Mitsengo 34:1-29
34 Jehovha i no engeta a wulawula na Mosi, aku:
2 “Leletela a vaIzrayeli, uku: ‘A cikhati leci mu to nghena tikweni ga Khanani,+ mu ta amukela a tiko legi kota tshomba ya n’wina, a tiko ga Khanani, hi kuya hi mimbhingano ya gona.+
3 “‘A mbhingano wa n’wina ka tlhelo ga le dzongeni* wu ta sukela ciwuleni ca Zini ci nga kusuhani ni Edhomi. Ka tlhelo ga le mupela-gambo, wu ta sukela le magumo ya Bimbi ga Munyu.*+
4 A mbhingano wa n’wina wu ta jika kasi wu hundza hi dzongeni wa tsunga wa Akrabhima,+ wu simama kala Zini. A magumo ya wona ku tava le dzongeni wa Kadhexe-Bharneya.+ Hi kulandzela, wu ta famba kala Hazar-Adhara,+ wu simama kala le Azmoni.
5 A mbhingano wu ta jika hi le Azmoni wuya Nkoveni wa Gibhite wu ya gumesa le Bimbini.*+
6 “‘A mbhingano wa n’wina hi tlhelo ga mupela-gambo ku tava Bimbi ga Hombe* ni mbhiri ya bimbi. Lowu wu tava mbhingano wa n’wina hi tlhelo ga mupela-gambo.+
7 “‘A mbhingano wa n’wina hi tlhelo ga n’walungu* wu tava lowu: Wu ta sukela Bimbini ga Hombe kala Citsungeni ca Hora.
8 Kusukela le Citsungeni ca Hora, mu ta pandza mbhingano kala le Lebho-Hamate.*+ A mbhingano wu ta gumesa le Zedhadhe.+
9 Wu ta hundza hi le Zifroni, wu ya gumesa le Hazar-Enane.+ Lowu wu tava mbhingano wa n’wina hi tlhelo ga n’walungu.
10 “‘Hi kulandzela, mu ta pandza a mbhingano wa n’wina hi tlhelo ga mutsuwuka-gambo, kusukela le Hazar-Enane kala le Xefame.
11 A mbhingano wu ta sukela le Xefame wu famba kala le Ribla, le mutsuwuka-gambo wa Ayina. Wu ta relela wu tsemakanya a mutsuwuka-gambo wa mbhiri ya Bimbi ga Kinereta.*+
12 A mbhingano wu ta famba kala le Jordhani wu ya gumesa le Bimbini ga Munyu.+ Legi gi tava tiko ga n’wina+ ni mimbhingano leyi yi gi randzeleko.’”
13 Makunu Mosi i no byela vaIzrayeli, aku: “Legi i tiko legi mu to avelana hi hlolo kota tshomba ya n’wina,+ kota lezvi Jehovha a leleteleko ku gi nyikelwa ka 9 wa tixaka ni khihlanya.
14 Hakuva a lixaka la va ka Rubheni hi yindlu ya vapapayi vabye, ni lixaka la va ka Gadhi hi yindlu ya vapapayi vabye, ni khihlanya ga lixaka la va ka Manase va sina va tekile a tshomba yabye.+
15 A tixaka leti ta timbiri ni khihlanya ti sina ti tekile a tshomba ya tona cipandzeni ca mutsuwuka-gambo wa Congo wa Jordhani, kusuhani ni Jeriko, hi tlhelo ga mutsuwuka-gambo.”+
16 Jehovha i no engeta a wulawula na Mosi, aku:
17 “A mavito ya vavanuna lava va to mu avela tiko kota tshomba, hi lawa: Mupristi Eleyazari+ na Joxuwa,+ a n’wana wa Nuni.
18 Ka lixaka lin’we ni lin’wani, mu ta teka a hosana yin’we kasi ku avela tiko kota tshomba ya n’wina.+
19 A mavito ya vavanuna lavo hi lawa: Ka lixaka la ka Judha+ hi Kalebhi,+ a n’wana wa Jefune;
20 ka lixaka la vana va Simeyoni+ hi Xemuweli, a n’wana wa Amihudhi;
21 ka lixaka la ka Bhenjamini+ hi Elidhadhe, a n’wana wa Kisloni;
22 ka lixaka la vana va Dhani+ hi hosana Bhuki, a n’wana wa Jogli;
23 ka vana va Josefa,+ ka lixaka la vana va Manase+ hi hosana Haniyeli, a n’wana wa Efodhe;
24 ka lixaka la vana va Efrayime+ hi hosana Kemuweli, a n’wana wa Xiftani;
25 ka lixaka la vana va Zebhuloni+ hi hosana Elizafane, a n’wana wa Parnake;
26 ka lixaka la vana va Isakari+ hi hosana Paltiyeli, a n’wana wa Azana;
27 ka lixaka la vana va Axeri+ hi hosana Ahihudhi, a n’wana wa Xelomi;
28 ka lixaka la vana va Naftali+ hi hosana Pedhaheli, a n’wana wa Amihudhi.”
29 Lava hi lava Jehovha a leleteleko lezvaku va avela a tiko ka vaIzrayeli tikweni ga Khanani.+
Mitlhamuselo ya lahasi
^ Kutani: “sul”.
^ Ku nga Bimbi Gofa.
^ Ku nga Bimbi ga Hombe ga Medhiteraneo.
^ Ku nga Medhiteraneo.
^ Kutani: “norte”.
^ Kutani: “nyangweni ya Hamate”.
^ Ku nga tiva ga Genezareta kutani Bimbi ga Galileya.
