Mitsengo 28:1-31
28 Andzhako ka lezvo, Jehovha i no byela Mosi, aku:
2 “Byela a vaIzrayeli, uku: ‘Mu nga tshuki mu tsika ku ndzi nyika a munyikelo wa mina wa tipawa. A minyikelo ya mina ya ku hisiwa hi ndzilo ya masema yo nuhela yi fanele ku nyikelwa hi zvikhati zvi yimisilweko.’+
3 “Tlhela u va byela lezvi: ‘A munyikelo wu hisiwako hi ndzilo lowu mu to nyikela ka Jehovha hi lowu: Siku ni siku mu ta nyikela tiyivhana timbiri ta tinene ta vamatsune ta lembe gin’we kota munyikelo wa kuhiswa wu mahiwako hi kukhandzakanya.+
4 A yivhana yin’we ya matsune mu ta yi nyikela ni mixo, leyi yin’wani mu ta yi nyikela na gi ku pswite,*+
5 zvin’we ni cipandze ca wukhume ca efa* ya mapa ma sililweko khwatsi, ma patsilweko ni cipandze ca wumune ca hini* ya mafura ya manene kota munyikelo wa tindzhoho.+
6 Lowu munyikelo wa kuhiswa wu mahiwako hi kukhandzakanya,+ lowu wu yimisilweko Citsungeni ca Sinayi kota masema yo nuhela, a munyikelo wu hisiwako hi ndzilo wu mahelwako Jehovha,
7 zvin’we ni munyikelo wa kona wa zvakunwa, ku nga cipandze ca wumune ca hini, ka yivhana yin’we ni yin’wani ya matsune.+ Chulula a byala laha wutshan’wini go basa kota munyikelo wa zvakunwa wu mahelwako Jehovha.
8 U ta nyikela a yivhana leyi yin’wani ya matsune na gi ku pswite.* U ta yi nyikela zvin’we ni munyikelo wa tindzhoho ni munyikelo wa zvakunwa kota munyikelo wu hisiwako hi ndzilo wa masema yo nuhela ma tsakisako Jehovha, a ku fana ni lezvi zvi mahilweko ni mixo.+
9 “‘Hambulezvo, hi siku ga sabhadho+ a munyikelo wu tava wa tiyivhana timbiri ta vamatsune, a yin’we ni yin’wani na yi hi ni lembe gin’we, ni zvipandze zvimbiri zva wukhume zva efa ya mapa ma sililweko khwatsi, ma patsilweko ni mafura, kota munyikelo wa tindzhoho, zvin’we ni munyikelo wa kona wa zvakunwa.
10 Lowu munyikelo wa kuhiswa wa sabhadho, ni munyikelo wa kuhiswa wu mahiwako hi kukhandzakanya ni munyikelo wa kona zvakunwa.+
11 “‘Kusanguleni ka hweti yin’we ni yin’wani,* mu ta nyikela ka Jehovha kota munyikelo wa kuhiswa a zvidhunana zvimbiri zva tihomu, ni yivhu yin’we ya matsune, ni 7 wa tiyivhana ta vamatsune, a yin’we ni yin’wani na yi hi ni lembe gin’we,+
12 ni zvipandze zvinharu zva wukhume zva mapa ma sililweko khwatsi, ma patsilweko ni mafura, kota munyikelo wa tindzhoho+ ka dhuna gin’we ni gin’wani ga homu, ni zvipandze zvimbiri zva wukhume zva mapa ma sililweko khwatsi, ma patsilweko ni mafura, kota munyikelo wa tindzhoho ka yivhu ya matsune,+
13 ni cipandze cin’we ca wukhume ca mapa ma sililweko khwatsi, ma patsilweko ni mafura, kota munyikelo wa tindzhoho ka yivhana yin’we ni yin’wani ya matsune, zviva munyikelo wa kuhiswa wa masema yo nuhela,+ a munyikelo wu hisiwako hi ndzilo wu mahelwako Jehovha.
14 A munyikelo wa kona wa zvakunwa wu fanele kuva khihlanya ga hini ya vhinyo ka dhuna ga homu,+ ni cipandze ca wunharu ca hini ka yivhu ya matsune+ ni cipandze ca wumune ca hini ka yivhana ya matsune.+ Lowu munyikelo wa kuhiswa wa hweti ni hweti ndzeni ka lembe gontlhe.
15 Ahandle ka lezvo, ku fanele ku nyikelwa cimbutana ka Jehovha kota munyikelo wa ciwonho, ahandle ka munyikelo wa kuhiswa wu mahiwako hi kukhandzakanya, zvin’we ni munyikelo wa kona wa zvakunwa.
16 “‘A siku ga wu 14, ka hweti yo sangula, gi tava Phasika gi mahelwako Jehovha.+
17 Hi siku ga wu 15, ka hweti yaleyo, ku tava ni mubuzo. Ku ta giwa a tipawa to kala comelo ndzeni ka 7 wa masiku.+
18 Hi siku go sangula ku tava ni gotsovanyano wo basa. Mu nga tiri ntiro wo bindza.
19 Mu ta nyikela ka Jehovha a zvidhunana zvimbiri zva tihomu, ni yivhu yin’we ya matsune, ni 7 wa tiyivhana ta vamatsune, a yin’we ni yin’wani na yi hi ni lembe gin’we, kota munyikelo wa kuhiswa lowu wu hisiwako hi ndzilo. Mu ta nyikela hi zvihari zva zvinene.+
20 Mu ta zvi nyikela ni minyikelo ya kona ya tindzhoho ya mapa ma sililweko khwatsi, ma patsilweko ni mafura+ ni zvipandze zvinharu zva wukhume ka dhuna gin’we ga homu ni zvipandze zvimbiri zva wukhume ka yivhu ya matsune.
21 Mu ta nyikela cipandze cin’we ca wukhume ka yivhana yin’we ni yin’wani ya matsune,
22 zvin’we ni mbuti yin’we kota munyikelo wa ciwonho, kasi mu mahelwa a muphahlo wa ku kombela ku tsetselelwa zviwonho.
23 Mu ta nyikela a zvilo lezvi, ahandle ka munyikelo wa kuhiswa wa ni mixo lowu wu nga cipandze ca munyikelo wa kuhiswa wo khandzakanya.
24 Siku ni siku, mu ta zvi nyikela hi ndlela yo fana hi 7 wa masiku, kota zvakuga,* zviva munyikelo wu hisiwako hi ndzilo wa masema yo nuhela ma tsakisako Jehovha. Zvi fanele ku nyikelwa zvin’we ni munyikelo wa kuhiswa wu mahiwako hi kukhandzakanya ni munyikelo wa kona wa zvakunwa.
25 Hi siku ga wu 7, mahani gotsovanyano wo basa.+ Mu nga tiri ntiro wo bindza.+
26 “‘Hi siku ga mihandzu yo sangula yo buvha,+ laha mu to nyikela munyikelo wa tindzhoho tiswa ka Jehovha,+ mu fanele ku maha a gotsovanyano wo basa ka mubuzo wa n’wina wa mavhiki.+ Mu nga tiri ntiro wo bindza.+
27 Kota munyikelo wa kuhiswa wa masema yo nuhela ma tsakisako Jehovha, mu ta nyikela zvidhunana zvimbiri zva tihomu, ni yivhu yin’we ya matsune, ni 7 wa tiyivhana ta vamatsune, a yin’we ni yin’wani na yi hi ni lembe gin’we,+
28 ni munyikelo wa kona wa mapa ma sililweko khwatsi, ma patsilweko ni mafura ya zvipandze zvinharu zva wukhume ka dhuna gin’we ni gin’wani ga homu, ni zvipandze zvimbiri zva wukhume ka yivhu yin’we ya matsune,
29 ni cipandze cin’we ca wukhume ka yivhana yin’we ni yin’wani ya matsune ka leti ta 7,
30 zvin’we ni cimbutana cin’we, kasi ku mu mahela a muphahlo wa ku kombela ku tsetselelwa zviwonho.+
31 Mu ta zvi nyikela ahandle ka munyikelo wa kuhiswa wu mahiwako hi kukhandzakanya ni munyikelo wa kona wa tindzhoho. Zvi fanele kuva zvihari zva zvinene,+ zvin’we ni minyikelo ya kona ya zvakunwa.
Mitlhamuselo ya lahasi
^ Hi kukongoma: “cikari ka wusikwana gimbiri”.
^ Hi kukongoma: “cikari ka wusikwana gimbiri”.
^ Hi kukongoma: “ka tihweti ta n’wina”.
^ Hi kukongoma: “pawa”.
