Mitsengo 22:1-41
22 A vaIzrayeli va no suka va ya gova tivaleni ta Mowabhi, mahlweni ka Jeriko, hi le tlhatuko wa Jordhani.+
2 Bhalaki,+ a n’wana wa Zipore, i no wona zvontlhe lezvi Izrayeli a nga mahile vaAmori.
3 Hikwalaho, Mowabhi i no chava nguvhu hi kota ya vanhu lavo, hakuva va wa tele nguvhu; kunene Mowabhi i no babya hi ku chava vaIzrayeli.+
4 Mowabhi i no byela a madhota ya vaMidhiyani, aku:+ “A bandla legi gi taga zvontlhe lezvi zvi hi randzeleko a ku fana ni lezvi a dhuna ga homu gi gako a byanyi ga khwati.”
Ka cikhati leco, Bhalaki, a n’wana wa Zipore, i wa hi hosi ya Mowabhi.
5 I no rumela zvirun’wa ka Bhalami, a n’wana wa Bheyori, wa le Petora,+ gi nga wutshamu gi kumekako kusuhani ni Congo,* a tikweni gakwe ga mabeleko, zvi yaku: “Ku humile vanhu hi le tikweni ga Gibhite. Va fenengetile a nghohe* ya misava*+ niku va tshama kwalaha phambeni ka mina.
6 Ndzi kombela ku uta zvezvi u ta ndzi rukatelela a vanhu lava,+ hakuva va na ni ntamu a ku hundza mina. Kuzvilava ndzi nga va hlula ndzi va hlongola lomu tikweni, hakuva ndza zvi tiva lezvaku loyi u mu katekisako wa kateka, ni loyi u mu rukatelako wa rukatelwa.”
7 Hikwalaho, a madhota ya Mowabhi ni madhota ya Midhiyani, ma no famba na ma hi ni hakhelo ya ku ya nyika a muvhumbi mandleni ya wona. Va noya ka Bhalami+ va ya mu byela a mahungu ya Bhalaki.
8 Bhalami i no va hlamula, aku: “Etlelani laha a wusiku legi, ndzi ta wuya ndzi ta mu byela ni gihi gezu legi Jehovha a to ndzi byela.” Hikwalaho, a tihosana ta Mowabhi ti no tshama na Bhalami.
9 Makunu Nungungulu i noya ka Bhalami, a yaku:+ “Hi vamani a vavanuna lava va nga na wena?”
10 Bhalami i no hlamula a Nungungulu wa lisine, aku: “Bhalaki, a n’wana wa Zipore, a hosi ya Mowabhi, i ndzi rumelele mahungu, yaku:
11 ‘A vanhu lava va humako hi Gibhite va fenengetile a nghohe* ya misava.* Makunu tana u ta ndzi rukatelela vona.+ Kuzvilava ndzi ngalwa navo ndzi va hlongola.’”
12 Kanilezvi Nungungulu i no byela Bhalami, aku: “U nga fambi navo ne u nga rukateli a vanhu lavo hakuva va katekisilwe.”+
13 Bhalami i no vhuka ni mixo a byela tihosana ta Bhalaki, aku: “Tlhelani tikweni ga n’wina hakuva Jehovha wa ala ku ndzi famba na n’wina.”
14 Hikwalaho, a tihosana ta Mowabhi ti no suka ti tlhela ka Bhalaki, ti yaku: “Bhalami i alile ku wuya na hina.”
15 Hambulezvo, Bhalaki i no tlhela a rumela a tihosana to tala nguvhu ni to chaviseka a ku hundza leti ta ntlawa wo sangula.
16 Va noya ka Bhalami va yaku: “Bhalaki, a n’wana wa Zipore, i ngalo: ‘Ndzi kombela ku u nga tsiki nchumu wu ku tsandzekisa kuta ka mina,
17 hakuva ndzi ta ku chachazela nguvhu ndzi tlhela ndzi maha ni cihi u to ndzi byela a ku ndzi ci maha. Hikwalaho, tana u ta ndzi rukatelela vanhu lava.’”
18 Kanilezvi Bhalami i no hlamula malandza ya Bhalaki, aku: “Hambu loku Bhalaki i wo ndzi nyika a yindlu yakwe na yi tele hi prata ni ouro ndzi wa nga ta maha nchumu, kani wahombe kutani wa wutsongwani, lowu wu lwako ni cileletelo ca Jehovha, a Nungungulu wa mina.+
19 Kanilezvi ndzi kombela lezvaku n’winawu mu etlela laha a wusiku legi kasi ndzi tiva ku zvini zvin’wani lezvi Jehovha a to ndzi byela.”+
20 Nungungulu i noya ka Bhalami ni wusiku, a yaku kakwe: “Loku a vavanuna lava va tele ku ta ku vitana, famba navo, kanilezvi wula ntsena lezvi ndzi to ku byela lezvaku u wula.”+
21 Hikwalaho, Bhalami i no vhuka ni mixo a gabhatsela mbongola* yakwe a famba ni tihosana ta Mowabhi.+
22 Kanilezvi a zanga ya Nungungulu yi no vhindluka hi lezvi a nga kari a famba, niku a ngilozi ya Jehovha yi no yima laha ruweni kasi yi mu betela. Bhalami i wa khilele mbongola yakwe niku i wa hi zvin’we ni malandza yakwe ya mambiri.
23 A cikhati leci a mbongola yi nga wona a ngilozi ya Jehovha na yi yimile laha ruweni na yi khomile cipadha canjeni ga yona, yi no zama ku hambuka yi nghena lomu masin’wini. Kanilezvi Bhalami i no sangula ku yiba kasi a yi wuyisa laha ruweni.
24 Makunu a ngilozi ya Jehovha yi no ya yima laha ka wutshamu go hlongana ga ndlela cikari ka zvivhina* zvimbiri, lezvo na ku hi ni mimuro ya maribye seno ni seno.
25 Laha a mbongola yi nga wona a ngilozi ya Jehovha yi no sangula ku ti manya ni muro, yi se manya nkondzo wa Bhalami laha murweni; Bhalami i no sangula ku yiba kambe.
26 Makunu a ngilozi ya Jehovha yi noya phambeni yi ya yima ka wutshamu go hlongana laha ka ku zvi wa nga koteki ku hambukela cineneni kutani cibhabheni.
27 Laha a mbongola yi nga wona a ngilozi ya Jehovha, yi no tshama lahasi. Hikwalaho, Bhalami i no zangara nguvhu a simama ku bhukutela mbongola hi nhonga yakwe.
28 Hi kugumesa, Jehovha i no vhulula a nomu wa mbongola+ yiku ngalo ka Bhalami: “Zvini ndzi nga ku wonhela a kuza u ndziba a makhati lawa ya manharu?”+
29 Bhalami i no hlamula mbongola, aku: “Ndzi kuba hi kota ya lezvi u nga ndzi maha cipumbu. Loku a ndzova ni cipadha canjeni ga mina, na ndzi ku dele!”
30 A mbongola yiku ka Bhalami: “Kasi a ndzi mbongola ya wena leyi u khilelako wutomini ga wena gontlhe kala nyamutlha ke? Ndzi tshuka ndzi ku maha zvezvi ke?” Yena aku: “Ahihi!”
31 Hi kulandzela, Jehovha i no vhulula mahlo ya Bhalami+ a wona ngilozi ya Jehovha na yi yimile laha ruweni na yi khomile cipadha canjeni ga yona. Zvalezvo, i no koramisa hloko yakwe, a khizama lahasi.
32 A ngilozi ya Jehovha yi no mu wutisa, yiku: “U wa yi bela yini a mbongola ya wena a makhati lawa ya manharu ke? Hi mina ndzi ngata ndzi ta ku betela hakuva a ndlela ya wena yilwa ni kurandza ka mina.+
33 A mbongola yi no ndzi wona yi zama ku ndzi potsa a makhati lawa ya manharu.+ A hi zvi veke laha ka ku a yi ndzi potsangi! Kala lezvi na ndzi ku dele ndzi tsika mbongola yi hanya.”
34 Makunu Bhalami i no byela ngilozi ya Jehovha, aku: “Ndzi wonhile hakuva ndzi wa nga zvi tivi lezvaku hi wena u nga nyima laha ruweni kasi ku tlhangana na mina. Makunu loku lezvi zvi bihile mahlweni ka wena, ndzi ta tlhela.”
35 Kanilezvi a ngilozi ya Jehovha yi no byela Bhalami, yiku: “Famba ni vavanuna lava, kanilezvi wula ntsena lezvi ndzi to ku byela.” Hikwalaho, Bhalami i no simama ku famba ni tihosana ta Bhalaki.
36 Laha Bhalaki a ngazwa lezvaku Bhalami i chikele, i no tekela ku huma a mu khinga le dhoropeni ga Mowabhi legi gi nga mbhirini ya Arnoni hi le mbhinganweni wa tiko.
37 Bhalaki i no wutisa Bhalami, aku: “Kasi a ndzi ku vitanisangi ke? Hikuyini u nga kala kuta ka mina? U no alakanya ku ndzi nga ta zvi kota ku ku chachazela nguvhu ke?”+
38 Bhalami i no hlamula Bhalaki, aku: “Kunene ndzi tile ka wena zvezvi. Kanilezvi ndzi ta vhumelelwa ku wula nchumu ke? Ndzi ngo wula ntsena a magezu lawa Nungungulu a ma chelako non’wini wa mina.”+
39 Hikwalaho, Bhalami i no famba na Bhalaki va ya chikela Kiriyat-Kutsote.
40 Bhalaki i no maha miphahlo hi tihomu ni tiyivhu a rumela zvipandze zvo kari ka Bhalami ni ka tihosana leti ti nga hi naye.
41 Ni mixo, Bhalaki i no teka Bhalami a kandziha naye vaya Bhamote-Bhaali. Hi laho i wa zvi kota ku wona a vanhu vontlhe.+
Mitlhamuselo ya lahasi
^ Zvi wonekisa ku khwatsi ku wuliwa Congo wa Eufrate.
^ Hi kukongoma: “tihlo”.
^ Kutani: “tiko”.
^ Kutani: “tiko”.
^ Hi kukongoma: “tihlo”.
^ Hi kukongoma: “pswele ga mbongola”.
^ A zvivhina masimu ya tisinya leti ti pswalako mauvha.