Mitsengo 18:1-32
18 Jehovha i no byela Aroni, aku: “Wena, ni vana va wena, ni yindlu ya vapapayi va wena, mu ta rwala nandzu wa ni cihi cigoho ci to mahelwa wutshamu go basa+ niku wena ni vana va wena hi n’wina mu to rwala nandzu wa ni cihi cigoho ci to mahelwa wupristi ga n’wina.+
2 Ahandle ka lezvo, vitana a vamakabye va wena va lixaka la ka Levhi, a lixaka la vakokwani va wena, kasi va ta ti patsa na wena va ku tirela,+ wena ni vana va wena, mahlweni ka tenda ga Wukustumunyu.+
3 Va ta maha mitiro leyi u to va avela va tlhela va maha a mitiro yontlhe ya lomu tendeni.+ Hambulezvo, va nga tshineli ka zvibya zva wutshamu go basa ni alati, kasi vona ne hambu n’wina mu ngafi.+
4 Va ta patsana na wena va maha mitiro ya tenda ga mutlhangano ni ntiro wontlhe wa tenda, ni lezvaku ku ngavi na munhu a nga vhumelelwiko* a tshinelako ka n’wina.+
5 Mu ta maha a mitiro ya n’wina ya wutshamu go basa+ ni ya alati+ kasi a vaIzrayeli va nga ha zangarelwi kambe.+
6 Ndzi tekile a vamakabye va n’wina, va nga vaLevhi, cikari ka vaIzrayeli kota cinyikiwo ka n’wina.+ Va nyikelwe ka Jehovha kasi va maha a ntiro wa tenda ga mutlhangano.+
7 Wena ni vana va wena mu ta maha a mitiro ya wupristi yi yelanako ni alati ni lezvi zvi nga ndzeni ka kortina;+ mu fanele ku maha ntiro lowo.+ Ndzi mu nyikile a ntiro wa wupristi kota cinyikiwo. Ni wihi munhu a nga vhumelelwiko* a to tshinela i fanele ku dawa.”+
8 Jehovha i no engeta a wulawula na Aroni, aku: “Ndzi ku yimisile kasi u wonelela a minyikelo leyi yi nyikelwako ka mina.+ Wena ni vana va wena ndzi mu nyikile a cipandze ca zvontlhe a zvilo zvo basa lezvi zvi nyikelwako hi vaIzrayeli kota ciavelo ca kala kupindzuka.+
9 Ka minyikelo yo basabasa, leyi yi hisiwako hi ndzilo, a zva wena hi lezvi: Yontlhe a minyikelo leyi va nyikelako, a ku patsa ni minyikelo yabye ya tindzhoho,+ ni minyikelo yabye ya ciwonho,+ ni minyikelo yabye ya nandzu+ leyi va ndzi tiselako. I nchumu wo basabasa ka wena ni ka vana va wena.
10 U fanele ku zvi gela wutshan’wini go basabasa.+ Zvi ta giwa hi vavanuna vontlhe. Zvi tava zvilo zvi basileko ka wena.+
11 Lezvi zvonawu zva wena: A zvinyikiwo lezvi va nyikelako+ zvin’we ni yontlhe a minyikelo ya kundziwilitelwa+ ya vaIzrayeli. Ndzi nyikile wena, ni vafana va wena, ni vanhanyana va wena, kota ciavelo ca kala kupindzuka.+ Ni wihi wa yindlu ya wena, loyi a basileko, a ngaga.+
12 “Ndza ku nyika a mihandzu yabye yo sangula+ leyi va nyikelako ka Jehovha: A mafura lawa ya manene ya kona, ni vhinyo yiswa leyi ya yinene ya kona, ni tindzhoho.+
13 A mihandzu yo sangula yo buvha ya zvontlhe zva tiko gabye, leyi va to neha ka Jehovha, yi tava ya wena.+ Ni wihi wa yindlu ya wena, loyi a basileko, a ngaga.
14 “Zvontlhe a zvilo zvi nyikelwako* lomu Izrayeli zvi tava zva wena.+
15 “A matewula wontlhe ya zvontlhe zvi hanyako,*+ lawa va to nyikela ka Jehovha, kani ya munhu kutani ya cihari, ma tava ya wena. Hambulezvo, u fanele ku tlhatlhisa a matewula ya munhu,+ ni matewula ya zvihari zvi nga hlazvekangiko wonawu u fanele ku ma tlhatlhisa.+
16 U ta ma tlhatlhisa hi ntsengo wa kutlhatlhisa loku ma hi ka tanga ya hweti yin’we kuya hehla, hi ntsengo wu gemilweko wa ntlhanu wa maxekeli* ya prata,+ hi kuya hi xekeli ga wutshamu go basa.* A xekeli gin’we i 20 wa magera.*
17 Ntsena a matewula ya dhuna ga homu, kutani ya yivhana ya matsune, kutani ya mbuti hi wona woce u nga faneliko ku ma tlhatlhisa.+ Zvilo zvi basileko. U ta n’watsekela a nkhata wa zvona laha alatini,+ u gumesa u hisa a mafura ya zvona ma tuvika musi kota munyikelo wu hisiwako hi ndzilo wa masema yo nuhela ma tsakisako Jehovha.+
18 A nyama ya zvona yi tava ya wena. Yi tava ya wena a ku fana ni lezvi a cifuva ca munyikelo wa kundziwilitelwa ni nenge wa cinene zvi nga zva wena.+
19 A minyikelo yontlhe yo basa leyi a vaIzrayeli va to nyikela ka Jehovha+ ndzi nyikile wena, ni vafana va wena, ni vanhanyana va wena, kota ciavelo ca kala kupindzuka.+ Civhumelwano ca munyu* ca kala kupindzuka leci Jehovha a ci mahako na wena ni pswalo wa wena.”
20 Jehovha i no engeta a byela Aroni, aku: “U nga tava ni tshomba tikweni gabye, ne a ku na cipandze ca misava cikari kabye ci tova ca wena.+ Hi mina ciavelo ca wena ni tshomba ya wena cikari ka vaIzrayeli.+
21 “Wona lezvaku a vana va Levhi ndzi va nyikile a cipandze contlhe ca wukhume+ ca Izrayeli kota tshomba hi kota ya ntiro lowu va wu mahako, a ntiro wa tenda ga mutlhangano.
22 A vanhu va ka Izrayeli va nga ha tshineleli a tenda ga mutlhangano, hakuva va ngava ni ciwonho vafa.
23 A vaLevhi va ta maha a ntiro wa tenda ga mutlhangano niku hi vona va to rwala nandzu wa cigoho cabye.+ Leci cileletelo ca kala kupindzuka zvizukulwaneni zva n’wina zvontlhe ca lezvaku a va faneli ku amukela tshomba cikari ka vaIzrayeli.+
24 Hakuva a vaLevhi ndzi va nyikile a cipandze ca wukhume leci ci nyikelwako ka Jehovha hi vaIzrayeli ci maha tshomba yabye. Hi caleco ci ndzi mahileko ndzi va byela lezvi: ‘A va faneli ku kuma tshomba cikari ka vaIzrayeli.’”+
25 Makunu Jehovha i no byela Mosi, aku:
26 “Byela a vaLevhi, uku: ‘Mu ta amukela a cipandze ca wukhume hi ka vaIzrayeli, leci ndzi mu nyikileko kota tshomba.+ Ka cipandze leco ca wukhume, susani a cipandze ca cona ca wukhume mu nyikela ka Jehovha kota munyikelo.+
27 A cipandze leco ci ta woniwa kota munyikelo wa n’wina, a ku khwatsi hi loku ti hi tindzhoho ta wutshamu go hulela kona timbewu+ kutani pfuno wa cigowolo ca vhinyo kutani wa cigowolo ca mafura.
28 Hi ndlela leyo, n’winawu mu ta nyikela a munyikelo ka Jehovha hi zvontlhe a zvipandze zva wukhume lezvi mu zvi amukelako hi ka vaIzrayeli. Ka zvipandze lezvo zva wukhume, nyikani mupristi Aroni a munyikelo wa Jehovha.
29 Mu ta nyikela a minyikelo ya tixaka tontlhe ka Jehovha, kota zvilo zvi basileko, na mu yi pambula ka lezvi zva wuchukwana ka zvontlhe zvinyikiwo mu nyikiwako.’+
30 “Va byele, uku: ‘Loku mu nyikela zva wuchukwana zva zvona, lezvi zvi to sala a vaLevhi va ta zvi wona kota pfuno wa wutshamu go hulela kona timbewu ni pfuno wa cigowolo ca vhinyo kutani wa cigowolo ca mafura.
31 N’wina ni mingango ya n’wina mu nga zvi gela ni ka gihi wutshamu, hakuva i nchachazelo wa n’wina wa ntiro lowu mu wu mahako laha tendeni ga mutlhangano.+
32 Loku contlhe cikhati mu maha munyikelo hi lezvi zva wuchukwana zva zvona mu nga tava ni ciwonho mhakeni leyi. Mu nga nyenyezisi a zvilo zvo basa zva vaIzrayeli, mu ngafa.’”+
Mitlhamuselo ya lahasi
^ Hi kukongoma: “ku ngavi ni mumbe munhu”, ku nga munhu a nga hiko wa ngango wa Aroni.
^ Hi kukongoma: “A ku na mumbe munhu”, ku nga munhu a nga hiko wa ngango wa Aroni.
^ Ku nga zvontlhe lezvi zvi basiselweko Nungungulu hi ku nyikelwa ka Nungungulu na zvi nga ha koteki ku zvi cicisa ne ku zvi tlhatlhisa.
^ Hi kukongoma: “ya nyama yontlhe”.
^ Kutani: “hi kuya hi xekeli go basa”.
^ Ku nga civhumelwako ca kala kupindzuka ni ci nga ciciko.
