leco, niku a munhu loye i ta tsetselelwa.+
29 Ka muIzrayeli wa mabeleko ni ka muluveli loyi a hanyako cikari kabye, ku fanele kuva ni nayo wun’we ka n’wina loku a munhu a maha nchumu hi kuphazama.+
30 “‘Kanilezvi a munhu* loyi a wonhako ha womu,+ kani muIzrayeli wa mabeleko kutani muluveli, i rukatela Jehovha. I fanele ku tsemiwa* cikari ka vanhu vakwe.
31 Kota lezvi a kanyisileko a mhaka ya Jehovha a tlhela a tshova cileletelo cakwe, a munhu* loye i fanele ku tsemiwa* futsi.+ I ta rwala a cigoho cakwe.’”+
32 A cikhati leci a vaIzrayeli va nga hi ciwuleni, va no kuma munhu na a lava tihunyi hi siku ga sabhadho.+
33 Lava va nga mu kuma na a lava tihunyi va no mu teka va famba naye ka Mosi na Aroni ni ka hlengeletano yontlhe.
34 Va no mu vhalela,+ hakuva zvi wa nga se bohiwa ku va ta mu maha yini.
35 Jehovha i no byela Mosi, aku: “A munhu loye i fanele ku dawa;+ a hlengeletano yontlhe yi wa mu gandle hi maribye le handle ka wugovelo.”+
36 Hikwalaho, a hlengeletano yontlhe yi no mu humesa le handle ka wugovelo yi ya mu gandla hi maribye kala afa, kota lezvi Jehovha a nga leletele Mosi.
37 Jehovha i no engeta a byela Mosi, aku:
38 “Byela a vaIzrayeli lezvaku va fanele ku maha machakafula le magumo ka tinguwo tabye zvizukulwaneni zvabye zvontlhe. Va wa vekele lihindza la azuli hi le hehla ka machakafula ya tinguwo leto.+
39 ‘Mu fanele kuva ni machakafula lawa le magumo ka tinguwo ta n’wina kasi loku mu ma wona, mu alakanya zvontlhe a zvileletelo zva Jehovha, mu zvi hlayisa.+ Mu nga landzeli a timbilu ta n’wina ni mahlo ya n’wina, lezvi zvi mu kokelako wubhayini ga moya.+
40 Lezvo zvi ta mu vhuna ku alakanya zvontlhe zvileletelo zva mina mu zvi hlayisa kasi muva vo basa ka Nungungulu wa n’wina.+
41 Hi mina Jehovha, a Nungungulu wa n’wina, loyi a mu humesileko tikweni ga Gibhite, ndzi fela kuva Nungungulu wa n’wina.+ Hi mina Jehovha, a Nungungulu wa n’wina.’”+
Mitlhamuselo ya lahasi
^ Hi kukongoma: “pawa”.
^ Kutani: “muhefemulo”.
^ Kutani: “muhefemulo”.
^ Kutani: “muhefemulo”.
^ Kutani: “dawa”.
^ Kutani: “dawa”.
^ Kutani: “muhefemulo”.
