Mitsengo 16:1-50
16 Makunu Kora,+ a n’wana wa Izhare,+ a n’wana wa Kohate,+ a n’wana wa Levhi,+ i no ti patsa na Dhatani na Abhiramu, a vana va Eliyabhe,+ na Oni, a n’wana wa Peleti, lava hi wunharu gabye va nga vana va Rubheni.+
2 Va no vhukela Mosi na va hi zvin’we ni 250 wa vavanuna va ka Izrayeli va nga hi tihosana ta hlengeletano, a vavanuna va hlawulilweko va bandla tlhelo vavanuna va nga hi ni zvikhundla.
3 Va no bohana va vhukela+ Mosi na Aroni, vaku kabye: “Hi karele hi n’wina! A hlengeletano yontlhe yi basile,+ vontlhe va basile niku Jehovha i cikari kabye.+ Makunu hikuyini mu ti tlakusako hehla ka bandla ga Jehovha?”
4 Laha Mosi a ngazwa lezvo, i no tekela kuwa lahasi hi nghohe.
5 I no byela Kora ni vontlhe a vaseketeli vakwe, aku: “Ni mixo, Jehovha i ta komba loyi a nga wakwe,+ ni loyi a basileko, ni loyi a faneleko ku tshinela kakwe.+ Loyi a to mu hlawula,+ i ta tshinela kakwe.
6 Mahani lezvi: Wena Kora ni vontlhe a vaseketeli va wena,+ tekani zvibya zva ku woka hi zvona ndzilo+
7 mu chela ndzilo ni libani ka zvona mahlweni ka Jehovha mandziko; a wanuna loyi Jehovha a to mu hlawula,+ hi yena a basileko. N’wina vana va Levhi+ mu hundzeletile!”
8 Mosi i no byela Kora, aku: “N’wina vana va Levhi, ndzi kombela ku mu ingisela.
9 Mu zvi wona na zvi hi zvi tsongwani lezvi a Nungungulu wa Izrayeli a mu hambanisileko cikari ka hlengeletano ya ka Izrayeli+ a mu vhumelela a kuva mu tira a ntiro wa tabhernakeli ga Jehovha ni ku yima mahlweni ka hlengeletano mu yi tirela+
10 ni lezvi a mu tisileko kusuhani kakwe zvin’we ni vamakabye va n’wina, a vana va Levhi ke? Mu lava ku wutla ni wupristi?+
11 Hi cigelo leco, wena ni vontlhe a vaseketeli va wena, lava u boheneko zvin’we navo, mo vhukela Jehovha. Aroni ova yini a kuza mu mu ngurangurela?”+
12 Andzhako ka lezvo, Mosi i no vitanisa Dhatani na Abhiramu,+ a vana va Eliyabhe, kanilezvi va te ngalo: “Hi nga tata!
13 U zvi wona na zvi hi zvi tsongwani lezvi u hi humesileko ka tiko gi khulungako a masi ni wulombe kasi u ta hi dayisa lomu ciwuleni ke?+ Zvezvi u lava ku tlhela u ti maha hosi ya hombe hehla ka hina* ke?
14 Phela a wu hi nghenisangi ka tiko gi khulungako a masi ni wulombe+ kutani ku hi nyika tshomba ya masimu ni zvivhina.* U lava ku va vhala* matihlo a vavanuna lava ke? Hina hi nga tata!”
15 Hikwalaho, Mosi i no zangara nguvhu a byela Jehovha, aku: “U nga cuwuki a munyikelo wabye wa tindzhoho. Mina a ndzi wutlangi ne mbongola yin’we yabye niku a ndzi gohelangi ne mun’we wabye.”+
16 Mosi i no byela Kora, aku: “Wena ni vontlhe a vaseketeli va wena ti wonekeliseni mahlweni ka Jehovha a mandziko — wena, na vona, na Aroni.
17 A mun’we ni mun’wani i fanele ku teka cibya cakwe ca ku woka hi cona ndzilo a chela libani ka cona. A mun’we ni mun’wani i ta neha a cibya cakwe ca ku woka hi cona ndzilo mahlweni ka Jehovha — zvi tava 250 wa zvibya zva ku woka hi zvona ndzilo — wenawu zvin’we na Aroni, a mun’we ni mun’wani na a hi ni cibya cakwe ca ku woka hi cona ndzilo.”
18 Hikwalaho, a mun’we ni mun’wani wabye i no teka a cibya cakwe ca ku woka hi cona ndzilo a chela ndzilo ni libani ka cona a ya yima laha nyangweni ya tenda ga mutlhangano zvin’we na Mosi na Aroni.
19 A cikhati leci Kora a nga tsombanisa a vaseketeli vakwe+ va va vhukela laha nyangweni ya tenda ga mutlhangano, a kungangamela ka Jehovha ku no woneka ka hlengeletano yontlhe.+
20 Makunu Jehovha i no byela Mosi na Aroni, aku:
21 “Ti hambaniseni ni ntlawa lowu, ndzi fela ku va lovisa khatigin’we.”+
22 Zvalezvo va nowa lahasi hi tinghohe tabye, vaku: “O Nungungulu, wena Nungungulu wa mimoya ya vanhu vontlhe,*+ u ta zangarela a hlengeletano yontlhe hi kota ya ciwonho ca munhu mun’we ke?”+
23 Jehovha i no byela Mosi, aku:
24 “Byela a hlengeletano, uku: ‘Ti tsawukaniseni ni tenda ga Kora, ni ga Dhatani, ni ga Abhiramu!’”+
25 Makunu Mosi i no suka aya ka Dhatani na Abhiramu, niku a madhota+ ya ka Izrayeli ma no famba zvin’we naye.
26 I no byela a hlengeletano, aku: “Ti tsawukaniseni ni matenda ya vavanuna lava vo biha. Mu nga henyi ne nchumu wun’we wabye kasi mu nga lovisiwi hi kota ya ciwonho cabye.”
27 Va no tekela ku suka matlhelweni wontlhe ya matenda ya Kora, na Dhatani, na Abhiramu. Dhatani na Abhiramu va no huma va yima tinyangweni ta matenda yabye na va hi zvin’we ni vasati vabye, ni vafana vabye ni vanana vabye.
28 Mosi aku ngalo: “Hi ka lezvi, mu ta zvi tiva lezvaku hi Jehovha a nga ndzi ruma ku maha a zvilo lezvi zvontlhe, ni lezvaku a zvilo lezvi a zvi humi hi mbilwini ya mina:*
29 Loku a vanhu lava va fisa lezvi a vanhu vontlhe va fisako zvona, ni loku a tsayiselelo wabye wu fana ni wa vanhu vontlhe, a hi Jehovha a ndzi rumileko.+
30 Kanilezvi loku Jehovha a maha nchumu wo hlamalisa kabye, a misava yi ahlama nomu wa yona yi va mita zvin’we ni zvilo zvabye zvontlhe, va relela Cilahleni* na va ha hanya, mu ta zvi tiva lezvaku hakunene a vanhu lava va kanyisile Jehovha.”
31 Zvalezvi a nga mbheta ku wula magezu lawo, a misava leyi yi nga hi lahasi kabye yi no avanyeka.+
32 A misava yi no ahlama nomu wa yona yi va mita, zvin’we ni mingango yabye, ni vontlhe lava va nga lumba Kora,+ ni tontlhe titshomba tabye.
33 Hikwalaho, vona ni vontlhe lava va nga hi vabye va no relela Cilahleni* na va ha hanya, a misava yi va fenengeta. Hikwalaho, va no lova cikari ka bandla.+
34 A cikhati leci va ngaba huwa, a vaIzrayeli lava va nga va randzele va no suka va tsutsuma, hakuva va waku: “Ha chava ku a misava yi nga hi mitawu!”
35 Hi kulandzela, ku nota ndzilo hi ka Jehovha+ wu ta hisa a vavanuna lava va 250 va nga kari va hisa a libani.+
36 Jehovha i no byela Mosi, aku:
37 “Byela Eleyazari, a n’wana wa mupristi Aroni, lezvaku a susa zvibya zva ku woka hi zvona ndzilo+ laha ndzilweni, hakuva zvi basile. Mu byele kambe lezvaku a hangalasa ndzilo wuya kule.
38 A zvibya zva ku woka hi zvona ndzilo zva vavanuna lava va wonhileko va hakhela hi wutomi gabye* zvi fanele ku bethiwa zvi maha zvixapana kasi zvi nameketiwa laha alatini,+ hakuva va zvi nehile mahlweni ka Jehovha, zviva lezvi zvi basileko. Zvi tava citlharihiso ka vaIzrayeli.”+
39 Hikwalaho, mupristi Eleyazari i no teka a zvibya zva ku woka hi zvona ndzilo zva kobre, lezvi zvi nga nyikelwe hi lava va hisilweko, a zvi betha zvi maha zvixapana kasi zvi nameketiwa laha alatini,
40 kota lezvi Jehovha a nga mu byelile hi nomu wa Mosi. Leco cive cialakanyiso ka vaIzrayeli ca lezvaku a ku na munhu a nga vhumelelwiko,* loyi a nga hiko wa pswalo wa Aroni, a to tshinela a hisa libani mahlweni ka Jehovha+ ni lezvaku ku ngavi na munhu a ti fananisako na Kora ni vaseketeli vakwe.+
41 Ka siku gi nga landzela, a hlengeletano yontlhe ya ka Izrayeli yi no sangula ku ngurangurela Mosi na Aroni,+ yiku: “Hi n’wina va vambiri mu nga daya a vanhu va Jehovha.”
42 A cikhati leci a hlengeletano yontlhe yi nga bohana yi vhukela Mosi na Aroni, va no hundzuluka va cuwuka a tenda ga mutlhangano. Va no wona refu na gi fenengetile tenda, a kungangamela ka Jehovha ku sangula ku woneka.+
43 Mosi na Aroni va noya mahlweni ka tenda ga mutlhangano,+
44 Jehovha aku ka Mosi:
45 “N’wina humani cikari ka hlengeletano leyi kasi ndzi tekela ku yi lovisa khatigin’we.”+ Zvalezvo va nowa lahasi hi tinghohe tabye.+
46 Mosi i no byela Aroni, aku: “Teka a cibya ca ku woka hi cona ndzilo u woka ndzilo wa laha alatini+ u chela libani ka wona u hatlisa uya hlengeletanweni u ya yi mahela a muphahlo wa ku kombela ku tsetselelwa zviwonho,+ hakuva Jehovha i zangarile. A khombo gi sangulile!”
47 Aroni i no teka a cibya ca ku woka hi cona ndzilo, a tsutsuma aya cikari ka bandla, kota lezvi Mosi a nga wulile. Kanilezvi a khombo gi wa sangulile cikari ka vanhu. Hikwalaho, i no chela libani lomu ka cibya ca ku woka hi cona ndzilo, a sangula ku mahela vanhu a muphahlo wa ku kombela ku tsetselelwa zviwonho.
48 I no yima cikari ka lava va fileko ni lava va hanyako. Hi kugumesa, a ntungu wu no nyima.
49 Lava va fileko hi kota ntungu vave 14 700, a ku tsika lava va ngafa hi kota ya Kora.
50 Laha hi kugumesa Aroni a nga tlhela ka Mosi tendeni ga mutlhangano, a ntungu wu wa nyimile.
Mitlhamuselo ya lahasi
^ Kutani: “ku hi fumela”.
^ A zvivhina masimu ya tisinya leti ti pswalako mauvha.
^ Hi kukongoma: “bhoxa”.
^ Hi kukongoma: “mimoya ya nyama yontlhe”.
^ Kutani: “a ndzi zvi sukeli”.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Kutani: “va wonheleko a mihefemulo yabye”.
^ Hi kukongoma: “a ku na mumbe munhu”.
