Mitsengo 20:1-29
20 Hi hweti yo sangula, a hlengeletano yontlhe ya ka Izrayeli yi no chikela ciwuleni ca Zini, niku a vanhu va no sangula ku hanya Kadhexe.+ Miriyamu+ i no fela ka wutshamu lego, a lahliwa laho.
2 Makunu ku wa nga hi na mati kasi a hlengeletano yinwa.+ Hikwalaho, yi no bohana yi vhukela Mosi na Aroni.
3 A vanhu va no holovisa Mosi,+ vaku: “Ku wa hi chukwana loku hi wa nofa a cikhati leci a vamakabye va hina va ngafa mahlweni ka Jehovha!
4 Hikuyini mu tisileko a bandla ga Jehovha lomu ciwuleni leci kasi hina ni mitlhambi ya hina hi ta fela kona ke?+
5 Kona mu hi humesele yini hi Gibhite mu hi tisa ka wutshamu legi go biha?+ A hi wutshamu ga ku hi nga byala timbewu, ni makuwu, ni mivhina,* ni maromã, ne a ku na mati ya kunwa.”+
6 Makunu Mosi na Aroni va no suka mahlweni ka bandla vaya nyangweni ya tenda ga mutlhangano va yawa lahasi hi tinghohe tabye; a kungangamela ka Jehovha ku no sangula ku woneka kabye.+
7 Jehovha i no byela Mosi, aku:
8 “Teka nhonga u vitana a hlengeletano, wena ni makabye wa wena Aroni, mu wulawula ka ribye kuwoneni kabye kasi gi humesa mati. Mu ta humesa mati hi laha ka ribye mu nyika a hlengeletano yinwa zvin’we ni mitlhambi ya yona.”+
9 Hikwalaho, Mosi i no teka nhonga mahlweni ka Jehovha+ kota lezvi a nga mu leletele.
10 Hi kulandzela, Mosi na Aroni va no tsombanisa bandla mahlweni ka ribye, vaku kabye: “Makunu zwanani n’wina zvitlula-milayo!* Mu lava ku hi mu humesela mati hi ka ribye legi ke?”+
11 Zvalezvo, Mosi i no tlakusa canja gakwe aba ribye makhati mambiri hi nhonga yakwe ku se sangula ku huma mati yo tala, a hlengeletano yinwa zvin’we ni mitlhambi ya yona.+
12 Andzhako ka lezvo, Jehovha i no byela Mosi na Aroni, aku: “Kota lezvi mu nga kala ku kholwa ka mina ni ku ndzi basisa mahlweni ka vaIzrayeli mu nga ta chiketa a bandla legi tikweni legi ndzi to va nyika.”+
13 Lawa i mati ya Meribha,*+ laha a vaIzrayeli va nga holovisa Jehovha, lezvi zvi nga maha ku a basiswa cikari kabye.
14 Makunu Mosi i no rumela zvirun’wa zvi suka hi Kadhexe zviya ka hosi ya Edhomi,+ zvi yaku: “A makabye wa wena, Izrayeli,+ i ngalo: ‘Wena wa ti tiva khwatsi a tixanisa tontlhe leti hi kumeneko nato.
15 A vapapayi va hina va yile Gibhite,+ niku hina hi no hanya Gibhite malembe* yo tala.+ A vaGibhite va hi xanisile ni vapapayi va hina.+
16 Hi kugumesa, hi no rila ka Jehovha,+ a hizwa, a rumela ngilozi+ yi ta hi humesa Gibhite niku zvezvi hi lomu Kadhexe, gi nga dhoropa gi nga laha mbhinganweni wa tiko ga wena.
17 Makunu hi kombela ku tsemakanya hi lomu tikweni ga wena. Hi nga ta tsemakanya hi lomu masin’wini kutani hi lomu zvivhineni,* ne hi nga tanwa mati ya ni yihi hlowo. Hi ta famba hi ruwa ga hosi; hi nga ta hambuka hiya cineneni kutani cibhabheni kala hi hundza lomu tikweni ga wena.’”+
18 Hambulezvo, Edhomi i te ngalo: “U nga hundzi hi lomu tikweni ga hina. Loku wo hundza hi kona, ndzi ta huma ni cipadha ndzi ku khinga.”
19 A vaIzrayeli va no mu hlamula, vaku: “Hi ta famba hi ruwa niku loku hina ni mitlhambi ya hina hinwa mati ya wena, hi ta hakhela.+ A hi lavi cin’wani, ho lava ku tsemakanya basi hi mikondzo.”+
20 Hambulezvo, Edhomi i te ngalo: “U nga hundzi hi lomu.”+ Zvalezvo, Edhomi i no huma kasi ku mu khinga na a hi ni vanhu vo tala zvin’we ni butho* ga ntamu.
21 Edhomi i no ala ku tsika Izrayeli a tsemakanya hi lomu tikweni gakwe. Hikwalaho, Izrayeli i no mu potsa.+
22 A hlengeletano yontlhe ya ka Izrayeli yi no suka Kadhexe yiya Citsungeni ca Hora.+
23 Makunu Jehovha i no byela Mosi na Aroni le Citsungeni ca Hora, mbhinganweni wa tiko ga Edhomi, aku:
24 “Aroni i ta hlengeletwa ka vanhu vakwe.*+ A nga ta nghena tikweni legi ndzi to nyika a vaIzrayeli, hakuva hi wumbiri ga n’wina mu hluwukele a cileletelo ca mina xungetano hi mati ya Meribha.+
25 Teka Aroni ni n’wana wakwe Eleyazari u kandziha uta navo Citsungeni ca Hora.
26 Mu tlhatlhe tinguwo Aroni+ u bohisa a n’wana wakwe Eleyazari;+ Aroni i ta fela kwalaho.”*
27 Hikwalaho, Mosi i no maha zvalezvi Jehovha a mu leleteleko. Va no kandziha a Citsunga ca Hora a hlengeletano yontlhe na yi va wona.
28 Makunu Mosi i no mu tlhatlha tinguwo Aroni a bohisa a n’wana wakwe Eleyazari. Andzhako ka lezvo, Aroni i no fela kwalaho le hehla ka citsunga.+ Mosi na Eleyazari va no chika hi le citsungeni.
29 Laha a hlengeletano yontlhe yi nga wona lezvaku Aroni i file, a yindlu yontlhe ya ka Izrayeli yi no mu rila a 30 wa masiku.+
Mitlhamuselo ya lahasi
^ A mivhina tisinya leti ti pswalako mauvha.
^ Kutani: “vahluwuki”.
^ Zvi wulako ku: “Kuholova”.
^ Hi kukongoma: “masiku”.
^ A zvivhina masimu ya tisinya leti ti pswalako mauvha.
^ Hi kukongoma: “canja”.
^ Magezu yo sasekiselwa ma wulako kufa.
^ Hi kukongoma: “i ta hlengeletwa afa kwalaho”.