Mitsengo 17:1-13
-
A nhonga ya Aroni leyi yi pfepfileko yiva cikombiso (1-13)
17 Makunu Jehovha i no byela Mosi, aku:
2 “Byela a vaIzrayeli lezvaku va neha a nhonga hi ka yindlu yin’we ni yin’wani ya vapapayi, ya hosana ya yindlu yin’we ni yin’wani ya vapapayi,+ 12 wa tinhonga a ku patsa tontlhe. Tsala a vito ga mun’we ni mun’wani laha ka nhonga yakwe.
3 U ta tsala vito ga Aroni laha ka nhonga ya Levhi, hakuva i nhonga yin’we yi nga kona ka hosana ya yindlu yin’we ni yin’wani ya vapapayi.
4 Veka tinhonga leto lomu tendeni ga mutlhangano mahlweni ka Kustumunyu,+ laha ndzi tolovelako ku ti wonekelisa kona ka n’wina.+
5 A nhonga ya wanuna loyi ndzi to mu hlawula+ yi ta pfepfa niku ndzi ta miyeta a kungurangura ka vaIzrayeli lava va ndzi ngurangurelako+ va tlhela va ngurangurela n’winawu.”+
6 Hikwalaho, Mosi i no va byela timhaka leto a vaIzrayeli, niku tontlhe a tihosana tabye ti no mu nyika tinhonga — nhonga yin’we hi hosana ya yindlu ya vapapayi, 12 wa tinhonga — ni nhonga ya Aroni yi wa hi cikari ka tona.
7 Mosi i no teka a tinhonga leto a ti veka lomu tendeni ga Wukustumunyu mahlweni ka Jehovha.
8 Hi siku gi nga landzela, laha Mosi a nga nghena lomu tendeni ga Wukustumunyu, a nhonga ya Aroni, leyi yi nga yimela a yindlu ya Levhi, yi wa pfepfile, yi humesa matshundzwa ya zvitsangi ni zvitsangi zvi balekileko ni timendwa to buvha.
9 Makunu Mosi i no teka a tinhonga tontlhe mahlweni ka Jehovha a ti neha ka vanhu vontlhe va ka Izrayeli. Va no ti cuwuka, a mun’we ni mun’we a teka a nhonga yakwe.
10 Makunu Jehovha i no byela Mosi, aku: “Tlhelisa a nhonga ya Aroni+ mahlweni ka Kustumunyu, kota nchumu wu faneleko ku vekiwa wuva cikombiso+ ka vana va kuhluwuka,+ kasi va nyima ku ndzi ngurangurela ni lezvaku va ngafi.”
11 Mosi i no tekela ku maha zvalezvi Jehovha a nga mu leletele. I no zvi mahisa zvalezvo.
12 A vaIzrayeli va te ngalo ka Mosi: “Makunu hi tafa; hakunene hi ta lova; hontlheni hi ta lova!
13 Ni wihi loyi a to tshinela ntsena kusuhani ni tabhernakeli ga Jehovha i tafa!+ Kasi hontlheni hi ta mbhela hi ku fisa zvezvi ke?”+
