Mitsengo 30:1-16
30 Makunu Mosi i no byela a tihosana+ ta tixaka ta ka Izrayeli, aku: “Jehovha i leletele lezvi:
2 Loku a wanuna a maha cifungo+ ka Jehovha kutani ku hlambanya+ hi ku maha cifungo ca kutitsona, a nga faneli ku ci tshova.+ I fanele ku maha zvontlhe lezvi a fungileko ku i ta zvi maha.+
3 “Loku a wasati a maha cifungo ka Jehovha kutani a ti boha hi ku maha cifungo ca kutitsona na a ha hi n’wanana, lezvo na a ha tshama kaya ka papayi wakwe,
4 a papayi wakwe azwa cifungo cakwe kutani cifungo cakwe ca kutitsona leci a ti bohileko hi cona, a miyela, zvontlhe a zvifungo zvakwe zvi ta tiyiswa, ni cifungo cakwe ca kutitsona leci a ti bohileko hi cona ci ta tiyiswa.
5 Kanilezvi loku a papayi wakwe a mu alela laha a tivako lezvaku i ti bohile hi zvifungo kutani zvifungo zva kutitsona, a zvifungo lezvo zvi nga ta tira. Jehovha i ta mu tsetselela, hakuva a papayi wakwe i mu betele.+
6 “Hambulezvo, loku a tshuka a chadha na a ha hi ka cifungo cakwe kutani citsumbiso leci a ti bohileko hi cona hi matloti,
7 a nuna wakwe a zvi tiva kanilezvi a nga mu aleli ka siku legi a zvi tivako hi gona, a zvifungo zvakwe kutani zvifungo zva kutitsona lezvi a ti bohileko hi zvona zvi ta tiyiswa.
8 Kanilezvi loku a nuna wakwe a mu alela ka siku legi a zvi tivako hi gona, a nga vhinya a cifungo kutani citsumbiso leci a sati wakwe a ti bohileko hi cona+ hi matloti niku Jehovha i ta mu tsetselela.
9 “Kanilezvi loku a noni* kutani wasati a tlhatlhileko wukati* a maha cifungo, zvontlhe lezvi a ti bohileko ka zvona zvi ta tira.
10 “Hambulezvo, loku a wasati a ti bohile hi cifungo kutani cifungo ca kutitsona na a hi mutini wa nuna wakwe,
11 a nuna wakwe a zvi tiva kanilezvi a nga mu aleli ne a nga zvi soli, zvontlhe a zvifungo zvakwe kutani ni cihi cifungo ca kutitsona leci a ti bohileko hi cona, ci ta tiyiswa.
12 Kanilezvi a ku na cifungo kutani cifungo ca kutitsona ci mahilweko hi sati ci to tira loku a nuna wakwe a zvi vhinyile hi kumbhelela ka siku legi a nga zvi tiva hi gona.+ A nuna wakwe i zvi vhinyile niku Jehovha i ta mu tsetselela.
13 A nuna wakwe i ta tiyisa kutani ku vhinya ni cihi cifungo kutani cihlambanyo ci patsako a cifungo ca kutitsona.*
14 Kanilezvi loku ku hundza masiku, a nuna wakwe na a nga mu aleli, o tiyisa a zvifungo zvontlhe zva sati wakwe kutani zvontlhe zvifungo zva kutitsona lezvi a sati wakwe a ti bohileko hi zvona. I zvi tiyisa hi kota ya lezvi a nga kala ku mu alela ka siku legi a nga tiva ku a sati wakwe i zvi mahile.
15 Kanilezvi loku a nuna wakwe a zvi vhinya andzhako ka loku ku hundzile cikhati co kari na a zvi tivile, i ta rwala a mawuyawuya ya nandzu wa sati wakwe.+
16 “Lezvi zvileletelo lezvi Jehovha a nga leletela Mosi zvi yelanako ni nuna ni sati wakwe, ni papayi ni cinhanyetana cakwe leci ca ha tshamako mutini wa papayi wa cona.”
Mitlhamuselo ya lahasi
^ Kutani: “wasati wo felwa hi nuna”.
^ Kutani: “a mahileko divórcio”.
^ Kutani: “cifungo ca ku ti xanisa”.
