Mitsengo 25:1-18
25 Laha Izrayeli a nga hi Xitime,+ a vanhu va no sangula ku maha wubhayi ni vanhanyana va Mowabhi.+
2 A vavasati va no ramba vanhu ka miphahlo ya vanungungulu vabye.+ A vanhu va no sangula kuga ni ku khizamela a vanungungulu vabye.+
3 Hikwalaho, Izrayeli i no ti patsa* navo, a khozela Bhaali wa Peyori.+ Jehovha i no zangarela Izrayeli.
4 Jehovha i no byela Mosi, aku: “Khoma a varangeli* vontlhe va vanhu u va daya u gumesa u va hayeka mahlweni ka Jehovha ni mumu* kasi a zanga ya Jehovha yi vhurako yi renga ka Izrayeli.”
5 Makunu Mosi i no byela valamuli va Izrayeli, aku:+ “A mun’we ni mun’wani wa n’wina i wa daye a vavanuna vakwe lava va hlengeleko ka ku khozela* Bhaali wa Peyori.”+
6 Kanilezvi zvalezvo, a mun’we wa vaIzrayeli i nota ni wasati wa muMidhiyani+ cikari ka vamakabye vakwe kuwoneni ka Mosi ni ka yontlhe hlengeletano ya ka Izrayeli, a cikhati leci va nga kari va rila laha nyangweni ya tenda ga mutlhangano.
7 Laha Finiyasi,+ a n’wana wa Eleyazari, a n’wana wa mupristi Aroni, a nga zvi wona, i no tekela ku suka a teka tlhari.
8 I no landza a wanuna loye wa muIzrayeli a ya nghena lomu tendeni a va tlhava hi wumbiri gabye, a wanuna wa muIzrayeli ni wasati loye hi laha ka zviro zvakwe zva wubeleki. Zvalezvo a ntungu wu no nyima cikari ka vaIzrayeli.+
9 Lava va fileko hi ntungu lowo vave 24 000.+
10 Andzhako ka lezvo, Jehovha i no byela Mosi, aku:
11 “Finiyasi,+ a n’wana wa Eleyazari, a n’wana wa mupristi Aroni, i bohlisile a khulo ga mina, hakuva a nga nyenyeletangi a kungatsumbeki mahlweni ka mina cikari kabye.+ Hi kota ya lezvo, a ndzi hihiritangi a vaIzrayeli hambu lezvi ndzi londzako a ku khozelwa ndzoce.+
12 Hikwalaho, mu byele, uku: ‘Ndza maha civhumelwano ca kurula naye.
13 Ci tava civhumelwano ca wupristi ca kala kupindzuka, ka yena ni ka pswalo wakwe andzhako kakwe,+ hakuva a nga nyenyeletangi a kungatsumbeki mahlweni ka Nungungulu wakwe+ niku i va mahele a muphahlo wa ku kombela ku tsetselelwa zviwonho a vanhu va ka Izrayeli.’”
14 A wanuna wa muIzrayeli loyi a nga dawa zvin’we ni wasati wa muMidhiyani ku wa hi Zimri, a mufana wa Salu, a hosana ya yindlu ya vapapayi ya ka Simeyoni.
15 A vito ga wasati wa muMidhiyani loyi a nga dawa ku wa hi Kozbhi, a nhanyana wa Zuri.+ Zuri i wa hi murangeli wa tixaka ta yindlu ya vapapayi le Midhiyani.+
16 Hi ndzhako ka cikhati, Jehovha i no byela Mosi, aku:
17 “Xanisani a vaMidhiyani mu tlhela mu va daya,+
18 hakuva va mu xanisile hi mano yabye laha va nga mu kanganyisa mhakeni ya Peyori,+ ni ya Kozbhi, a nhanyana wa hosana ya Midhiyani, a nga makabye wabye wa cisati loyi a delweko+ ka siku ga ntungu wu vangilweko hi kota ya Peyori.”+
Mitlhamuselo ya lahasi
^ Kutani: “i no ti tlhanganisa”.
^ Hi kukongoma: “tihloko”.
^ Hi kukongoma: “phambeni ka gambo”.
^ Kutani: “va ti tlhanganisileko na”.
