Mitsengo 31:1-54
31 Jehovha i no byela Mosi, aku:
2 “Photela+ vaIzrayeli ka vaMidhiyani.+ Andzhako ka lezvo, u ta hlengeletwa ka vanhu va wena.”*+
3 Hikwalaho, Mosi i no byela vanhu, aku: “Hlomisani a vavanuna vo kari cikari ka n’wina kasi va yalwa ni vaMidhiyani, va neha kuphota ka Jehovha hehla ka vaMidhiyani.
4 Rumelani 1000 va lixaka lin’we ni lin’wani ka tontlhe a tixaka ta ka Izrayeli vaya yimpini.”
5 Hikwalaho, cikari ka makume ya mazana ya Izrayeli,+ ku no rumelwa a 1000 wa vavanuna va lixaka lin’we ni lin’wani; vontlhe va wa hi 12 000 wa vavanuna va hlomileko kulwa yimpi.
6 Makunu Mosi i no rumela 1000 wa vavanuna va lixaka lin’we ni lin’wani vaya yimpini, na Finiyasi,+ a n’wana wa mupristi Eleyazari, loyi a nga famba zvin’we ni butho na a hi ni zvibya zvo basa ni mimpundzu ya yimpi+ canjeni gakwe.
7 Va nolwa yimpi ni vaMidhiyani, kota lezvi Jehovha a nga leletele Mosi, va daya vavanuna vontlhe.
8 Cikari ka lava va nga dawa, ku wa hi ni tihosi ta vaMidhiyani, ku nga Evhi, na Rekemu, na Zuri, na Hura, na Rebha, ti nga ntlhanu wa tihosi ta vaMidhiyani. Va no daya na Bhalami,+ a n’wana wa Bheyori, hi cipadha.
9 Kanilezvi a vaIzrayeli va no khoma a vavasati ni vanana va vaMidhiyani kota tikhumbi. Ahandle ka lezvo, va no phanga zvontlhe a zvifuyo zvabye, ni yontlhe mitlhambi yabye, ni tontlhe titshomba tabye.
10 Va no hisa a madhoropa yabye wontlhe lawa va nga tshama ka wona ni wugovelo gabye gontlhe.
11 Va no teka zvontlhe lezvi va nga phangile, a ku patsa ni vanhu ni zvihari.
12 Hi kulandzela, va no neha a tikhumbi ni muphango ka Mosi, ni ka mupristi Eleyazari, ni ka hlengeletano ya ka Izrayeli le wugovelweni, tivaleni ta Mowabhi,+ kusuhani ni Jordhani ni Jeriko.
13 Hikwalaho, Mosi, na mupristi Eleyazari, ni tontlhe a tihosana ta hlengeletano va no huma va va khinga le handle ka wugovelo.
14 Kanilezvi Mosi i no zangarela a vavanuna va yimisilweko lava va nga rangela masochwa, a varangeli va mitlawa ya 1000 wa vanhu ni varangeli va mitlawa ya 100 wa vanhu lava va nga wuya hi le yimpini.
15 Mosi i te ngalo kabye: “Mu no tsika a vavasati vontlhe va hanya ke?
16 Phela kuve vona, lava hi gezu ga Bhalami, va nga kucetela vaIzrayeli lezvaku va nga tsumbeki+ mahlweni ka Jehovha mhakeni ya Peyori+ laha ka kuza kuta a ntungu hehla ka hlengeletano ya Jehovha.+
17 Zvezvi, dayani a vanana vontlhe va vafana, mu daya ni vavasati vontlhe lava va hlengeleko masango ni wanuna.
18 Kanilezvi a vanhanyana vontlhe lava va kalako va nga se hlengela masango ni wanuna va tsikeni va hanya.+
19 Mu ta tshama le handle ka wugovelo a 7 wa masiku. Ni wihi cikari ka n’wina loyi a deleko munhu* kutani a henyileko cirumbi+ i fanele ku ti basisa+ hi siku ga wunharu ni siku ga wu 7, n’wina ni tikhumbi ta n’wina.
20 A tinguwo tontlhe, ni zvontlhe a zvilo zvi mahilweko hi bhebhe, ni zvontlhe a zvilo zvi mahilweko hi woya ga mbuti, ni zvontlhe a zvilo zva mapulango mu fanele ku zvi basisa ka ciwonho.”
21 Makunu mupristi Eleyazari i no byela a vavanuna va butho lava va nga yile yimpini, aku: “A cileletelo ca nayo leci Jehovha a leleteleko Mosi hi leci:
22 ‘Ntsena a ouro, ni prata, ni kobre, ni simbi, ni estanyo, ni muthovhu,
23 zvontlhe lezvi zvi nga swiko hi ndzilo, hi zvona mu to zvi hundzisa hi lomu ndzilweni kasi zvi hlazveka. Hambulezvo, zvi wa tlhele zvi hlazviwa hi mati ya kubasisa.+ Kanilezvi zvontlhe lezvi zva ku zvi ngaswa hi ndzilo zvi hlazveni hi mati.
24 Hlazvani tinguwo ta n’wina hi siku ga wu 7 ti basa, andzhako ka lezvo, mu nga nghena lomu wugovelweni.’”+
25 Makunu Jehovha i no byela Mosi, aku:
26 “Maha xaxameto wa lezvi zvi phangilweko, u hlaya lezvi zvi khomilweko, a vanhu ni zvihari; wu mahe zvin’we na mupristi Eleyazari ni tihloko ta tiyindlu ta vapapayi ta hlengeletano.
27 Avanyisa muphango hi zvipandze zvimbiri kasi a cipandze cin’we ci avelwa cikari ka butho ga lava va nga yile yimpini, leci cin’wani ci avelwa a hlengeletano yontlhe.+
28 Ka masochwa lawa ma nga yile yimpini, teka muhefemulo* wun’we cikari ka ntlawa wun’we ni wun’wani wa 500 wa yona kota khupo wa Jehovha, cikari ka vanhu, ni ka tihomu, ni ka timbongola, ni ka tiyivhu.
29 Mu ta teka khihlanya ga zvona mu nyika mupristi Eleyazari kota munyikelo ka Jehovha.+
30 Ka khihlanya legi gi nyikilweko a vaIzrayeli, u ta teka cin’we cikari ka ntlawa wun’we ni wun’wani wa 50 wa vanhu, ni wa tihomu, ni wa timbongola, ni wa tiyivhu, ni wa tixaka tontlhe ta zvifuyo, u nyika vaLevhi+ lava va tirako mitiro yi yelanako ni tabhernakeli ga Jehovha.”+
31 Hikwalaho, Mosi na mupristi Eleyazari va no maha zvalezvi Jehovha a nga leletele Mosi.
32 A muphango, ku nga lezvi zvi nga sele ka lezvi zvi nga phangilwe hi vavanuna lava va nga yile yimpini, wuve lowu: 675 000 wa tiyivhu,
33 ni 72 000 wa tihomu,
34 ni 61 000 wa timbongola.
35 A vavasati lava va nga kala va nga se hlengela masango ni wanuna+ va wa hi 32 000.
36 A khihlanya legi gi ngava ciavelo ca lava va nga yile yimpini gi wa hi 337 500 wa tiyivhu.
37 A tiyivhu ti nyikelweko ka Jehovha kota khupo ti wa hi 675.
38 Ku wa hi ni 36 000 wa tihomu; leti ti ngava ta khupo wa Jehovha ti wa hi 72.
39 Ku wa hi ni 30 500 wa timbongola; leti ti ngava ta khupo wa Jehovha ti wa hi 61.
40 Ku wa hi ni 16 000 wa vanhu;* lava va ngava va khupo wa Jehovha va wa hi 32 wa vanhu.*
41 Mosi i no nyikela a khupo ka mupristi Eleyazari,+ kota munyikelo wa Jehovha, a ku khwatsi hi lezvi Jehovha a nga leletele Mosi.
42 A khihlanya legi gi nga lumba vaIzrayeli, legi Mosi a nga gi pambulile ka cipandze leci ci nga hi ca vavanuna lava va nga lwile yimpi, hi legi:
43 A khihlanya ga tiyivhu gi wa hi 337 500,
44 a ga tihomu gi wa hi 36 000,
45 a ga timbongola gi wa hi 30 500,
46 niku a ga vanhu* gi wa hi 16 000.
47 Makunu ka khihlanya ga vanhu ni ga zvihari legi gi nga lumba a vaIzrayeli, Mosi i no teka munhu mun’we cikari ka ntlawa wun’we ni wun’wani wa 50 wa vona ni cihari cin’we ka ntlawa wun’we ni wun’wani wa 50 wa zvona a nyika vaLevhi+ lava va nga maha ntiro wa lomu tabhernakelini ga Jehovha,+ a ku khwatsi hi lezvi Jehovha a nga leletele Mosi.
48 Makunu a vavanuna va yimisilweko va mitlawa ya 1000 wa masochwa,+ a varangeli va mitlawa ya 1000 wa vanhu ni varangeli va mitlawa ya 100 wa vanhu, va no tshinela ka Mosi,
49 vaku kakwe: “A malandza ya wena ma hlayile a vavanuna vontlhe lava va nga valwi va yimpi lava hi va rangelako, niku hi byelilwe ku i hava a kiyelako.+
50 Hikwalaho, a mun’we ni mun’wani wa hina i lava ku nyikela ka Jehovha lezvi a zvi kumileko kota munyikelo: A zvilo zva ouro, ni zvichinana zva lomu minengeni, ni maniya, ni tiphera ta tikarimbo, ni tiphera ta tindleve,* ni zvin’wani zvilo zva lisima, kasi hi* ti mahela muphahlo wa ku kombela ku tsetselelwa zviwonho mahlweni ka Jehovha.”
51 Hikwalaho, Mosi na mupristi Eleyazari va no amukela a ouro leyi yi ngata hi kabye, zvontlhe a zvilo zva lisima.
52 A ouro yontlhe leyi a varangeli va mitlawa ya 1000 wa vanhu ni varangeli va mitlawa ya 100 wa vanhu va nga maha hi yona a munyikelo ka Jehovha yi wa ringana 16 750 wa maxekeli.*
53 A wanuna mun’we ni mun’wani wa butho i wa susile a cipandze co kari ca muphango civa cakwe.
54 Mosi na mupristi Eleyazari va no amukela a ouro hi ka varangeli va mitlawa ya 1000 wa vanhu ni ka varangeli va mitlawa ya 100 wa vanhu va famba nayo lomu tendeni ga mutlhangano kota cialakanyiso ka vanhu va ka Izrayeli mahlweni ka Jehovha.
Mitlhamuselo ya lahasi
^ Magezu yo sasekiselwa ma wulako kufa.
^ Kutani: “a muhefemulo”.
^ Kutani: “mihefemulo”.
^ Kutani: “mihefemulo”.
^ Kutani: “mihefemulo”.
^ Kutani: “ni tikalavhu”.
^ Kutani: “a mihefemulo ya hina yi”.
