Mitsengo 32:1-42
-
Zvipandze zva tiko tlhelweni ga mutsuwuka-gambo wa Jordhani (1-42)
32 Makunu a vana va Rubheni+ ni vana va Gadhi+ va wa hi ni zvifuyo zvo tala. Va no wona lezvaku a tiko ga Jazera+ ni ga Gileyadhe ma wa hi manene kasi ku risela ka wona zvifuyo.
2 Hikwalaho, a vana va Gadhi ni vana va Rubheni va no tshinela ka Mosi, ni ka mupristi Eleyazari ni ka tihosana ta hlengeletano, vaku:
3 “Atarote, ni Dhibhoni, ni Jazera, ni Nimra, ni Hexbhoni,+ ni Eleyale, ni Sebhama, ni Nebho,+ ni Bheyona,+
4 a madhoropa lawa Jehovha a ma hlulileko mahlweni ka hlengeletano ya ka Izrayeli,+ wutshamu ga ginene kasi ku risela ka gona zvifuyo niku a malandza ya wena ma na ni zvifuyo zvo tala.”+
5 Va no engeta, vaku: “Loku hi kumile thomo mahlweni ka wena, vhumela ku a wutshamu legi gi nyikiwa a malandza ya wena kota tshomba. U nga hi tlhatukisi a Jordhani.”
6 Makunu Mosi i no wutisa a vana va Gadhi ni vana va Rubheni, aku: “A vamakabye va n’wina va lava kuya va yalwa yimpi n’wina na mu sele laha mu tshama ke?
7 Mu lava ku va mbhetela yini ntamu a vanhu va ka Izrayeli va tsika ku tlhatuka vaya tikweni legi Jehovha a lavako ku va nyika ke?
8 Hi zvalezvo va nga maha a vapapayi va n’wina a cikhati leci ndzi nga va ruma hi Kadhexe-Bharneya a kuya va ya wona tiko.+
9 Laha va nga chikela Nkoveni wa Exkole+ va wona tiko, va no va mbheta ntamu a vanhu va ka Izrayeli va tsika ku nghena tikweni legi Jehovha a nga lava ku va nyika.+
10 Ka siku lego, a zanga ya Jehovha yi no vhura aza a hlambanya,+ aku:
11 ‘Vontlhe lava va humileko hi Gibhite va kusukela ka 20 wa malembe kuya hehla va nga ta wona a tiko+ legi ndzi hlambanyileko ka Abrahama, ni ka Isaka ni ka Jakobe,+ hakuva a va ndzi landzelangi hi mbilu yabye yontlhe —
12 ahandle ka Kalebhi,+ a n’wana wa Jefune, a muKenazi, na Joxuwa,+ a n’wana wa Nuni, hakuva va landzele Jehovha hi mbilu yontlhe.’+
13 Hikwalaho, a zanga ya Jehovha yi no vhura yi vhukela Izrayeli, a va pepetsekisa 40 wa malembe lomu ciwuleni+ kala a cizukulwana contlhe leci ci nga maha zvo biha mahlweni ka Jehovha ci fuva.+
14 Makunu mu yimile cikhundleni ca vapapayi va n’wina kota pswalo wa vawonhi, lava va engetelako a zanga ya Jehovha yi vhurako yi vhukela Izrayeli.
15 Loku mu tsika a ku mu landzela, hakunene i ta va tsika kambe lomu ciwuleni niku mu ta lovisisa vontlhe vanhu lava.”
16 Andzhako ka cikhati, va no tshinela kakwe, vaku ngalo: “Hi tsike hi aka maranga ya maribye ya zvifuyo zva hina ni madhoropa ya vana va hina.
17 Kanilezvi hi ta simama hi longile a kulwa yimpi+ hi tlhela hi famba mahlweni ka vaIzrayeli kala hi va chiketa wutshan’wini gabye, a vana va hina na va tshamile madhoropeni ma vhikelweko khwatsi, na va vhikelwe ka vaaki va tiko.
18 Hi nga ta wuya mitini ya hina kala a vaIzrayeli vontlhe va amukela a tiko, a mun’we ni mun’wani ava tshombeni yakwe.+
19 Hina hi nga ta amukela tshomba navo le tlhatuko wa Jordhani kutani kun’wani, hakuva hi amukele a tshomba ya hina tlhelweni ga mutsuwuka-gambo wa Jordhani.”+
20 Mosi i no va hlamula, aku: “Loku mu maha lezvo, mu hloma kasi kulwa yimpi mahlweni ka Jehovha,+
21 ni loku n’wina n’wentlhe mu hloma mu tlhatuka Jordhani mahlweni ka Jehovha laha a hlongolako valala vakwe mahlweni kakwe+
22 kala a tiko gi khoziswa mahlweni ka Jehovha,+ andzhako ka lezvo, mu nga tlhela+ niku mu ta tlhatlheka ka nandzu mahlweni ka Jehovha ni ka Izrayeli. A tiko legi gi tava tshomba ya n’wina mahlweni ka Jehovha.+
23 Kanilezvi loku mu nga mahi lezvo mu tava mu wonhele Jehovha. Loku zvi hi tano, zvi tiveni ku mu nga ta pona tsayiselelo wa ciwonho ca n’wina.
24 Mu nga aka madhoropa ya vana va n’wina ni maranga ya mitlhambi ya n’wina+ kanilezvi mahani lezvi mu nga tsumbisa.”
25 A vana va Gadhi ni vana va Rubheni va no byela Mosi, vaku: A malandza ya wena ma ta maha zvalezvi a hosi ya mina yi layileko.
26 A vana va hina, ni vasati va hina, ni mitlhambi ya hina, ni zvontlhe a zvifuyo zva hina zvi ta sala madhoropeni ya Gileyadhe,+
27 kanilezvi a malandza ya wena ma ta tlhatuka a Jordhani, a vavanuna vontlhe na va hlomile kasi kulwa yimpi mahlweni ka Jehovha,+ kota lezvi a hosi ya mina yi wulileko.”
28 Hikwalaho, Mosi i no nyika zvileletelo xungetano hi vona ka mupristi Eleyazari, ni ka Joxuwa, a n’wana wa Nuni, ni ka tihloko ta tiyindlu ta vapapayi ta tixaka ta ka Izrayeli.
29 Mosi i te ngalo kabye: “Loku a vana va Gadhi ni vana va Rubheni va tlhatuka Jordhani zvin’we na n’wina, a vavanuna vontlhe na va hlomile kasi kulwa yimpi mahlweni ka Jehovha, ni tiko gi khoziswa mahlweni ka n’wina, mu ta va nyika a tiko ga Gileyadhe kota tshomba.+
30 Kanilezvi loku va nga hlomi va tlhatuka a Jordhani zvin’we na n’wina, va ta aka cikari ka n’wina le tikweni ga Khanani.”
31 Makunu a vana va Gadhi ni vana va Rubheni va no hlamula, vaku: “Lezvi Jehovha a wulileko ka malandza ya wena hi zvalezvo hi to maha.
32 Hi ta hloma hi tlhatuka a Jordhani mahlweni ka Jehovha hiya tikweni ga Khanani+ kanilezvi a cipandze leci hi to amukela kota tshomba ci tava tlhelweni legi seno ga Jordhani.”
33 Hikwalaho, Mosi i no nyika vana va Gadhi, ni vana va Rubheni,+ ni khihlanya ga lixaka la ka Manase,+ a n’wana wa Josefa, a mufumo wa Sihoni,+ a hosi ya vaAmori, ni mufumo wa Ogi,+ a hosi ya Bhaxani, ma nga matiko lawa ma lumbako a madhoropa ya zvipandze lezvo ni madhoropa ya zvipandze lezvi zvi nga ma randzele.
34 A vana va Gadhi va no aka* a dhoropa ga Dhibhoni,+ ni ga Atarote,+ ni ga Arowera,+
35 ni ga Atrote-Xofane, ni ga Jazera,+ ni ga Jogbheha,+
36 ni ga Bhet-Nimra+ ni ga Bhet-Harani,+ a madhoropa ma bhiyelweko hi makhokhola niku va no aka a maranga ya maribye ya mitlhambi.
37 A vana va Rubheni va no aka a dhoropa ga Hexbhoni,+ ni ga Eleyale,+ ni ga Kiriyatayime,+
38 ni ga Nebho,+ ni ga Bhaali-Meyoni+ — va ma cica mavito — ni ga Sibma. Va no sangula ku ma chula man’wani mavito a madhoropa lawa va nga aketa.
39 A vana va Makira,+ a n’wana wa Manase, va no ya dhumela Gileyadhe va gi teka, va hlongola a vaAmori lava va nga hi lomo.
40 Hikwalaho, Mosi i no nyikela Gileyadhe ka Makira, a n’wana wa Manase; yena i no sangula ku tshama ka gona.+
41 Jayira, a n’wana wa Manase, i noya a ya dhumela zvidhoropana zva matenda zva wutshamu lego, a zvi chula ku Havhote-Jayira.*+
42 Nobha i noya a ya wutla a dhoropa ga Kenate ni zvidhoropana zva kona, a gi chula ku Nobha, gi nga vito gakwe.
